સુરતમાં શિક્ષિકા દ્વારા બાળકીને મારવાની ઘટના: તપાસનો આદેશ
સુરતના પુણાની સાધના નિકેતન શાળમાં શિક્ષિકાએ એક બાળકીને ઢોર માર માર્યો હતો. આ ઘટના વર્ગખંડમાં લાગેલા સીસીટીવીમાં કેદ થઈ હતી. શિક્ષણ રાજ્ય મંત્રી પ્રફુલ પાનશેરિયાએ સીનિયર કેજીમાં ભણતી બાળકીને માર મારવાની ઘટનાને દુ:ખદ ગણાવી છે. આ મામલે તાત્કાલિક પગલાં લેવા માટે તપાસનાં આદેશ આપ્યા છે. તેમજ તેઓએ શાળા અને જવાબદાર વિરૂદ્ધ કડક પગલાં લેવામાં આવશે તેમ પણ જણાવ્યું છે.
સુરતમાં શિક્ષિકા દ્વારા બાળકીને મારવાની ઘટના: તપાસનો આદેશ#surat #suratnews #student #teacher #school #news #NewsUpdate #Gujarat #GujaratiNews #humdekhengenews pic.twitter.com/NjLaANDHzl
— Hum Dekhenge News (@humdekhengenews) October 11, 2023
રાજ્યના તમામ શિક્ષકોને ચેતવણી આપતા શિક્ષણ રાજ્ય મંત્રી એ જણાવ્યું હતું કે, આ પ્રકારનું કૃત્ય થવું ન જોઈએ અને જો આવું કાંઈ થશે તો તેના વિરુદ્ધમાં કડકમાં કડક પગલાં ભરવામાં આવશે. આવી નિર્દયતા કયારેય સહન કરી લેવામાં નહિ આવે. આ પ્રકારના કૃત્યોથી વિદ્યાર્થીઓના માનસિક સંતુલન ઉપર ખૂબ ઉંડી અસર થાય છે. વાલીઓ પોતાના બાળકને આગામી સમયમાં દેશના સારા નાગરિક બની શકે તેવા હેતુથી શાળામાં મોકલતા હોય છે ત્યારે શિક્ષક દ્વારા આ પ્રકારનું કૃત્ય ચલાવી લેવામાં આવશે નહિ.
તેમણે ઉમેર્યું કે, શાળાના સીસીટીવી કેમેરામાં શિક્ષક દ્વારા કરવામાં આવતું કૃત્ય સ્પષ્ટપણે દેખાઈ આવે છે જે ખૂબ જ નિંદનીય છે. આ ઘટનાની તપાસ કરવા માટે શિક્ષણાધિકારી તાત્કાલિક શાળાએ પહોંચી ગયા છે અને આ ઘટના અંગે સંપૂર્ણ પારદર્શકતાથી તપાસ કરવામાં આવશે અને જવાબદાર શિક્ષક વિરુદ્ધ પગલા ભરવામાં આવશે. આ પ્રકારની ઘટના રાજ્યની અન્ય શાળાઓમાં ન બને તે માટે કડક સૂચના આપવામાં આવી છે. એટલું જ નહીં, આ પ્રકારની ઘટના કોઈ પણ નાગરિકના ધ્યાને આવે અથવા આસપાસના વિસ્તારની શાળાઓમાં થઈ હોય તેવી જાણ થાય તો તે સંદર્ભે તાત્કાલિક સંબંધિત જિલ્લા શિક્ષણાધિકારીને જાણ કરવા મંત્રીએ જણાવ્યું છે.
આ પણ વાંચો: અમદાવાદ : વિદ્યાર્થીનીઓને અશ્લિલ મેસેજ કરનાર શિક્ષક દોષિત જાહેર
