શ્રીલંકામાં પણ પાકિસ્તાનની જેમ રાજકીય ઉથલપાથલ થાય તેવી શક્યતા, વિપક્ષનો બહુમતીનો દાવો

કોલંબોઃ તાજેતરમાં પાકિસ્તાનના રાજકારણમાં હંગામો થયો હતો. આખરે ત્યાંની સરકાર પડી ભાંગી હતી અને નવી સરકાર બનાવવામાં આવી હતી. આ દરમિયાન હવે આર્થિક સંકટનો સામનો કરી રહેલા શ્રીલંકામાં પણ રાજકીય હલચલ વધી ગઈ છે. રાષ્ટ્રપતિ ગોટાબાયા રાજપક્ષેના પક્ષના બળવાખોર સાંસદે દાવો કર્યો છે કે, 225 સભ્યોની સંસદમાં સરકાર સામે અવિશ્વાસ પ્રસ્તાવ જીતવા માટે વિપક્ષ પાસે 113નો આંકડો જરૂરી છે.

વિશ્વાસનો મત મળવાનો દાવોઃ સાંસદ
હકીકતમાં શ્રીલંકાની સરકારમાં સામેલ બળવાખોર સાંસદ ઉદય ગમનાપિલાએ સોમવારે આ દાવો કર્યો છે. ગમનાપિલાએ જણાવ્યું હતું કે, ‘સરકાર અને મુખ્ય વિપક્ષ સામગી જન બલવેગયા (SJB), માર્ક્સવાદી જનતા વિક્મુતિ પેરામુના (JVP) અને તમિલ નેશનલ એલાયન્સ (TNA) સાથેના સંબંધો તોડવાના કારણે આ શક્ય બની શકે છે. આ બધાના સમર્થનથી વિપક્ષને વિશ્વાસનો મત મળશે.’

રાજપક્ષેએ ઉદયને બરતરફ કર્યો હતો
તેણે કહ્યું કે અમે SJBને કહ્યું કે, ‘અમને 113 મળે ત્યાં સુધી રાહ જુઓ. પરંતુ અત્યારે અમારી પાસે 120 છે. SJB એ એપ્રિલની શરૂઆતમાં સરકાર સામે અવિશ્વાસની દરખાસ્ત લાવવા માટે હસ્તાક્ષર એકત્રિત કરવાનું શરૂ કર્યું.’ આ એ જ ઉદય ગમનાપિલા છે જેમણે તત્કાલીન નાણામંત્રી અને રાષ્ટ્રપતિના નાના ભાઈ બાસિલ રાજપક્ષેની ખુલ્લેઆમ ટીકા કરી હતી. ત્યારપછી તેને રાજપક્ષેએ બરતરફ કર્યો હતો.

રાષ્ટ્રપતિ પદ છોડીશ નહીં: ગોટાબાયા
રાષ્ટ્રપતિ ગોટાબાયા દેશની સૌથી ખરાબ આર્થિક કટોકટીનું સંચાલન કરવા બદલ તેમની સરકાર સામે ઉગ્ર જાહેર વિરોધનો સામનો કરી રહ્યા છે. તેમણે કહ્યું છે કે, તેઓ કોઈપણ જૂથને સરકાર સોંપશે જે 113 બેઠકો મેળવી શકે છે, પરંતુ રાષ્ટ્રપતિ પદ છોડશે નહીં. આ દરમિયાન બૌદ્ધ પાદરીઓને લખેલા પત્રમાં રાષ્ટ્રપતિ ગોટાબાયા રાજપક્ષેએ કહ્યું કે, તેઓ પાદરીઓની સલાહને માન આપે છે.

વિદ્યાર્થીઓએ વિરોધ પ્રદર્શન કર્યું
શ્રીલંકાના લોકો સતત સરકાર સામે વિરોધ પ્રદર્શન કરી રહ્યા છે. રવિવારે પણ વિદ્યાર્થીઓએ વડાપ્રધાન મહિન્દા રાજપક્ષેના ઘરનો ઘેરાવ કર્યો હતો. યુનિવર્સિટીના વિદ્યાર્થીઓ મોટી સંખ્યામાં ઘેરાવમાં આવ્યા હતા. તેઓ વડાપ્રધાનના રાજીનામાની માંગ કરી રહ્યા હતા. શ્રીલંકામાં લોકો વીજળી, પાણી અને ખોરાક માટે સંઘર્ષ કરી રહ્યા છે. આ સિવાય સરકાર પાસે વિદેશી હૂંડિયામણની ભારે અછત છે. આવી સ્થિતિમાં ઈંધણની પણ આયાત થઈ રહી નથી.

સ્થિતિ વધુ બગડે તેવી શક્યતાઃ વિદેશ મંત્રી
આ સિવાય દેશમાં આ સમયે ખાદ્યપદાર્થોની મોટી કટોકટી છે. દેશના વિદેશ મંત્રી અલી સાબરીએ પણ કહ્યું કે ત્યાંની આર્થિક સ્થિતિ વધુ બગડી શકે છે. તમને જણાવી દઈએ કે શ્રીલંકામાં સમગ્ર કેબિનેટે રાજીનામું આપી દીધું હતું. બાદમાં ગોટાબાયા રાજપક્ષે દ્વારા નવા મંત્રીમંડળની રચના કરવામાં આવી હતી.