ઈઝરાયલમાં પણ અવાર નવાર રાજકીય હલચલ થતી રહી છે. ઇઝરાયલમાં છેલ્લા ચાર વર્ષથી ઓછા સમયમાં 5મી ચૂંટણી યોજાવા જઈ રહી છે. ઇઝરાયેલની સંસદ ભંગ કરી દેવામાં આવી છે અને નવેમ્બરમાં સામાન્ય ચૂંટણી કરાવવાના પ્રસ્તાવને મંજૂરી આપવામાં આવી છે. દેશની સંસદે આ અંગે નિર્ણય લીધો છે અને વિશેષ બિલ પસાર કરીને નવી ચૂંટણીનો માર્ગ મોકળો કરી દીધો છે. તમામ પક્ષોએ નવી ચૂંટણી યોજવાનું સમર્થન કર્યું છે.
ઇઝરાયેલના વિદેશ પ્રધાન અને આઉટગોઇંગ સરકારની રચનામાં મુખ્ય ભૂમિકા ભજવનાર યાયર લેપિડ શુક્રવારે મધ્યરાત્રિ પછી દેશના રખેવાળ વડાપ્રધાન બનશે. આ પદ સંભાળનાર તેઓ 14મા વ્યક્તિ હશે. આઉટગોઇંગ વડાપ્રધાન નફ્તાલી બેનેટ ઇઝરાયેલના ઇતિહાસમાં સૌથી ટૂંકા વડા પ્રધાન છે. તેમની સરકાર બન્યાના એક વર્ષ પછી જ પડી ગઈ.
ઈઝરાયલમાં હવે 1 નવેમ્બરે નવી ચૂંટણી યોજાશે. 2019 અને 2022 વચ્ચે આ પાંચમી ચૂંટણી હશે. નફતાલી બેનેટ સરકારમાં નંબર ટુ રહેલા યેર લેપિડને કેરટેકર સરકારની જવાબદારી સોંપવામાં આવી છે. થોડા દિવસો પહેલા એવું માનવામાં આવતું હતું કે પૂર્વ વડાપ્રધાન બેન્જામિન નેતન્યાહુ સમર્થન એકત્ર કરીને ફરીથી વડાપ્રધાન બની શકે છે. જો કે બાદમાં તેમણે એ પણ નક્કી કર્યું કે નવેસરથી ચૂંટણી યોજવી વધુ સારું રહેશે.
ઈઝરાયલના ઈતિહાસમાં સૌથી લાંબો 12 વર્ષ સુધી વડાપ્રધાન બેન્જામિન નેતન્યાહુને પદભ્રષ્ટ કર્યા બાદ બેનેટની સરકાર રચાઈ હતી. આ માટે અલગ-અલગ વિચારધારાના આઠ પક્ષો એક થયા હતા. સંસદ ભંગ કરવાના ઠરાવને 92 સભ્યોએ ટેકો આપ્યો હતો જ્યારે કોઈએ તેનો વિરોધ કર્યો ન હતો.
