ઓલિમ્પિક : મનુ એક ઓલિમ્પિકમાં બે મેડલ જીતનાર પ્રથમ ભારતીય બની, મિક્સ્ડ ડબલ્સ શૂટિંગમાં બ્રોન્ઝ જીત્યો

પેરિસ, 30 જુલાઈ : ભારતની સ્ટાર શૂટર મનુ ભાકરે પેરિસ ઓલિમ્પિક 2024માં ઈતિહાસ રચ્યો છે. તે ઓલિમ્પિકમાં બે મેડલ જીતનારી દેશની પ્રથમ મહિલા શૂટર બની ગઈ છે. તેણે અગાઉ મહિલાઓની વ્યક્તિગત 10 મીટર એર પિસ્તોલની ફાઇનલમાં બ્રોન્ઝ મેડલ જીત્યો હતો. હવે મનુએ આજે મંગળવારે સરબજોત સિંહ સાથે મિક્સ્ડ ટીમ 10 મીટર એર પિસ્તોલ ફાઇનલમાં ભારત માટે વધુ એક બ્રોન્ઝ મેડલ જીતીને ઇતિહાસ રચ્યો છે. વધુ એક બ્રોન્ઝ મેડલ જીતીને, મનુ એક જ ઓલિમ્પિક ગેમ્સમાં બે મેડલ જીતનારી સ્વતંત્ર ભારતની પ્રથમ એથ્લેટ બની છે.

ભારત બ્રિટિશ શાસન હેઠળ હતું ત્યારે બન્યું હતું આવું

મનુ પહેલા નોર્મન પ્રિચાર્ડે 1900ની ગેમ્સ દરમિયાન એથ્લેટિક્સમાં બે સિલ્વર મેડલ જીત્યા હતા. ત્યારે ભારત બ્રિટિશ શાસન હેઠળ હતું. પ્રિચાર્ડ પછી, કોઈપણ ભારતીય એથ્લેટ એક જ ઓલિમ્પિકમાં બે મેડલ જીતવામાં સફળ રહ્યો ન હતો. જોકે, કેટલાક ભારતીય એથ્લેટ્સ એવા છે જેમણે પોતાની કારકિર્દીમાં ઓલિમ્પિક ગેમ્સમાં કુલ બે મેડલ જીત્યા છે. જેમાં સુશીલ કુમાર (કુસ્તી) અને પીવી સિંધુ (બેડમિન્ટન)નો સમાવેશ થાય છે. સુશીલે લંડન 2012માં સિલ્વર મેડલ જીત્યા પહેલા બેઇજિંગ 2008 ગેમ્સમાં બ્રોન્ઝ મેડલ જીત્યો હતો. આમ કરવાથી, તે બે અલગ-અલગ ઓલિમ્પિકમાં એકથી વધુ મેડલ જીતનાર આઝાદી પછી ભારતનો પ્રથમ વ્યક્તિગત રમતવીર બન્યો હતો.

આ પણ વાંચો : IAS પૂજા ખેડકરની મુશ્કેલી વધી, હવે કેન્દ્ર સરકારે પણ મોકલી કારણદર્શક નોટિસ

ઓલિમ્પિક ગેમ્સમાં બહુવિધ મેડલ જીતનારી સિંધુ ભારતની એકમાત્ર મહિલા એથ્લેટ

બેડમિન્ટન ખેલાડી સિંધુએ રિયો ઓલિમ્પિકમાં સિલ્વર મેડલ જીત્યો હતો. ત્યાર બાદ તે ફાઇનલમાં સ્પેનની કેરોલિના મારિન સામે હારી ગઈ હતી. ઓલિમ્પિક બેડમિન્ટનમાં ભારતે સિલ્વર મેડલ જીત્યો હોય તેવો આ પ્રથમ કિસ્સો હતો. સિંધુએ પાછળથી ટોક્યો 2020માં બ્રોન્ઝ મેડલ જીત્યો હતો. ઓલિમ્પિક ગેમ્સમાં બહુવિધ મેડલ જીતનારી સિંધુ ભારતની એકમાત્ર મહિલા એથ્લેટ છે. જો કે, તેણે બે અલગ-અલગ સંસ્કરણોમાં આવું કર્યું હતું.

આઝાદી પછી એક જ ઓલિમ્પિક ગેમ્સમાં બે મેડલ જીતનારી પ્રથમ ભારતીય

મનુનો મામલો સુશીલ અને સિંધુથી તદ્દન અલગ છે કારણ કે તે આઝાદી પછી એક જ ઓલિમ્પિક ગેમ્સમાં બે મેડલ જીતનારી પ્રથમ ભારતીય બની છે. બ્રોન્ઝ મેડલ મેચમાં મનુ ભાકર અને સરબજોત સિંહનો મુકાબલો ઓહ યે જિન અને લી વોન્હોની કોરિયન જોડી સામે થયો હતો. મનુ અને સરબજોત ક્વોલિફાયરમાં 580 પોઈન્ટ સાથે ત્રીજા સ્થાને રહ્યા હતા, જ્યારે કોરિયન જોડી 579 પોઈન્ટ સાથે ચોથા ક્રમે રહી હતી. મનુ અને સરબજોતે આ મેચ 16-10ના માર્જીનથી જીતી હતી.

આ પણ વાંચો : મુંબઈની 16 વર્ષીય જિયાએ રચ્યો ઈતિહાસ, ઈંગ્લિશ ચેનલ પાર કરનાર વિશ્વની સૌથી નાની અને ઝડપી પેરા સ્વિમર બની