અમેઠીમાં રૉબર્ટ વાડ્રાને સમર્થનમાં લગાવેલા પોસ્ટર હટાવ્યા, સ્મૃતિ ઈરાનીએ કર્યો કટાક્ષ

અમેઠી (ઉત્તર પ્રદેશ), 24 એપ્રિલ: અમેઠીમાં રૉબર્ટ વાડ્રાને સમર્થનમાં લગાવવામાં આવેલા તમામ પોસ્ટરો હટાવી દેવામાં આવ્યા છે. મહત્ત્વનું છે કે આજે સવારે જ અમેઠીમાં રૉબર્ટ વાડ્રાના સમર્થનમાં અલગ-અલગ જગ્યાએ આ પોસ્ટરો લગાવવામાં આવ્યા હતા. આ પોસ્ટરમાં લખવામાં આવ્યું હતું કે ‘અમેઠી કી જનતા કરે પુકાર રૉબર્ટ વાડ્રા, અબ કી બાર’. આ પોસ્ટરો કોણે લગાવ્યા તેની કોઈ માહિતી નથી. પોસ્ટરની નીચે પિટિશનર તરીકે ‘અમેઠીની જનતા’ લખવામાં આવ્યું છે. કોંગ્રેસના કાર્યકરોનો દાવો છે કે આ પોસ્ટરો પોલીસ પ્રશાસન દ્વારા હટાવી દેવામાં આવ્યા છે.

રૉબર્ટ વાડ્રાના સમર્થનમાં પોસ્ટર લાગ્યા

નોંધનીય છે કે આ પોસ્ટર એવા સમયે લગાવવામાં આવ્યા છે જ્યારે અમેઠી લોકસભા સીટને લઈને રાજકીય વર્તુળોમાં વિવિધ પ્રકારની ચર્ચાઓ ચાલી રહી છે. આ વખતે કોઈ દાવો કરી રહ્યું છે કે રાહુલ ગાંધી ફરી અમેઠીથી ચૂંટણી લડશે, તો કોઈ પ્રિયંકા ગાંધીના પતિ રૉબર્ટ વાડ્રાની ચૂંટણી સફરની શરૂઆત અહીંથી થવાની વાત કરી રહ્યું છે. પરંતુ આ તમામ અટકળો વચ્ચે કોંગ્રેસે હજુ સુધી આ સીટ પરથી પોતાના કોઈ ઉમેદવારનું નામ જાહેર કર્યું નથી, આ બધા વચ્ચે સોમવારે અમેઠીમાં રૉબર્ટ વાડ્રાના સમર્થનમાં પોસ્ટર લગાવવામાં આવ્યા હતા.

સ્મૃતિ ઈરાનીએ રાહુલ ગાંધી પર કર્યો કટાક્ષ

કોંગ્રેસે અત્યાર સુધી અમેઠી બેઠક પરથી કોઈ ઉમેદવાર જાહેર ન કરતાં અમેઠીના વર્તમાન ભારતીય જનતા પાર્ટી (BJP) સાંસદ અને કેન્દ્રીય મંત્રી સ્મૃતિ ઈરાનીએ કોંગ્રેસના વરિષ્ઠ નેતા રાહુલ ગાંધી અને રૉબર્ટ વાડ્રા પર કટાક્ષ કર્યો હતો. તેમણે દાવો કર્યો હતો કે રાહુલ ગાંધીએ સાંસદ તરીકેના 15 વર્ષમાં જે કામ કર્યું હતું તેના કરતાં માત્ર પાંચ વર્ષમાં તેણે વધુ કામ કર્યું છે.

વાડ્રાએ ચૂંટણી લડવાના સંકેતો આપ્યા હતા

વાડ્રાએ હાલમાં જ સંકેત આપ્યા હતા કે તેઓ અમેઠીથી લોકસભા ચૂંટણી લડવા ઈચ્છુક છે. વાડ્રાએ આ મહિનાની શરૂઆતમાં મથુરામાં પત્રકારોને કહ્યું હતું કે અમેઠીના લોકો ઇચ્છે છે કે તેઓ તેમનું પ્રતિનિધિત્વ કરે તેમના વિસ્તારમાં જઈને તેમની સમસ્યાઓ સાંભળો, જેથી તેઓ પ્રગતિ કરી શકે. મને પણ રાજકારણમાં જોડાવામાં રસ છે. અમેઠી લોકસભા સીટ પર ચૂંટણી માટે ઉમેદવારી પત્ર ભરવાની પ્રક્રિયા 26મી એપ્રિલથી શરૂ થશે અને આ પ્રક્રિયા 3જી મે સુધી ચાલશે. અહીં 20 મેના રોજ મતદાન થશે. તમને જણાવી દઈએ કે ભાજપે સ્મૃતિ ઈરાનીને અમેઠીથી ત્રીજી વખત ઉમેદવાર જાહેર કર્યા છે. 2019ની સામાન્ય ચૂંટણીમાં ઈરાનીએ અમેઠી બેઠક પરથી રાહુલ ગાંધીને હરાવ્યા હતા.

આ પણ વાંચો: ‘જેમ બસમાં રૂમાલ મુકવામાં આવે છે તેમ રાહુલ ગાંધી અમેઠીમાં રૂમાલ મુકવા આવશે’