અમદાવાદઃ વડાપ્રધાન નરેન્દ્ર મોદી આજથી બે દિવસ ગુજરાત પ્રવાસે આવ્યા છે. આજે તેઓએ ઉત્તર ગુજરાતમાં કાર્યક્રમમાં હાજરી આપી હતી. તેઓએ માં અંબાના દર્શન કરી પૂજા અર્ચના કરી હતી. ત્યારબાદ તેઓ ગાંધીનગર પહોંચ્યા હતા અને ત્યાં તેમણે સોમનાથ ટ્રસ્ટની બેઠકમાં હાજરી આપી હતી. દરમિયાન તેઓ રાજ્યના મુખ્યમંત્રી ભૂપેન્દ્રભાઈ પટેલના પુત્રની ખબર પૂછવા માટે પહોંચ્યા હતા. ત્યાં તેમણે તેની તબિયતના સમાચાર પૂછ્યા હતા.
મુખ્યમંત્રીએ ટ્વિટર ઉપર ફોટો શેર કર્યો
વડાપ્રધાન મોદી મુખ્યમંત્રી ભૂપેન્દ્ર પટેલના પુત્રના ખબર અંતર પૂછવા માટે પહોંચ્યા હતા. આ અંગેનો ફોટો મુખ્યમંત્રીએ ટ્વિટરમાં શેર કર્યો હતો. જે ફોટો સાથે તેમણે વડાપ્રધાન નરેન્દ્ર મોદીનો આભાર વ્યક્ત કર્યો હતો.
અનુજ પટેલને બ્રેઈન હેમરેજ થયું હતું
ઉલ્લેખનીય છે કે ગત 30 એપ્રિલના રોજ મુખ્યમંત્રી ભૂપેન્દ્ર પટેલના પુત્ર અનુજ પટેલને અમદાવાદ ખાતેના તેમના નિવાસસ્થાને બ્રેઈન હેમરેજ થયું હતું. જેથી તેમની ખાનગી હોસ્પિટલમાં સારવાર માટે દાખલ કરવામાં આવ્યા હતા. દરમિયાન તેઓની તબિયત વધુ લથડતા મુંબઈ ખાતે એરલીફ્ટ કરવામાં આવ્યા હતા. ત્યાં લગભગ બે થી ત્રણ મહિનાની સારવાર બાદ તેઓને રજા આપી અમદાવાદ લઈ આવવામાં આવ્યા હતા.
