પશ્ચિમ બંગાળમાં વિપક્ષી નેતા નવા ગવર્નરના શપથ ગ્રહણ સમારોહ છોડી ચાલ્યા ગયા, આપ્યું આ કારણ 

તાજેતરમાં પશ્ચિમ બંગાળમાં નવા રાજ્યપાલની નિમણુંક કરવામાં આવી હતી. ત્યારે આજે તેમનો શપથ ગ્રહણ કાર્યક્રમ યોજાયો હતો. જો કે વિપક્ષના નેતા શુભેન્દુ અધિકારીએ બુધવારે નવા ગવર્નર આનંદ બોઝના શપથ ગ્રહણ સમારોહમાં ભાગ લીધો ન હતો. તેમણે આરોપ લગાવ્યો કે ટીએમસી સરકારે ગયા વર્ષની વિધાનસભા ચૂંટણી પછી ભાજપમાંથી સત્તાધારી પક્ષમાં આવેલા બે ધારાસભ્યોની બાજુમાં બેઠક આપીને તેમનું અપમાન કર્યું.

ટીએમસી સરકાર ઉપર બદલાની રાજનીતિનો આરોપ

ભાજપના નેતા અધિકારીએ એવો પણ દાવો કર્યો હતો કે ટીએમસી સરકાર બદલાની રાજનીતિમાં સામેલ છે કારણ કે તે હજુ સુધી નંદીગ્રામમાં મુખ્યમંત્રી મમતા બેનર્જીની હારમાંથી બહાર આવવાની બાકી છે. વધુમાં તેમણે કહ્યું હતું કે, શપથ ગ્રહણ સમારોહમાં મને અને ભાજપને અપમાનિત કરવા માટે, મને બે ધારાસભ્યોની બાજુમાં બેઠક આપવામાં આવી હતી જેઓ ગયા વર્ષે ભાજપની ટિકિટ પર ચૂંટણી જીત્યા હતા અને બાદમાં ભગવા છાવણીના ધારાસભ્ય તરીકે રાજીનામું આપ્યું હતું.

સરકારે વિપક્ષના નેતાની ખુરશીનો અનાદર કર્યો 

વધુમાં અધિકારીએ પત્રકારોને જણાવ્યું હતું કે, આ ટીએમસી સરકાર બદલાની રીતે કામ કરી રહી છે. નંદીગ્રામમાં ટીએમસી સુપ્રીમો મારી સામે હારી ગયા એ હકીકત હજુ પચાવવાની બાકી છે. સરકારે શિષ્ટાચાર જાળવ્યો ન હતો અને વિપક્ષના નેતાની ખુરશીનો અનાદર કર્યો હતો. તેથી જ મેં કાર્યક્રમ છોડી દીધો.