પહેલીવાર EDની ચાર્જશીટમાં પ્રિયંકા ગાંધીના નામનો ઉલ્લેખ, મુશ્કેલીઓ વધી

નવી દિલ્હી, 28 ડિસેમ્બર: એન્ફોર્સમેન્ટ ડિરેક્ટોરેટ (ED)ની ચાર્જશીટમાં પહેલીવાર પ્રિયંકા ગાંધી વાડ્રાના નામનો ઉલ્લેખ કરાયો છે. રોબર્ટ વાડ્રાની સાથે પહેલીવાર પ્રિયંકા ગાંધીની પણ મુશ્કેલીઓ વધી છે. મળતી માહિતી મુજબ, સીસી થમ્પી અને સુમિત ચઢ્ઢા વિરુદ્ધ દાખલ કરવામાં આવેલી ચાર્જશીટમાં પ્રિયંકાના નામનો ઉલ્લેખ છે. તપાસમાં જાણવા મળ્યું કે રોબર્ટ વાડ્રા અને થમ્પી સિવાય પ્રિયંકા ગાંધીએ ફરીદાબાદમાં પણ જમીન ખરીદી હતી. આ પહેલા પ્રિયંકા ગાંધી વિવાદોથી દૂર હતા.

નાણાકીય તપાસ દરમિયાન સંજય ભંડારીના નજીકના થમ્પી-વાડ્રાનો ખુલાસો થયો હતો. જો કે, પ્રિયંકા અને રોબર્ટ વાડ્રાના નામ આરોપી તરીકે નથી. 2005-2006ની વચ્ચે રોબર્ટ વાડ્રાએ પ્રોપર્ટી ડીલર એચએલ પાહવા (થમ્પીની નજીક) મારફતે ફરીદાબાદના અમીપુર ગામમાં લગભગ 40.8 એકર જમીન ખરીદી હતી, જે ડિસેમ્બર 2010માં પાહવાને પાછી વેચી દેવામાં આવી હતી.

એપ્રિલ 2006માં આ જ અમીપુર ગામમાં પ્રિયંકા ગાંધી વાડ્રાના નામે એક ઘર ખરીદવામાં આવ્યું હતું, જે ફેબ્રુઆરી 2010માં પાહવાને વેચવામાં આવ્યું હતું. સૂત્રોના જણાવ્યા અનુસાર, પાહવા થમ્પીની ખૂબ નજીક છે, પાહવાએ જ અમીપુર ગામમાં થમ્પીની જમીન ખરીદી હતી. થમ્પી-વાડ્રા વચ્ચેના નાણાકીય જોડાણોની તપાસ દરમિયાન પ્રિયંકા ગાંધીનું નામ સામે આવ્યું હતું.

આ પણ વાંચો: નાણાકીય ગેરરીતિના કેસમાં સુમિત ચઢ્ઢા સામે બિન-જામીનપાત્ર વોરંટ જારી