PM મોદીએ દિલ્હી પૂર અંગે LG સાથે વાત કરી, CM કેજરીવાલ ગ્રાઉન્ડ ઝીરો પર હશે
દેશની રાજધાની દિલ્હીમાં ભારે વરસાદ વચ્ચે યમુના નદીનું જળસ્તર ઐતિહાસિક ઊંચાઈએ પહોંચી ગયું છે. જેના કારણે સમગ્ર પાટનગર પાણી-પાણી થઇ ગયું. જો કે હવે નદીના પાણીના સ્તરમાં ઘટાડો થવા લાગ્યો છે, પરંતુ હજુ પણ ઘણા વિસ્તારોમાં પૂરની સ્થિતિ પ્રવર્તી રહી છે. બીજી તરફ શનિવારે રાત્રે પોતાના વિદેશ પ્રવાસ પરથી પરત ફરતા પીએમ મોદીએ એલજી વિનય સક્સેના સાથે પૂર અંગે ફોન પર વાત કરી હતી અને વધુ માહિતી મેળવી હતી. મુખ્યમંત્રી અરવિંદ કેજરીવાલ રવિવારે ગ્રાઉન્ડ ઝીરો પર જશે અને પરિસ્થિતિનો તાગ મેળવશે.
Immediately after arriving in Delhi, PM Narendra Modi spoke to LG VK Saxena about the status of the flood-like situation in Delhi due to the increase in the water level of Yamuna River and the progress achieved in mitigation: Source
— ANI (@ANI) July 15, 2023
શનિવારે રાજધાનીમાં યમુના નદીનું જળસ્તર ઘટવાનું શરૂ થઈ ગયું છે. મીડિયા રિપોર્ટ્સથી પ્રાપ્ત માહિતી અનુસાર, રાત્રે 10 વાગ્યા સુધી યમુનાનું જળસ્તર 206.87 મીટર પર પહોંચી ગયું છે. તમને જણાવી દઈએ કે પૂરની વચ્ચે શનિવારે સાંજે દિલ્હીમાં ભારે વરસાદ થયો હતો. હવામાન વિભાગે કહ્યું કે રવિવારે વરસાદની સંભાવના છે.
પીએમ મોદીએ એલજી સાથે વાત કરી
PM મોદી શનિવારે વિદેશથી દિલ્હી પરત ફર્યા બાદ તરત જ એલજી વી.કે. સક્સેના અને રાજધાનીમાં પૂરને પહોંચી વળવામાં થયેલી પ્રગતિ વિશે પૂછપરછ કરી હતી. જણાવી દઈએ કે પીએમ મોદી ફ્રાન્સ અને યુએઈની ત્રણ દિવસીય મુલાકાતેથી પરત ફર્યા છે. બીજી તરફ એલજી દિલ્હી વીકે સક્સેનાએ ટ્વીટ કર્યું કે પીએમ મોદીએ ઘરે પહોંચતાની સાથે જ ફોન કર્યો અને દિલ્હીમાં પૂરની સ્થિતિની વિગતવાર માહિતી લીધી અને થઈ રહેલા પ્રયાસોની સંપૂર્ણ માહિતી લીધી. તેમણે કેન્દ્ર અને રાજ્યના સહયોગથી લોકોના હિતમાં શક્ય તમામ કાર્યો કરવા નિર્દેશ આપ્યો છે.
દિલ્હીના અનેક વિસ્તારોમાં પૂરની સ્થિતિ
બીજી તરફ, શનિવારે યમુના નદીના જળસ્તરમાં ઘટાડો થયો હતો, પરંતુ દિલ્હીના ઘણા વિસ્તારોમાં પૂરની સ્થિતિ હજુ પણ યથાવત છે. જેમાં યમુના બજાર, લાલ કિલ્લો, આઈટીઓ, બેલા રોડ અને આસપાસના વિસ્તારોમાં હજુ પણ પાણી ભરાયેલા છે. હાલમાં NDRFની 16 ટીમો બચાવ કામગીરી માટે તૈનાત કરવામાં આવી છે.
વરસાદથી કોઈ રાહત નહીં મળે
ભારે વરસાદને કારણે પરિસ્થિતિ વધુ વણસી છે. આ સાથે IMDએ વરસાદની ચેતવણી જારી કરી છે. બીજી તરફ દેશભરના હવામાનની વાત કરીએ તો હિમાચલ, મધ્યપ્રદેશ, ઉત્તરાખંડ, ઉત્તર પ્રદેશ, પૂર્વ રાજસ્થાન સહિત લગભગ 20 રાજ્યોમાં આગામી 24 કલાકમાં ભારે વરસાદની સંભાવના છે.
