ત્રિપુરામાં ચૂંટણી બાદ હિંસાના આરોપોની તપાસ કરવા ગયેલા વિપક્ષી સાંસદો પર હુમલો, કારમાં તોડફોડ
ત્રિપુરાના અગરતલામાં શુક્રવારે અશાંતિના અહેવાલો સામે આવ્યા છે. કોંગ્રેસે આરોપ લગાવ્યો છે કે રાજ્યમાં ચૂંટણી પછીની હિંસાના આરોપોની તપાસ માટે બે દિવસની મુલાકાતે ગયેલા સાંસદોની ટીમ પર હુમલો કરવામાં આવ્યો હતો. એટલું જ નહીં બદમાશોએ નેતાઓની ગાડીઓમાં પણ તોડફોડ કરી હતી. ડાબેરીઓએ તેમના નિવેદનમાં કહ્યું છે કે કોંગ્રેસ અને સીપીઆઈ (એમ) સાંસદો જે આ ટીમનો ભાગ હતા તેઓએ હંગામા પછી તરત જ સ્થળ પરથી ભાગીને હુમલાથી પોતાનો જીવ બચાવવો પડ્યો હતો. અહેવાલો કહે છે કે સાંસદ ત્રિપુરાના સિપાહીજાલા જિલ્લાના બિશાલગઢ ગયા હતા, જ્યાંથી ચૂંટણી પછી જ હિંસાના અહેવાલો સામે આવ્યા હતા. અહીં જ કેટલાક લોકોએ તેમના પર હુમલો કર્યો હતો અને ત્રણ વાહનોમાં તોડફોડ કરી હતી.
ઘટના અંગે પોલીસે શું કહ્યું?
આ ઘટનાની પુષ્ટિ કરતા અગરતલા પોલીસે કહ્યું કે તેમના પર સિપાહીજાલા જિલ્લામાં હુમલો કરવામાં આવ્યો હતો. આ પછી રાજકીય વાતાવરણ ગરમાયું છે. દરમિયાન, સીપીઆઈ(એમ) એ કહ્યું છે કે સંસદીય પ્રતિનિધિમંડળની મુલાકાત હાલ પુરતી મુલતવી રાખવાનો નિર્ણય લેવામાં આવ્યો છે. આસિસ્ટન્ટ ઈન્સ્પેક્ટર જનરલ (AIG) જ્યોતિષમાન દાસ ચૌધરીએ કહ્યું કે હુમલામાં તમામ સાંસદો સુરક્ષિત છે. તેમણે કહ્યું કે આ મામલે એક વ્યક્તિની અટકાયત કરવામાં આવી છે. આ સાથે ફેક્ટ ફાઇન્ડિંગ ટીમ દ્વારા ઉપયોગમાં લેવાતા કેટલાક વાહનોને અજાણ્યા બદમાશોએ નુકસાન પહોંચાડ્યું હતું.
જયરામ રમેશે આ ઘટનાનો વીડિયો શેર કર્યો
કોંગ્રેસ નેતા જયરામ રમેશે આ ઘટનાનો વીડિયો પણ શેર કર્યો છે. તેમણે ટ્વીટમાં લખ્યું, “ત્રિપુરાના મોહનપુર અને બિશાલગઢમાં કોંગ્રેસના નેતાઓ પર ભાજપના લોકો દ્વારા હુમલો કરવામાં આવ્યો. પાર્ટીની સાથે રહેલા પોલીસકર્મીઓએ કંઈ કર્યું નહીં. શનિવારે અહીં ભાજપ વિજય રેલી કાઢવા જઈ રહી છે. આ પાર્ટી પ્રાયોજિત હિંસા એક વિજય છે.”
સંસદીય પ્રતિનિધિમંડળની મુલાકાત મુલતવી
દરમિયાન, CPI(M) ના રાજ્ય સચિવ જિતેન્દ્ર ચૌધરીએ શુક્રવારે મોડી રાત્રે જણાવ્યું હતું કે કોંગ્રેસ અને CPI(M) ના સંસદીય પ્રતિનિધિમંડળની મુલાકાત હાલ પૂરતી સ્થગિત કરવાનો નિર્ણય લેવામાં આવ્યો છે. સાંજે વિશાલગઢના નેહલચંદ્ર નગર માર્કેટમાં સંસદીય પ્રતિનિધિઓના જૂથ પર હુમલો કરવામાં આવ્યો હતો. સીપીએમ અને કોંગ્રેસ નેતૃત્વએ આરોપ લગાવ્યો કે પોલીસની હાજરીમાં આ ભયાનક હુમલો થયો.
