એનડીએ બચાવવા પીએમ મોદી અને અમિત શાહ સક્રિય, જાણો શું ચાલી રહી છે રાજકીય ગતિવિધિ?

• ભારતીય જનતા પાર્ટીની લોકસભા ચૂંટણી 2024માં પ્રચંડ બહુમતની આશાને મોટો ઝટકો લાગ્યો

નવી દિલ્હી, 4 જૂન: ભારતીય જનતા પાર્ટીની લોકસભા ચૂંટણી 2024માં પ્રચંડ બહુમતની આશાને મોટો ઝટકો લાગ્યો છે. ચૂંટણી પંચ દ્વારા જાહેર કરાયેલા તાજેતરના આંકડાઓ પર નજર કરવામાં આવે તો ભાજપ 240થી 250 બેઠકો પર ચૂંટણી જીતી રહ્યું હોય તેવું લાગી રહ્યું છે. જો કે ભાજપના નેતૃત્વમાં NDA ગઠબંધનને આસાન બહુમતી દેખાઈ રહ્યો છે. આ દરમિયાન વડા પ્રધાન નરેન્દ્ર મોદી અને ગૃહ પ્રધાન અમિત શાહે તેલુગુ દેશમ પાર્ટીના વડા ચંદ્રબાબુ નાયડુને ફોન કર્યો છે. NDA ગઠબંધનનો ભાગ બનેલી તેલુગુ દેશમ પાર્ટીએ આંધ્રપ્રદેશમાં યોજાયેલી લોકસભા અને વિધાનસભાની ચૂંટણીમાં શાનદાર પ્રદર્શન કર્યું છે.

વિજય માટે ચંદ્રબાબુ નાયડુને પાઠવ્યા અભિનંદન

NDA ગઠબંધનનો ભાગ બનેલી તેલુગુ દેશમ પાર્ટીએ આંધ્રપ્રદેશમાં યોજાયેલી લોકસભા અને વિધાનસભાની ચૂંટણીમાં શાનદાર પ્રદર્શન કર્યું છે. પીએમ મોદી અને અમિત શાહ બંનેએ ચંદ્રબાબુ નાયડુને આ જીત માટે અભિનંદન પાઠવ્યા છે. ઉલ્લેખનીય છે કે, જો ભાજપ લોકસભા ચૂંટણી 2024માં બહુમતથી દૂર રહે છે, તો સરકારની રચનામાં ચંદ્રબાબુ નાયડુની ભૂમિકા ખૂબ જ મહત્વપૂર્ણ બની રહેશે.

કોને કેટલી બેઠકો મળી?

આંધ્રપ્રદેશમાં 25 બેઠકો પર યોજાયેલી લોકસભા ચૂંટણીમાં તેલુગુ દેશમ પાર્ટી 16 બેઠકો પર આગળ ચાલી રહી છે. ભાજપ 3 સીટો પર અને પવન કલ્યાણની જનસેના પાર્ટી 2 સીટો પર લીડ ધરાવે છે. તે જ સમયે, જગન રેડ્ડીની YSRCP 4 બેઠકો પર આગળ છે. વિધાનસભા ચૂંટણીની વાત કરીએ તો તેલુગુ દેશમ પાર્ટી 132 સીટો પર, ભાજપ 7 અને જનસેના 20 સીટો પર લીડ ધરાવે છે. તે જ સમયે, વિરોધ પક્ષ YSRCP 15 બેઠકો પર આગળ છે.

આ પણ જુઓ: ચૂંટણી પરિણામ: શું નીતિશ કુમાર બનશે કિંગ મેકર? આંકડા કઈ બાજુ કરી રહ્યા છે ઈશારો?