પાકિસ્તાનની જનતા મોંઘવારીથી ત્રસ્ત છે. રોજબરોજની નાની નાની વસ્તુઓના ભાવ આસમાને છે. અગાઉ પાકિસ્તાન રોકડની સમસ્યાથી ઝઝૂમી રહ્યું હતું, પરંતુ હવે તેના પર વધુ એક નવું સંકટ આવવા લાગ્યું છે. આ વખતે ઈંધણના ભાવમાં ભારે વધારો થયો છે. પાકિસ્તાનના નાણા મંત્રી મિફ્તા ઈસ્માઈલે માહિતી આપી છે કે સરકાર હવે પેટ્રોલિયમ ઉત્પાદનો પર સબસિડીનો ખર્ચ ઉઠાવી શકશે નહીં. તેથી હવે લોકોએ પેટ્રોલ, ડીઝલ અને કેરોસીન તેલ મોંઘા ભાવે ખરીદવું પડશે. પાકિસ્તાન સરકારે પાકિસ્તાનમાં પેટ્રોલ પર ₹10/લિટર અને હાઈ-સ્પીડ ડીઝલ, કેરોસીન તેલ અને લાઇટ ડીઝલ પર ₹5/લિટરના દરે પેટ્રોલિયમ ફી વસૂલવાનો નિર્ણય કર્યો છે. ત્યારબાદ ઈંધણ અને પેટ્રોલિયમ ઉત્પાદનોના ભાવમાં નોંધપાત્ર વધારો થયો છે.
ભાવ સાતમા આસમાને
પાકિસ્તાનમાં 14.85 ₹/લિટરના વધારા બાદ પેટ્રોલ 248.74 ₹/લિટર થઈ ગયું છે. હાઈ-સ્પીડ ડીઝલના ભાવમાં ₹13.23 અને કેરોસીનના ભાવમાં ₹18.83/લિટરનો વધારો થયો છે. હવે પાકિસ્તાનમાં હાઈસ્પીડ ડીઝલ 276.54 ₹/લિટર અને કેરોસીન તેલ 230.26 ₹/લિટર થઈ ગયું છે.
4 મહિનામાં 4 વખત ભાવ વધારો
પાકિસ્તાનની શાહબાઝ શરીફ સરકારે પોતાના 4 મહિનાના કાર્યકાળમાં 4 વખત ઈંધણના દરમાં વધારો કર્યો છે. એવું માનવામાં આવે છે કે પાકિસ્તાન સરકાર દ્વારા આ પગલું ઇન્ટરનેશનલ મોનેટરી ફંડ (IMF) પાસેથી 6 અરબ ડોલરનું બેલઆઉટ પેકેજ મેળવવા માટે લેવામાં આવ્યું છે. IMFએ પાકિસ્તાન સરકાર સમક્ષ એક શરત મૂકી હતી કે જો તેને બેલઆઉટ પેકેજ જોઈતું હોય તો પેટ્રોલિયમ ઉત્પાદનો પરની સબસિડી દૂર કરવી પડશે અને ફી વસૂલવી પડશે. જાણકારોનું માનીએ તો હવે પાકિસ્તાનમાં વીજળીના ભાવ વધી શકે છે, કારણ કે IMFએ પાકિસ્તાન સરકાર સામે વીજળીના દર વધારવાની શરત મૂકી છે.
