‘કાયદો દરેક માટે સમાન’ પવન કલ્યાણે અલ્લુ અર્જુનની ધરપકડને યોગ્ય ઠેરવી, જાણો શું કહ્યું

• નાસભાગ કેસમાં પવન કલ્યાણે તેલંગાણા પોલીસને દોષિત ઠેરવવાનો ઇનકાર કર્યો

નવી દિલ્હી, 30 ડિસેમ્બર: ફિલ્મ ‘પુષ્પા 2’ના સ્ક્રિનિંગ દરમિયાન થયેલી નાસભાગ મામલે આંધ્રપ્રદેશના ઉપમુખ્યમંત્રી પવન કલ્યાણની એક મહત્ત્વપૂર્ણ ટિપ્પણી બહાર આવી છે. અભિનેતા અલ્લુ અર્જુન સામે કરવામાં આવેલી કાર્યવાહીને વાજબી ગણાવીને તેમણે તેલંગાણા પોલીસને દોષિત ઠેરવવાનો ઇનકાર કર્યો છે. આંધ્ર પ્રદેશના નાયબ મુખ્યમંત્રીએ કહ્યું કે, ‘કાયદો દરેક માટે સમાન છે અને પોલીસે લોકોની સુરક્ષાને ધ્યાનમાં રાખીને કામ કરવું જોઈએ.’ 4 ડિસેમ્બરે પુષ્પા 2ના સ્ક્રિનિંગ દરમિયાન સંધ્યા થિયેટરમાં થયેલી નાસભાગમાં એક મહિલાનું મૃત્યુ થયું હતું

આ દરમિયાન, NDA સાથી જનસેના પાર્ટીના નેતા અને આંધ્ર પ્રદેશના ડેપ્યુટી સીએમ પવન કલ્યાણે તેલંગાણાના મુખ્યમંત્રી રેવંત રેડ્ડીની પ્રશંસા કરી અને તેમને સારા નેતા ગણાવ્યા છે. તે જ સમયે, તેમણે સૂચવ્યું કે અભિનેતા અલ્લુ અર્જુને પ્રથમ નાસભાગમાં માર્યા ગયેલા મહિલાના પરિવારને મળવું જોઈએ.

અલ્લુ અર્જુન કેસમાં ડેપ્યુટી સીએમએ શું કહ્યું?

‘પુષ્પા 2’ના સ્ક્રિનિંગ દરમિયાન નાસભાગ મામલે મંગલગિરીમાં પત્રકારો સાથે વાત કરતા, આંધ્રપ્રદેશના ડેપ્યુટી સીએમ પવન કલ્યાણે કહ્યું કે, કાયદા અમલીકરણ અધિકારીઓ માટે જાહેર સલામતીને પ્રાધાન્ય આપવું મહત્ત્વપૂર્ણ છે. તેમણે ભારપૂર્વક કહ્યું કે, કાયદો દરેક માટે સમાન છે. આવી ઘટનાઓમાં પોલીસ સુરક્ષાને ધ્યાનમાં રાખીને કામ કરે છે. જોકે, થિયેટર સ્ટાફે અલ્લુ અર્જુનને પરિસ્થિતિ વિશે અગાઉથી જાણ કરી દેવી જોઈતી હતી. એકવાર જ્યારે તે પોતાની સીટ પર બેસી ગયા પછી, અરાજકતાને નિયંત્રિત કરવી મુશ્કેલ બની ગઈ.

નાસભાગમાં મહિલાએ જીવ ગુમાવ્યો હતો

મહત્ત્વપૂર્ણ છે કે, 4 ડિસેમ્બરે ‘પુષ્પા 2’ની સ્ક્રીનિંગ દરમિયાન નાસભાગ મચી ગઈ હતી. અરાજકતાના આ વાતાવરણમાં રેવતી નામની 35 વર્ષની મહિલાનું મૃત્યુ થયું હતું અને તેમનો પુત્ર ઘાયલ થયો હતો. આ ઘટના બાદ હૈદરાબાદ પોલીસે અલ્લુ અર્જુન વિરુદ્ધ કેસ નોંધીને તેની ધરપકડ કરી હતી. જોકે થોડા સમય બાદ તેને જામીન મળી ગયા હતા. બાદમાં, ફિલ્મના નિર્માતા અને અભિનેતા અલ્લુ અર્જુને પીડિત પરિવારને 2 કરોડ રૂપિયાની સહાયની રકમની જાહેરાત કરી હતી.

પવન કલ્યાણ અને અલ્લુ અર્જુન એકબીજાના સંબંધી

ઉલ્લેખનીય છે કે, આંધ્રપ્રદેશના ડેપ્યુટી સીએમ અને એક્ટર અલ્લુ અર્જુન સગા સંબંધી છે. અલ્લુ અર્જુનના આંટી સુરેખાબેનના લગ્ન પવન કલ્યાણના મોટા ભાઈ પ્રસિદ્ધ અભિનેતા ચિરંજીવી સાથે થયા છે. તે જ સમયે, જ્યારે પવન કલ્યાણને પૂછવામાં આવ્યું કે, અભિનેતા આવી ઘટનાઓને રોકવા માટે શું કરી શક્યા હોત, તો ડેપ્યુટી સીએમ પવન કલ્યાણે કહ્યું કે, અલ્લુ અર્જુન પહેલા પીડિતાના પરિવારનો સંપર્ક કર્યો હોત તો સારું હોત. તેનાથી તણાવ ઓછો થઈ શક્યો હોત.

આ પણ જૂઓ: અલ્લુ અર્જુનની મુશ્કેલી વધી, રેગ્યુલર જામીન અરજી પર 3 દિવસ પછી થશે નિર્ણય