હવે સંસદભવનની સુરક્ષા CISFના હાથમાં, 10 વર્ષ બાદ CRPFની વિદાય
- 2013થી સંસદ ભવનનું રક્ષણ કરી રહેલા લગભગ 1,400 જવાનો માટે શુક્રવાર ફરજનો છેલ્લો દિવસ હતો
- સંસદની સુરક્ષાની જવાબદારી CISFના જવાનોના હાથમાં
- 2023 માં સંસદ ભવનની સુરક્ષા ભંગ થયા બાદ કરાયો હતો નિર્ણય
નવી દિલ્હી,19 મે: સંસદની સુરક્ષા માટે સમર્પિત પાર્લામેન્ટ ડ્યુટી ગ્રુપ (PDG) ને તૈનાત કરવામાં, આયોજન કરવામાં અને તાલીમ આપવામાં લગભગ 13 વર્ષ લાગ્યાં. પરંતુ માત્ર 10 વર્ષ પછી વિસર્જન કરવામાં આવ્યું હતું. 2013થી સંસદ ભવનનું રક્ષણ કરી રહેલા લગભગ 1,400 જવાનો માટે શુક્રવાર ફરજનો છેલ્લો દિવસ હતો. હવે સંસદની સુરક્ષાની જવાબદારી કેન્દ્રીય ઔદ્યોગિક સુરક્ષા દળ (CISF)ના જવાનોના ખભા પર છે.
2023 માં સંસદ ભવનની સુરક્ષા ભંગ થયા બાદ, સંસદમાં સુરક્ષા ખામીઓની તપાસ સેન્ટ્રલ રિઝર્વ પોલીસ ફોર્સ (CRPF) ના મહાનિર્દેશક (DG) અનીશ દયાલ સિંહ અને અન્ય સુરક્ષા નિષ્ણાતોના નેતૃત્વ હેઠળ હાથ ધરવામાં આવી હતી, જેમાં સંસદ ભવનની સુરક્ષાનું પુનર્ગઠનની ભલામણ કરવામાં આવી હતી.
એક અધિકારીના જણાવ્યા અનુસાર , “અમે ઘણા લાંબા સમયથી સંસદ ભવનનું રક્ષણ કરી રહ્યા છીએ. પાંચ મહિનાની અંદર, બધું બદલાઈ ગયું અને સૈનિકોને તેમની ફરજો છોડીને નવી જગ્યાઓ શોધવા માટે કહેવામાં આવ્યું.
તેમણે વધુમાં કહ્યું, “ગયા વર્ષની સુરક્ષામાં ખામીની તપાસ કરવા માટેની સમિતિનું નેતૃત્વ ડીજી સીઆરપીએફ દ્વારા કરવામાં આવ્યું હતું, પરંતુ એવું નક્કી કરવામાં આવ્યું હતું કે ઇમારતની સુરક્ષા માટે સીઆરપીએફ કરતાં સેન્ટ્રલ ઈન્ડસ્ટ્રીયલ સિક્યુરિટી ફોર્સ (સીઆઈએસએફ) વધુ યોગ્ય છે.”
સૂત્રોએ જણાવ્યું કે CISF હવે PDG કરતા લગભગ 150% વધુ સૈનિકો સાથે સંસદ ભવનમાં તૈનાત છે. CRPF પાસે સંસ્થાઓ અને ઈમારતોની સુરક્ષામાં નિષ્ણાત ન હોવાથી CISFને પણ તૈનાત કરવાનો નિર્ણય લેવામાં આવ્યો હતો. CISFને દેશની તમામ મહત્વપૂર્ણ સંસ્થાઓ, દિલ્હી, મુંબઈ અને બેંગલુરુ સહિતના મુખ્ય એરપોર્ટ અને ગૃહ મંત્રાલય, નાણા મંત્રાલય વગેરેની ઇમારતો પર તૈનાત કરવામાં આવી છે.
