મેરી કૉમે જ્યારે ચાર કલાકમાં બે કિલો વજન ઉતારીને ગોલ્ડ મેડલ જીતી લીધો હતોઃ જાણો રોમાંચક ઘટના વિશે

નવી દિલ્હી – 7 ઓગસ્ટ  : 29 વર્ષની છોકરી. આખી રાત જાગતી રહી, સાયકલિંગ કરતી રહી, જોગિંગ કરતી રહી, દોરડા કૂદ્યા અને કંઈપણ ખાધા-પીધા વગર વજન ઘટાડવાનો પ્રયત્ન કરતી રહી. જ્યારે સવાર પડી ત્યારે તેને અસહ્ય દુઃખાવો થઈ રહ્યો હતો. પરંતુ તેને પ્રયાસ કરવાનો ચાલુ જ રાખ્યો. પછી તેનું વજન માપવામાં આવ્યું. વજનમાં પણ ઘટાડો થયો હતો પરંતુ તે જરૂરિયાત કરતા 150 ગ્રામ વધારે હતું અને પરિણામ એ આવ્યું કે છોકરી પેરિસ ઓલિમ્પિકમાંથી બહાર ફેંકાઈ ગઈ. તેનું દિલ તૂટી ગયું, આખા દેશનું દિલ તૂટી ગયું, કારણ કે આશા હતી કે આ 29 વર્ષની છોકરી વિનેશ ફોગાટ ભારત માટે ગોલ્ડ મેડલ લાવશે. પરંતુ હવે જ્યારે વિનેશ ફોગાટ ઓલિમ્પિકની રેસમાંથી બહાર થઈ ગઈ છે, ત્યારે અમને મેરી કોમની સ્ટોરી યાદ આવે છે, જ્યારે તેણે આવા જ સંજોગોમાં માત્ર ચાર કલાકમાં પોતાનું વજન બે કિલો ઘટાડ્યું હતું.

આ રીતે ઘટાડ્યું વજન

આ 15 સપ્ટેમ્બર, 2018ની વાત છે. પોલેન્ડમાં સિલેશિયન ઓપન બોક્સિંગ ટુર્નામેન્ટ ચાલી રહી હતી. અને ભારતીય બોક્સર અને પાંચ વખતની વર્લ્ડ ચેમ્પિયન મેરી કોમ પણ તે ટુર્નામેન્ટમાં ભાગ લેવાની હતી. ત્યારબાદ મેરી કોમે 48 કિલો વજનમાં બોક્સિંગ કરવાની હતી. પરંતુ મેચની શરૂઆત પહેલા મેરી કોમનું વજન 50 કિલો સુધી પહોંચી ગયું હતું. અને એક વખત એવું માનવામાં આવતું હતું કે મેરી કોમને ડિસક્વોલિફાય કરવામાં આવશે. પરંતુ આવું ન થયું કારણ કે મેરી કોમે ચાર કલાકમાં તેનું બે કિલો વજન ઘટાડ્યું હતું. આ માટે મેરી કોમે એક કલાક સુધી સતત દોરડા કુદયા હતા.

તે ઘટના અંગે મેરી કોમે જણાવ્યું હતું કે, “અમારી ફ્લાઈટ પોલેન્ડમાં સવારે 3.30 વાગ્યે લેન્ડ થઈ હતી. મારું વજન લગભગ 2 કિલો વધુ હતું. સવારે સાડા સાત વાગ્યે વજન થવાનું હતું. તેથી મારી પાસે લગભગ ચાર કલાક હતા. જો હું વજન ઘટાડું તો જ પાર્ટ લઈ શકું તેમ હતું.

ત્યારે મેરી કોમે વજન ઘટાડવાની પદ્ધતિ વિશે જણાવ્યું હતું કે તેણે એક કલાક સુધી સ્કિપિંગ અને સ્ટ્રેચિંગ કર્યું અને તે સ્પર્ધા માટે તૈયાર થઈ ગઈ. તે મેચમાં મેરી કોમે વજન ઘટાડ્યા બાદ જ પાર્ટ લીધો હતો સાથે જ કઝાકિસ્તાનની એઝેરીમને 5-0થી હરાવીને ગોલ્ડ મેડલ પણ જીત્યો હતો. પરંતુ વિનેશ ફોગાટ પેરિસ ઓલિમ્પિકમાં આ કરી શકી ન હતી. આખી રાત પ્રયાસ કર્યા પછી પણ વિનેશ ફોગાટનું વજન નિર્ધારિત મર્યાદા કરતા વધુ રહ્યું. જો કે, જો સ્પર્ધાનો આ પહેલો દિવસ હોત તો કદાચ વિનેશ કંઈક કરી શકી હોત. કારણ કે કોઈપણ રેસલરને પહેલા દિવસે વજન ઉતારવા માટે 30 મિનિટનો સમય આપવામાં આવે છે. અને આ સમય દરમિયાન તે પોતાનું વજન વધારી કે ઘટાડી શકે છે. પરંતુ બીજા દિવસે વજન કરવા માટે માત્ર 15 મિનિટનો સમય મળે છે.

વિનેશની સ્પર્ધાનો માત્ર બીજો દિવસ હતો, તેથી તેને પણ વજન માટે માત્ર 15 મિનિટ મળી. અને તેનું વજન નિર્ધારિત ધોરણ કરતા વધુ હોવાનું જણાયું હતું. પરિણામ એ આવ્યું કે તેને ઓલિમ્પિકમાંથી ડિસક્વોલિફાય કરવામાં આવી. આ સમાચાર સાંભળીને વિનેશની હિંમત તૂટી ગઈ. તે બીમાર પડી અને તેને હોસ્પિટલમાં દાખલ કરવી પડી હવે આખો દેશ તેની સાથે છે. ઓલિમ્પિકમાંથી બહાર હોવા છતાં વિનેશે ઓલિમ્પિકમાં જે હિંમત બતાવી છે તે આવનારી પેઢીઓ માટે ઉદાહરણરૂપ છે.

આ પણ વાંચો : વિનેશ ફોગાટે એક જ રાતમાં ઘટાડ્યું 1થી 1.5 કિલો વજન, ઝડપથી વજન ઘટાડવું કેટલું યોગ્ય?