‘INDIA’ ગઠબંધનનો મહત્વનો નિર્ણય, વિપક્ષી પાર્ટીઓના નેતાઓ આવતા સપ્તાહે મણિપુરની મુલાકાત લઈ શકે

મણિપુરમાં હિંસા વચ્ચે બે મહિલાઓ સાથે બર્બરતાનો વીડિયો વાયરલ થયો હતો. આ વીડિયોએ અનેક સવાલો ઉભા કર્યા છે અને વિપક્ષ સરકાર પર પ્રહારો કરી રહ્યો છે. દરમિયાન સૂત્રોએ જણાવ્યું કે વિપક્ષી ગઠબંધન ‘INDIA’ (ઈન્ડિયન નેશનલ ડેવલપમેન્ટલ ઈન્ક્લુઝિવ એલાયન્સ)ના નેતા આવતા સપ્તાહના અંતમાં મણિપુર જઈ શકે છે. તારીખ પર અંતિમ નિર્ણય 24 જુલાઈએ સંસદમાં વિપક્ષી દળોની બેઠકમાં લેવામાં આવી શકે છે.

પશ્ચિમ બંગાળના મુખ્યમંત્રી મમતા બેનર્જીએ પણ મણિપુર જવાનો સંકેત આપ્યો છે. તૃણમૂલ કોંગ્રેસ (TMC)ના વડા બેનર્જીએ જણાવ્યું હતું કે તેઓ રાજ્યની મુલાકાત લેવા માટે અન્ય રાજ્યોના મુખ્ય પ્રધાનો સાથે વાતચીત કરી રહ્યા છે.

સૂત્રોના જણાવ્યા અનુસાર, તેમણે દિલ્હીના સીએમ અરવિંદ કેજરીવાલ સાથે પણ મણિપુર જવા અંગે વાત કરી હતી.

‘INDIA’માં વિરોધ પક્ષોના ગઠબંધનમાં કયા પક્ષો?

‘INDIA’ના વિરોધ પક્ષોના ગઠબંધનમાં કોંગ્રેસ, TMC, AAP, JDU, શરદ પવારની NCP, ભૂતપૂર્વ CM ઉદ્ધવ ઠાકરેની શિવસેના, મુખ્યમંત્રી MK સ્ટાલિનની DMK, ડાબેરીઓ, ઝારખંડના CM હેમંત સોરેનની JMM અને RJD સહિત 26 પક્ષો છે.

મણિપુરમાં ચાર લોકોની ધરપકડ

મણિપુરમાં બુધવારે બે મહિલાઓને નગ્ન કરીને પરેડ કરવાનો વીડિયો સામે આવ્યો છે. પોલીસના જણાવ્યા અનુસાર આ મામલો 4 મેનો છે. આ ઘટના સંદર્ભે પોલીસે ચાર લોકોની ધરપકડ કરી છે.

પોલીસે ધરપકડ કરેલા ચાર પૈકી એક વિશે જણાવ્યું હતું કે તે બી. ફેનોમ ગામમાં બનેલી ઘટનામાં સામેલ ભીડનો એક ભાગ હતો. વીડિયોમાં તે પીડિત મહિલામાંથી એકને ખેંચતો જોઈ શકાય છે.

પોલીસે વધુમાં જણાવ્યું કે આ વ્યક્તિની થૌબલ જિલ્લામાંથી ધરપકડ કરવામાં આવી છે અને તેની ઓળખ 32 વર્ષીય હુઈરેમ હેરાદાસ સિંહ તરીકે થઈ છે. તે જ સમયે, રાજ્ય અને કેન્દ્ર સરકાર કહી રહી છે કે આ કેસમાં દોષિતોને છોડવામાં આવશે નહીં.

મણિપુરમાં હિંસા ક્યારે શરૂ થઈ?

3 મેના રોજ, Meitei સમુદાયે મણિપુરમાં અનુસૂચિત જનજાતિના દરજ્જાની માંગ સાથે આદિવાસી એકતા માર્ચ કાઢી હતી, પરંતુ આ દરમિયાન રાજ્યમાં હિંસા ફાટી નીકળી હતી. ત્યારથી અત્યાર સુધીમાં 150 થી વધુ લોકોએ જીવ ગુમાવ્યા છે અને ઘણા લોકો ઘાયલ થયા છે.

રાજ્યમાં Meitei સમુદાયની વસ્તી લગભગ 53 ટકા છે. તે જ સમયે, નાગા અને કુકી સમુદાયના આદિવાસીઓની વસ્તી 40 ટકા છે.