પેરિસ ઓલિમ્પિકઃ રમતોના મહાકુંભનું કાઉન્ટડાઉન શરૂ, જાણો કેવો હશે ઉદ્દઘાટન સમારંભ?

• ઓલિમ્પિક 2024નો ઉદ્ઘાટન સમારંભ 26 જુલાઈએ યોજાશે. આ વખતે ઓપનિંગ સેરેમની ખૂબ જ ખાસ બની રહી છે. ભારતમાં આ સમારંભ વહેલી પરોઢે 2:30 વાગ્યે જોઈ શકાશે

પેરિસ, 22 જુલાઈ: ફ્રાન્સની રાજધાની પેરિસ ઓલિમ્પિક 2024 માટે સંપૂર્ણ રીતે તૈયાર જોવા મળી રહી છે. આ વખતે ઓલિમ્પિક ગેમ્સમાં 10,500 ખેલાડીઓ ભાગ લઈ રહ્યા છે. પેરિસમાં આ તમામ ખેલાડીઓની તૈયારીઓ પૂર્ણ કરી દેવામાં આવી છે. ઓલિમ્પિકની શરૂઆત 26 જુલાઈએ ઉદ્ઘાટન સમારંભ સાથે થશે. આ વખતે ઓપનિંગ સેરેમની ખૂબ જ ખાસ બની રહી છે. ઓલિમ્પિકનો ઉદ્ઘાટન સમારંભ એકદમ અનોખો હશે. આ સમારંભ ઓલિમ્પિક ઈતિહાસની સૌથી યાદગાર ક્ષણોમાંનો એક હશે, જે એકદમ અલગ અંદાજમાં કરવામાં આવશે. આખી દુનિયાની નજર ઓલિમ્પિક ઓપનિંગ સેરેમની પર હશે. ફ્રાન્સ તેને ખાસ બનાવવા માટે તમામ પ્રયાસો કરી રહ્યું છે.

પેરિસ ઓલિમ્પિકનો ઉદઘાટન સમારંભ શા માટે છે ખાસ?

દરેક વખતે  ઓલિમ્પિકનો ઉદ્ઘાટન સમારંભ કોઈપણ સ્ટેડિયમમાં આયોજિત કરવામાં આવતો હતો, પરંતુ ઓલિમ્પિક ગેમ્સના ઈતિહાસમાં પ્રથમ વખત શહેરની મધ્યમાં સીન નદીના કિનારે ઉદ્ઘાટન સમારંભનું આયોજન કરવામાં આવ્યું છે. પેરિસ ઓલિમ્પિકમાં ઘણી નવી વસ્તુઓ જોવા મળશે. ઓલિમ્પિકમાં આવું ક્યારેય બન્યું નથી.

રમતવીરોની પરેડ અલગ જ અંદાજમાં યોજાશે

ઓલિમ્પિક્સ શરૂ થાય તે પહેલાં રમતવીરો શરૂઆતના સમારંભ દરમિયાન તેમના દેશના ધ્વજ સાથે પરેડમાં ભાગ લે છે. આ વખતે પણ એવું જ થશે, પરંતુ પ્રશ્ન એ છે કે નદીમાં આ પરેડનું આયોજન કેવી રીતે થશે? વાસ્તવમાં નવા સ્વરૂપમાં સીન નદી પર ખેલાડીઓની પરેડનું આયોજન કરવામાં આવશે, જેમાં દરેક દેશ માટે એક બોટ હશે. આ બોટ કેમેરાથી સજ્જ હશે જેથી કરીને ટેલિવિઝન અને ઓનલાઈન દર્શકો એથ્લેટ્સને નજીકથી જોઈ શકે. પૂર્વથી પશ્ચિમ તરફના આ રૂટ ઉપર  10,500 એથ્લેટ્સ પેરિસના હૃદયમાંથી પસાર થશે. આ પરેડ સીન નદી થઈને પૂર્વથી પશ્ચિમ સુધી 6 કિલોમીટર સુધી ચાલશે.

ઉદઘાટન સમારંભ માટે વિશેષ વ્યવસ્થા

ઓલિમ્પિકના ઈતિહાસમાં પ્રથમ વખત આ પ્રકારના સમારંભનું આયોજન કરવામાં આવી રહ્યું છે જેમાં વધુને વધુ લોકો ભાગ લઈ શકે છે. સમગ્ર શહેરમાં મૂકવામાં આવેલી 80 વિશાળ સ્ક્રીન અને સ્પીકર્સ દરેક વ્યક્તિને શોનો અનુભવ આપશે. પેરિસ ઓલિમ્પિક 2024નો ઉદ્ઘાટન સમારંભ ગેમ્સના ઈતિહાસમાં સૌથી મોટો સમારંભ હશે. તે બધા માટે ખુલ્લો રહેશે, જ્યાં પેરિસ અને તેના અલગ અલગ વિસ્તારના રહેવાસીઓ તેમજ સમગ્ર ફ્રાન્સ અને વિશ્વભરમાંથી ચાહકો આવશે. કરોડો લોકો ટીવી પર આ ખાસ ઓપનિંગ સેરેમની નિહાળશે.

આ પણ વાંચો: પેરિસ ઓલિમ્પિક પહેલા નીરજ ચોપરાની ફિટનેસને લઈને કોચે આપ્યું મોટું નિવેદન, જાણો શું કહ્યું