પાકિસ્તાનમાં આતંકી સરદાર આતંકી હુમલામાં જ માર્યો ગયો, આત્મઘાતી હુમલામાં બીજા અનેકે જીવ ગુમાવ્યા

લાહોર, તા. 28 ફેબ્રુઆરી, 2025: પાકિસ્તાનના ‘તાલિબાનના પિતા’ મૌલાના સમી-ઉલ હકના પુત્ર મૌલાના હમીદ ઉલ હક હક્કાનીનું પાકિસ્તાનના ખૈબર પખ્તુનખ્વામાં એક મસ્જિદની બહાર થયેલા વિસ્ફોટમાં મૃત્યુ થયું છે. જીઓ ન્યૂઝે આ વાતની પુષ્ટિ કરી છે. પાકિસ્તાનના ખૈબર પખ્તુનખ્વા (કેપી) પ્રાંતના નૌશેરા શહેર નજીક અખોરા ખટ્ટક વિસ્તારમાં દારુલ ઉલૂમ હક્કાની મદરેસામાં શુક્રવારની નમાજ દરમિયાન થયેલા શંકાસ્પદ આત્મઘાતી વિસ્ફોટમાં અનેક લોકોએ જીવ ગુમાવ્યા અને ડઝનબંધ લોકો ઘાયલ થયા હતા. આત્મઘાતી હુમલાખોર શુક્રવારની નમાજ દરમિયાન મસ્જિદના મુખ્ય હોલમાં હાજર હતો અને નમાજ પૂરી થતાંની સાથે જ તેણે પોતાને ઉડાવી દીધો હતો. મોટી વાત એ છે કે હક્કાનીના પિતાનું પણ શુક્રવારે અવસાન થયું હતું.

પાકિસ્તાનના ખૈબર પખ્તુનખ્વાના નૌશેરામાં એક મસ્જિદમાં શુક્રવારની નમાજ પછી વિસ્ફોટ થયો હતો. આત્મઘાતી હુમલામાં મૌલાના હામિદ ઉલ હક હક્કાનીનું મોત થયું હતું. હમીદ ઉલ હક હક્કાની પાકિસ્તાનમાં હક્કાનીયા મદરેસાના વડા હતા. હક્કાની તેમના ભારત વિરોધી નિવેદનોને કારણે હેડલાઇન્સમાં હતા. હક્કાનીના પિતાની પણ તેમના ઘરમાં હત્યા કરવામાં આવી હતી. હક્કાની મૌલાના સમી-ઉલ હકના પુત્ર હતા, જેમને પાકિસ્તાની તાલિબાનના પિતા કહેવામાં આવે છે.

અખોરા ખટ્ટકના સ્થાનિકોએ જણાવ્યું કે અત્યાર સુધીમાં ઓછામાં ઓછા પાંચ લોકોના મોત થયા છે, જ્યારે એક ડઝનથી વધુ લોકો ઘાયલ થયા છે. વિસ્ફોટ થયો ત્યારે મોટી સંખ્યામાં લોકો મસ્જિદની અંદર હતા, તેથી મૃતકોની સંખ્યા વધવાની આશંકા છે. જિયો ન્યૂઝ અનુસાર, મૌલાના હમીદ ઉલ હક હક્કાનીની સુરક્ષા માટે 10 થી 15 લોકોને તૈનાત કરવામાં આવ્યા હતા. આ બોમ્બ વિસ્ફોટમાં આ લોકો ઘાયલ પણ થયા છે.

ખૈબર પખ્તુનખ્વાના પોલીસ મહાનિરીક્ષક (આઈજી) ઝુલ્ફીકાર હમીદે પુષ્ટિ આપી હતી કે, અત્યાર સુધીમાં ઓછામાં ઓછા પાંચ લોકોના મોત થયા છે જ્યારે ૧૨ થી વધુ લોકો ગંભીર રીતે ઘાયલ થયા છે. હોસ્પિટલના સૂત્રોએ જણાવ્યું હતું કે ઘાયલોની સંખ્યા વધવાની શક્યતા છે કારણ કે હોસ્પિટલમાં લાવવામાં આવેલા મોટાભાગના ઘાયલોની હાલત ગંભીર હતી.

મદરેસા તાલિબાનનું લોન્ચિંગ પેડ હતું

આતંકવાદી જૂથ તાલિબાનના પિતા તરીકે જાણીતા પાકિસ્તાની ધર્મગુરુ મૌલાના સમી-ઉલ-હકની પણ છરીના ઘા મારીને હત્યા કરવામાં આવી હતી. રાવલપિંડીના ગેરિસન શહેરમાં તેની હત્યા કરવામાં આવી હતી. ૮૨ વર્ષીય હક પાકિસ્તાન અને અફઘાનિસ્તાનમાં એક આદરણીય વ્યક્તિ હતા અને સરહદની બંને બાજુ તાલિબાનોમાં તેમના વિચારોનું ખૂબ વજન હતું. અફઘાન સરહદ તરફ જતા મુખ્ય મોટરવેથી દૂર ધૂળિયા પાકિસ્તાની શહેરમાં સ્થિત, તેની દારુલ ઉલૂમ હક્કાનીયા યુનિવર્સિટી 1990 ના દાયકામાં તાલિબાન માટે લોન્ચિંગ પેડ હતી અને હજુ પણ તેને ઘણીવાર ઇસ્લામિક આતંકવાદીઓ માટે ઇન્ક્યુબેટર તરીકે વર્ણવવામાં આવે છે.

શુક્રવારની નમાજ દરમિયાન હુમલાખોર અંદર કેવી રીતે ઘુસ્યો તેની પાકિસ્તાન પોલીસ તપાસ કરી રહી છે. રસ્તાની બાજુમાં આવેલા આ મદરેસાની સુરક્ષા હક્કાની મદરેસા દ્વારા જ સંચાલિત થાય છે. ઘણા લોકો મસ્જિદની અંદરના મદરેસામાં શિક્ષણ લે છે. પાકિસ્તાન પોલીસને શંકા છે કે હુમલાખોર આમાંથી એક હોઈ શકે છે.

આ પણ વાંચોઃ હરિયાણામાં ભાજપ સરકારના કપાળે કાળી ટીલી, પરીક્ષામાં નકલખોરીનાં દૃશ્યો જોવા મળ્યાં