મણિપુર મુદ્દે કેન્દ્ર સરકાર સામે વિપક્ષ લાવી શકે છે અવિશ્વાસ પ્રસ્તાવ, ‘INDIA’ની બેઠકમાં લેવાયો નિર્ણય
મોનસૂન સત્રઃ મણિપુર મુદ્દે સંસદમાં ચાલી રહેલી મડાગાંઠ ઘટવાને બદલે વધી રહી છે. આ દરમિયાન સમાચાર આવ્યા છે કે વિપક્ષ કેન્દ્ર સરકાર સામે અવિશ્વાસ પ્રસ્તાવ લાવી શકે છે. સૂત્રોના જણાવ્યા અનુસાર વિપક્ષી ગઠબંધન ‘INDIA’ની બેઠકમાં નિર્ણય લેવામાં આવ્યો છે. બેઠકમાં એ પણ નક્કી કરવામાં આવ્યું હતું કે વિપક્ષ મણિપુરના મુદ્દા પર ગૃહમાં પીએમના નિવેદનની માંગ પર અડગ રહેશે.
મણિપુરના મુદ્દે છેલ્લા ઘણા દિવસોથી હંગામો ચાલી રહ્યો છે. સંસદના ચોમાસું સત્ર શરૂ થવાના એક દિવસ પહેલા 4 મેના રોજ મહિલાઓને નગ્ન કરીને પરેડ કરવાનો વીડિયો વાયરલ થયા બાદ મણિપુરમાં રાજકારણ ગરમાયું છે. વિપક્ષી પાર્ટીઓ મણિપુર મુદ્દે વડાપ્રધાન નરેન્દ્ર મોદીના નિવેદનની માંગ કરી રહ્યા છે. જોકે, 20 જુલાઈના રોજ સત્રની શરૂઆત પહેલા સંસદની બહાર તેમના સંબોધનમાં વડાપ્રધાને મણિપુરમાં બનેલી ઘટનાને શરમજનક ગણાવી હતી અને ગુનેગારોને સખત સજા કરવાની હાકલ કરી હતી. પરંતુ વિપક્ષનું કહેવું છે કે પીએમ ગૃહની અંદર નિવેદન આપે.
મંગળવારે વિરોધ પક્ષોની બેઠક
મણિપુરના મુદ્દા પર ચર્ચાને લઈને સંસદમાં રોજેરોજ હંગામો થઈ રહ્યો છે, જેના કારણે એક દિવસ પણ કામ યોગ્ય રીતે થઈ શક્યું નથી. મંગળવારે (25 જુલાઈ) આ મુદ્દે વિપક્ષી ગઠબંધન ‘INDIA’માં સામેલ પક્ષોની બેઠક યોજાઈ હતી. સૂત્રોના જણાવ્યા અનુસાર આ બેઠકમાં તમામ પક્ષોએ અવિશ્વાસ પ્રસ્તાવ લાવવાનો નિર્ણય કર્યો હતો. આ સાથે વિપક્ષી દળોએ પણ બંને ગૃહોમાં વડાપ્રધાન નરેન્દ્ર મોદીના નિવેદનની માંગણી ચાલુ રાખવાનો નિર્ણય લીધો છે.
પીએમએ જવાબ આપવો પડશે – સંજય સિંહ
સંસદ ભવન પરિસરમાં ધરણા પર બેઠેલા આમ આદમી પાર્ટીના સાંસદ સંજય સિંહે કહ્યું કે જ્યાં સુધી વડાપ્રધાન જવાબ નહીં આપે ત્યાં સુધી મડાગાંઠ આવી જ રહેશે, પીએમને જવાબ આપવો પડશે. સંજય સિંહને સોમવારે રાજ્યસભાના ચેરમેન જગદીપ ધનખરે બાકીના સત્ર માટે સસ્પેન્ડ કરી દીધા હતા.
AAPના રાજ્યસભા સાંસદ રાઘવ ચઢ્ઢાએ કહ્યું, “મણિપુરની ઘટના હૃદયદ્રાવક છે. વડાપ્રધાને મન કી બાતને બદલે મણિપુર વિશે વાત કરવી જોઈએ. સરકારે ચર્ચા કરવી જોઈએ. વિશ્વની તમામ સંસદો મણિપુર પર ચર્ચા કરવા માટે ગંભીર છે. ભારતની સંસદમાં તેની ચર્ચા કેમ નથી થઈ રહી.” AAP સાંસદે મણિપુરમાં રાષ્ટ્રપતિ શાસન લાદવાની માંગ કરી હતી.
આ પણ વાંચો-સંસદમાં મણિપુર પર હોબાળો યથાવત રહેવાની સંભાવના; ભાજપાએ બોલાવી પાર્લામેન્ટરી બેઠક
