પાક. ચૂંટણી : નવાઝ શરીફ સામે પૂર્વ વિદેશમંત્રી બિલાવલ ભુટ્ટો હશે PM પદના ઉમેદવાર, PPPની જાહેરાત
પાકિસ્તાનમાં આવતા વર્ષે સામાન્ય ચૂંટણી યોજાવાની છે. આ અંગે પાકિસ્તાન પીપલ્સ પાર્ટીએ જાહેરાત કરી છે કે પાર્ટી પ્રમુખ બિલાવલ ભુટ્ટો ઝરદારી 8 ફેબ્રુઆરીએ યોજાનારી સામાન્ય ચૂંટણીમાં વડાપ્રધાન પદના ઉમેદવાર હશે. તેમના પિતા આસિફ અલી ઝરદારી રાષ્ટ્રપતિ પદના ઉમેદવાર હશે. આ જાહેરાત ત્યારે કરવામાં આવી છે જ્યારે પાકિસ્તાન મુસ્લિમ લીગ-નવાઝ પાર્ટી (PML-N) એ પહેલાથી જ જાહેરાત કરી હતી કે પાર્ટીના વડા અને ત્રણ વખતના ભૂતપૂર્વ વડા પ્રધાન નવાઝ શરીફ પીએમ પદના ઉમેદવાર હશે.
પીપીપીના ઇન્ફોર્મેશન સેક્રેટરી ફૈઝલ કરીમ કુંડીએ કહ્યું કે બિલાવલ ભુટ્ટો વડાપ્રધાન પદના ઉમેદવાર હશે અને અમારી ઈચ્છા 2008નું પુનરાવર્તન કરીને આસિફ ઝરદારીને રાષ્ટ્રપતિ બનાવવાની છે. 68 વર્ષીય ઝરદારી 2008માં યોજાયેલી ચૂંટણી બાદ પાકિસ્તાનના રાષ્ટ્રપતિ બન્યા હતા. તેઓ 2013 સુધી આ પદ પર રહ્યા હતા. જ્યારે 35 વર્ષીય બિલાવલ ભુટ્ટોએ એપ્રિલ 2022 થી ઓગસ્ટ 2023 સુધી વિદેશ મંત્રી પદ સંભાળ્યું હતું. કરીમ કુંડીએ કહ્યું કે ચૂંટણી 8મી ફેબ્રુઆરીથી વધુ લંબાવવી જોઈએ નહીં. એમ પણ કહ્યું કે પીપીપી ચૂંટણી માટે સંપૂર્ણ રીતે તૈયાર છે.
હાલમાં જ પાકિસ્તાન પીપલ્સ પાર્ટીના અધ્યક્ષ બિલાવલ ભુટ્ટો ઝરદારીએ કહ્યું હતું કે દેશના આગામી વડાપ્રધાન લાહોરથી નહીં હોય. એવું માનવામાં આવે છે કે આવું કહીને તેણે નવાઝ શરીફ પર નિશાન સાધ્યું હતું, જે લાહોરના રહેવાસી છે. પાકિસ્તાનમાં ચૂંટણી પહેલા સમીકરણો ઝડપથી બદલાઈ રહ્યા છે. એક તરફ બિલાવલે સંકેત આપ્યા છે કે તેમની પાર્ટી આવતા વર્ષે પોતાના દમ પર ચૂંટણી લડશે. તેમની પાર્ટી પીપીપીને ચૂંટણી જીતવા માટે બીજા કોઈની મદદની જરૂર નથી.
ઉલ્લેખનીય છે કે, પાકિસ્તાન બહુપક્ષીય સંસદીય લોકશાહી છે. વડા પ્રધાન અને રાષ્ટ્રપતિની ચૂંટણી પક્ષ દ્વારા જીતેલી બેઠકોની સંખ્યા પર આધારિત છે. વડા પ્રધાન અથવા રાષ્ટ્રપતિનું નામાંકન મતદારોને એ જાણવામાં મદદ કરે છે કે પીએમ અને રાષ્ટ્રપતિ પદની રેસમાં કોણ છે.
