PM મોદી જ બાંગ્લાદેશ અંગે નિર્ણય લેશે… વડાપ્રધાન સાથેની મુલાકાતમાં ટ્રમ્પે જાહેરાત કરી

વોશિંગ્ટન, 14 ફેબ્રુઆરી : વડાપ્રધાન નરેન્દ્ર મોદી હાલ અમેરિકાના પ્રવાસે છે. દરમિયાન ગુરુવારે પીએમ મોદી અને અમેરિકી પ્રમુખ ડોનાલ્ડ ટ્રમ્પની મુલાકાત થઈ હતી. આ દરમિયાન પ્રમુખ ટ્રમ્પે બાંગ્લાદેશમાં ચાલી રહેલા સંકટ અંગે કહ્યું કે, બાંગ્લાદેશ વિશે પીએમ મોદી નિર્ણય લેશે.

અમેરિકી પ્રમુખ ડોનાલ્ડ ટ્રમ્પે બાંગ્લાદેશમાં ચાલી રહેલા સંકટમાં અમેરિકાની કોઈપણ ભૂમિકાને નકારી કાઢી છે. તેમણે વધુમાં કહ્યું કે, પીએમ મોદી બાંગ્લાદેશ વિશે નિર્ણય લેશે. પીએમ મોદી અને યુએસ પ્રમુખ ડોનાલ્ડ ટ્રમ્પે વોશિંગ્ટનમાં દ્વિપક્ષીય બેઠક યોજી હતી જેમાં તેમણે વેપાર અને ભારત-અમેરિકા સંબંધો અંગે ચર્ચા કરી હતી.

બાંગ્લાદેશ વિશે શું કહ્યું?

હાલમાં પ્રમુખ ટ્રમ્પ રશિયા અને યુક્રેન વચ્ચેના યુદ્ધને ખતમ કરવામાં મહત્વની ભૂમિકા ભજવી રહ્યા છે. આ દરમિયાન જ્યારે બંને નેતાઓ પ્રેસ કોન્ફરન્સ કરી રહ્યા હતા. આ દરમિયાન તેમને રશિયા-યુક્રેન યુદ્ધની સાથે-સાથે બાંગ્લાદેશમાં ચાલી રહેલા સંકટ અંગે પણ સવાલો પૂછવામાં આવ્યા હતા. આ સવાલના જવાબમાં ડોનાલ્ડ ટ્રમ્પે કહ્યું કે, બાંગ્લાદેશના સંકટમાં અમેરિકા સામેલ નથી, તેમણે કહ્યું કે હું બાંગ્લાદેશના મુદ્દાને ઉકેલવા માટે પીએમ મોદી પર છોડી રહ્યો છું.

રશિયા-યુક્રેન યુદ્ધ પર ભારતનું વલણ

જ્યારે પીએમ મોદીને રશિયા-યુક્રેન યુદ્ધને સમાપ્ત કરવામાં ભારતની ભૂમિકા વિશે પૂછવામાં આવ્યું ત્યારે પીએમ મોદીએ કહ્યું, અમે આ યુદ્ધને સમાપ્ત કરવા માટે ટ્રમ્પની પહેલનું સમર્થન કરીએ છીએ. પીએમ મોદીએ વધુમાં કહ્યું કે, દુનિયા માને છે કે યુદ્ધ દરમિયાન ભારત નિષ્પક્ષ હતું, પરંતુ હું તમને બધાને કહેવા માંગુ છું કે ભારત નિષ્પક્ષ ન હતું, પરંતુ ભારત શાંતિના પક્ષમાં હતું. પીએમ મોદીએ કહ્યું કે, જ્યારે હું પ્રમુખ પુતિનને મળ્યો ત્યારે મેં એમ પણ કહ્યું હતું કે ‘આ યુદ્ધનો યુગ નથી. મેં એમ પણ કહ્યું હતું કે યુદ્ધના મેદાનમાં ઉકેલ શોધી શકાતો નથી, તે માત્ર વાતચીત દ્વારા જ શોધી શકાય છે.

બાંગ્લાદેશમાં કટોકટી

બાંગ્લાદેશમાં ગત વર્ષે થોડા સમય માટે વિદ્યાર્થીઓનું આંદોલન ચાલ્યું હતું, ત્યારબાદ આ આંદોલન એટલું હિંસક બની ગયું હતું કે તેને કારણે દેશમાં બળવો પણ થયો હતો. દેશના પૂર્વ પીએમ શેખ હસીનાએ બાંગ્લાદેશ છોડવું પડ્યું. આ સમયે દેશમાં કાયદો અને વ્યવસ્થા તૂટી ગઈ હતી અને ઘણા લોકો પર હુમલા થયા હતા.

બાંગ્લાદેશના વિદેશ મંત્રાલયે કહ્યું કે જો જરૂર પડશે તો ગયા વર્ષે હસીનાના પ્રત્યાર્પણની વિનંતી અંગે ભારતને રિમાઇન્ડર મોકલવામાં આવશે. વાસ્તવમાં બાંગ્લાદેશમાં તખ્તાપલટ બાદ શેખ હસીના ભારત પહોંચી ગયા હતા, ત્યારથી બાંગ્લાદેશ સતત તેના પ્રત્યાર્પણની વિનંતી કરી રહ્યું છે.

બાંગ્લાદેશ ભારત પાસે શું માંગે છે?

રાષ્ટ્રવાદી પાર્ટી (BNP)ના મહાસચિવ મિર્ઝા ફખરુલ ઇસ્લામ આલમગીરે એક પ્રેસ કોન્ફરન્સમાં જણાવ્યું હતું કે યુએનના અહેવાલમાં કહેવામાં આવ્યું છે કે દેશમાં હત્યાઓ, માનવાધિકારનું ઉલ્લંઘન અને લોકશાહી અને સંસ્થાઓનો વિનાશ શેખ હસીનાના આદેશ પર કરવામાં આવ્યો હતો અને અહેવાલ સાબિત કરે છે કે હસીના એક ફાસીવાદી છે જેણે આ દેશના લોકો પર અત્યાચાર ગુજાર્યો હતો અને માર્યો હતો. આલમગીરે વધુમાં જણાવ્યું હતું કે, અમે ભારત સરકારને શેખ હસીના અને તેના સહયોગીઓને તાત્કાલિક બાંગ્લાદેશ પરત લાવવા અને ટ્રાયલ માટે સરકારને સોંપવાની અપીલ કરીએ છીએ.

આ પણ વાંચો :- યુનિફોર્મ સિવિલ કોડની પહેલ હવે ગુજરાતમાં વેગ પકડી, દિલ્હીમાં ચર્ચાઓ અને બેઠકોનો દોર શરૂ થયો