અંતરિક્ષમાંથી કેવો દેખાય છે ભારત દેશ? ટૂંક સમયમાં હિન્દુસ્તાનમાં આવશે સુનીતા વિલિયમ્સ

નવી દિલ્હી, 1 એપ્રિલ 2025: ભારતીય મૂળના અમેરિકન અવકાશ વિજ્ઞાની સુનીતા વિલિયમ્સ અને બુચ વિલ્મોર 278 દિવસ સુધી અવકાશમાં ફસાયા બાદ પૃથ્વી પર પાછા ફર્યા હતા. અવકાશ વિજ્ઞાનીઓ પાછા ફર્યા પછી રિકવરી મોડમાં છે. આ દરમિયાન, મંગળવારે, બંને અવકાશયાત્રીઓ પહેલીવાર મીડિયા સામે આવ્યા અને તેમના પ્રશ્નોના જવાબ આપ્યા હતા. સુનીતા વિલિયમ્સે કહ્યું કે, પૃથ્વી પર આવ્યા પછી તેમને સારું લાગે છે.

મીડિયા પર્સનનો પ્રશ્ન: અંતરિક્ષમાંથી ભારત કેવું દેખાય છે? અને અનુભવ કેવો રહ્યો? આના જવાબમાં સુનીતા વિલિયમ્સે કહ્યું કે ભારત એક અદ્ભુત દેશ છે. દિવસ અને રાત બંને સમયે ભારત જોવાનો અનુભવ અવિશ્વસનીય હતો.

આંતરરાષ્ટ્રીય અવકાશ મથકની મુલાકાત લેનારા ભારતીય મૂળના નાસા અવકાશ વિજ્ઞાની સુનીતા વિલિયમ્સ 286 દિવસ પછી 19 માર્ચે પૃથ્વી પર પાછા ફર્યા હતા.

અવકાશમાંથી ભારત જોવાનું કેવું લાગે છે?

સુનીતાએ જવાબ આપ્યો કે અવકાશમાંથી ભારત જોવું અદ્ભુત છે. અમે જ્યારે પણ હિમાલય પાર કરતા, ત્યારે બુચે હિમાલયના અદ્ભુત ફોટોગ્રાફ્સ કેદ કર્યા છે. અવકાશમાંથી હિમાલયનો નજારો અદભુત છે. ત્યાંથી જોતાં એવું લાગતું હતું કે ભારતમાં મોજા ઉછળી રહ્યા છે અને નીચે તરફ વહી રહ્યા છે. જ્યારે તમે આટલી ઊંચાઈથી ભારતને જુઓ છો, ત્યારે તમને ભારતના ઘણા રંગો જોવા મળશે.

સુનિતા ટૂંક સમયમાં ભારત આવશે

સુનીતા વિલિયમ્સે કહ્યું કે તે ટૂંક સમયમાં ભારતની મુલાકાત લેશે. મીડિયાના પ્રશ્ન પર સુનીતાએ કહ્યું કે હું ચોક્કસ મારા પિતાના દેશ ભારત આવીશ. તેમણે એક્સિઓમ મિશનમાં ભારતની ભાગીદારીને ખૂબ જ મહત્વપૂર્ણ ગણાવી હતી.

સુનીતા કોને મળવા માંગે છે?

સુનીતા વિલિયમ્સે ભારતના અવકાશ કાર્યક્રમની પણ પ્રશંસા કરી અને કહ્યું કે તે ગ્રુપ કેપ્ટન શુભાંશુ શુક્લાને મળવાની આશા રાખે છે, જે ગગનયાન મિશનનો ભાગ છે અને ટૂંક સમયમાં બીજા ખાનગી અવકાશ કાર્યક્રમ – એક્સિઓમ-4 પર અવકાશમાં ઉડાન ભરશે.

આ પણ વાંચો: તિહાર જેલમાં કેદીઓ બની રહ્યા છે જ્ઞાની, ભણતરમાં 100 ટકાનો ઉછાળો આવ્યો