ચૂંટણી પહેલા ધાનાણીની ભાજપ નેતાઓ સાથે ‘ચાય પે ચર્ચા’

ગુજરાત વિધાનસભાની ચૂંટણીને આડે હવે ગણતરીના કલાકો બાકી છે. ચૂંટણી પહેલા જ્યાં એક બાજુ રાજકીટ પક્ષો વચ્ચે આક્ષેપ-પ્રત્યાક્ષેપ કરવામાં આવી રહ્યા છે, ત્યારે તંદુરસ્ત રાજકારણની આ અદભૂત તસવીરો સામે આવી છે.

આ બધાની વચ્ચે ચોંકાવનારા દ્રશ્યો અમરેલીથી સામે આવ્યા છે. હાલમાં સોશિયલ મીડિયા પર એક વિડીયો વાયરલ થઈ રહ્યો છે, જે વિડીયોમાં દિલીપ સંધાણી, પુરુષોત્તમ રૂપાલા, ગોરધન ઝડફિયા અને અમરેલી વિધાનસભા કોંગ્રેસના ઉમેદવાર પરેશ ધાનાણી પણ જોવા મળી રહ્યા છે. હાલમાં આ વિડીયો વાયરલ થયા અનેક અટકળો તેજ બની ગઈ છે.

ભાજપના નેતાઓ સાથે ધાનાણીએ પીધી ચા

ગુજરાતમાં પ્રથમ તબક્કાની ચૂંટણી પ્રચારના અંતિમ દિવસે અમરેલીમાં કોંગ્રેસના ઉમેદવાર પરેશ ધાનાણીએ ભાજપના કાર્યાલયની મુલાકાત લીધી હતી. ધાનાણીએ કાર્યાલયમાં ભાજપના સીનિયર નેતા પુરુષોત્તમ રૂપાલાના આશીર્વાદ પણ લીધા હતા અને અન્ય કાર્યકરો સાથે મુલાકાત કરીને ત્યાં જ ચાની ચુસ્કી માણી હતી.

ચૂંટણી પ્રચારના છેલ્લા દિવસે રાજકીય દાવ પેચ ભૂલી ચાની ચુસ્કી સાથે હળવાશની પળો માણતા ભાજપ કોંગ્રેસના દિગ્ગજ નેતાઓ જોવા મળ્યા હતા. અમરેલી જિલ્લાના તંદુરસ્ત રાજકારણની આ અદ્ભુત તસવીરોએ સામે આવતા જ તેની પ્રશંસા થવા લાગી હતી.

ગુજરાતમાં પ્રથમ તબક્કાનું મતદાન 1 ડિસેમ્બરે અને બીજા તબક્કાનું મતદાન 5 ડિસેમ્બરે થવાનું છે. ગુજરાત વિધાનસભાની ચૂંટણીનું પરિણામ 8 ડિસેમ્બરે જાહેર થશે અને સાથે જ હિમાચલ પ્રદેશની ચૂંટણીનું પરિણામ પણ 8 ડિસેમ્બરે જાહેર કરવામાં આવશે.