વાપીમાં કરોડપતિ ચોર ઝડપાયો, લક્ઝરી લાઈફસ્ટાઈલ જોઈને ઓફિસર આશ્ચર્યચકિત થયા

• ચોર ચોરી કરવા માટે ફ્લાઈટમાં કરતો હતો મુસાફરી
• મુંબઈમાં એક કરોડથી વધુની કિંમતનો ફ્લેટ અને ઓડી કારમાં ફરતો
• ગુજરાત પોલીસે કરી રોહિત સોલંકી નામના યુવકની ધરપકડ

વાપી, 6 જુલાઈ: વાપીમાં 1 લાખ રૂપિયાની ચોરીના કેસમાં પોલીસે એક આરોપીની ધરપકડ કરી છે. જ્યારે પોલીસે તપાસ કરી તો અધિકારીઓ પણ ચોરની લક્ઝરી લાઈફસ્ટાઈલ વિશે જાણીને આશ્ચર્યચકિત થઈ ગયા હતા. પોલીસનું કહેવું છે કે આરોપી રોહિત સોલંકી લક્ઝુરિયસ હોટલમાં રહેતો હતો અને ફ્લાઈટમાં મુસાફરી કરતો હતો. ગુજરાત પોલીસનું કહેવું છે કે આરોપી રોહિત સોલંકીએ અનેક રાજ્યોમાં ચોરીની ઘટનાઓને અંજામ આપ્યો છે. ગત મહિને રોહિત કનુભાઇ સોલંકીએ વાપીમાં રૂ.1 લાખની ચોરીને અંજામ આપ્યો હતો. આ બાબતની ફરિયાદ મળ્યા બાદ પોલીસ ચોરને શોધવા અને તપાસમાં વ્યસ્ત થઈ ગઈ હતી.

ચોરે 19 ઘટનાઓને અંજામ આપ્યાનું કબૂલ્યું

વાપીના ચોરીના કેસમાં પોલીસે રોહિતની ધરપકડ કરી હતી. પોલીસે રોહિતની પૂછપરછ કરતાં પ્રકાશમાં આવ્યું કે રોહિત ચોરીના પૈસાથી વૈભવી જીવન જીવતો હતો. આરોપી રોહિતે ચોરીની 19 ઘટનાઓને અંજામ આપ્યાની કબૂલાત કરી છે. જેમાં વલસાડમાં ત્રણ, સુરતમાં એક, પોરબંદરમાં એક, સેલવાલમાં એક, તેલંગાણામાં બે, આંધ્રપ્રદેશમાં બે, મધ્યપ્રદેશમાં બે અને મહારાષ્ટ્રમાં એક ઘટના બની હતી.

મુસ્લિમ મહિલા સાથે લગ્ન કરવા માટે આરોપીએ નામ પણ બદલ્યું

આરોપી રોહિતે મહારાષ્ટ્ર અને મધ્યપ્રદેશમાં વધુ છ ચોરીઓ કર્યાની પણ કબૂલાત કરી હતી. તે ઘણા રાજ્યોમાં ગુનાનો ઈતિહાસ ધરાવે છે. પોલીસને એવું પણ જાણવા મળ્યું છે કે રોહિત સોલંકીએ મુસ્લિમ મહિલા સાથે લગ્ન કરવા માટે પોતાનું નામ બદલીને અરહાન રાખ્યું હતું.

ફ્લાઈટમાં ફરતો અને મોંઘી હોટલોમાં રહેતો

તપાસ દરમિયાન પોલીસને જાણવા મળ્યું કે રોહિત સોલંકીએ મુંબઈના મુંબ્રા વિસ્તારમાં 1 કરોડ રૂપિયાથી વધુની કિંમતનો આલીશાન ફ્લેટ લીધો હતો, જેમાં તે રહેતો હતો. આ સિવાય તે ઓડી કારમાં ફરતો હતો.

ડાન્સ બાર અને નાઈટ ક્લબનો શોખીન

વલસાડ પોલીસે જણાવ્યું હતું કે રોહિત લક્ઝરી હોટલમાં રહેતો હતો, ફ્લાઇટમાં મુસાફરી કરતો હતો અને ચોરી કરવા માટે હોટલમાં કેબ બુક કરતો હતો. ચોરી કરતા પહેલા તે સોસાયટીઓમાં જઈને દિવસ દરમિયાન રેકી કરતો હતો. પોલીસે જણાવ્યું કે આરોપી રોહિત મુંબઈના ડાન્સ બાર અને નાઈટ ક્લબમાં પાર્ટી કરવાનો શોખીન છે. તેને ડ્રગ્સની લત પણ છે. તે દર મહિને 1.50 લાખ રૂપિયા ખર્ચે છે.

આ પણ વાંચો: પાંચ વર્ષમાં રોજગારીની શું સ્થિતિ છે? MSME ક્ષેત્રમાં રોજગારીમાં કેટલો ઊછાળો આવ્યો? જાણો