એલોન મસ્ક હવે મંત્રી પણ બની શકે છે, ટ્રમ્પે તેમને કેબિનેટ પદ આપવાની કરી જાહેરાત
- વિશ્વના સૌથી ધનિક વ્યક્તિ એલોન મસ્ક હવે નવી રાજકીય ભૂમિકામાં જોવા મળી શકે છે
વૉશિંગ્ટન, 20 ઑગસ્ટ: વિશ્વના સૌથી ધનિક વ્યક્તિ એલોન મસ્ક હવે નવી રાજકીય ભૂમિકામાં જોવા મળી શકે છે. તાજેતરમાં અમેરિકી પ્રમુખ પદના ઉમેદવાર ડોનાલ્ડ ટ્રમ્પે જો તેઓ જીતે તો તેમને કેબિનેટ પદ આપવા અથવા વ્હાઇટ હાઉસમાં સલાહકાર બનાવવાની ઓફર કરી છે. અહીં, એલોન મસ્ક પણ નવી ભૂમિકા માટે તૈયાર લાગે છે. અમેરિકામાં નવેમ્બરમાં ચૂંટણી યોજાવાની છે. ટ્રમ્પની મુખ્ય સ્પર્ધા ડેમોક્રેટ ઉમેદવાર કમલા હેરિસ સાથે છે.
I am willing to serve pic.twitter.com/BJhGbcA2e0
— Elon Musk (@elonmusk) August 20, 2024
ટ્રમ્પે શું કહ્યું, તેના પર મસ્કે શું પ્રતિક્રિયા આપી?
રોઇટર્સ સાથે વાત કરતા ડોનાલ્ડ ટ્રમ્પને પૂછવામાં આવ્યું હતું કે, શું તેઓ મસ્ક માટે સલાહકારની ભૂમિકા કે કેબિનેટ પદ પર વિચાર કરશે. જેના પર તેમણે કહ્યું કે, “તે ખૂબ જ સ્માર્ટ છે. જો લોકો મને જીત અપાવશે તો હું ચોક્કસપણે આ કામ કરીશ. તે ખૂબ જ બુદ્ધિશાળી વ્યક્તિ છે.” આ સિવાય ટ્રમ્પે ઇલેક્ટ્રિક વાહનોની ખરીદી પર $7500ની ટેક્સ ક્રેડિટ નાબૂદ કરવાનું પણ કહ્યું છે. જો કે, તેમણે કહ્યું કે, તેઓ આ અંગે ‘અંતિમ નિર્ણય’ લઈ રહ્યા નથી.
Perfect name https://t.co/qOUblToy7v
— Elon Musk (@elonmusk) August 20, 2024
જ્યારે બીજી બાજુ મસ્કે પોતાના વિભાગ વિશે પણ સંકેત આપ્યો છે. મંગળવારે, તેમણે એક પોસ્ટ કરીને લખ્યું કે, ‘હું સેવા આપવા માટે તૈયાર છું.’ તેમણે તેમના એક ફોટો પણ પોસ્ટ કર્યો હતો જેમાં લખ્યું હતું કે , ‘ડિપાર્ટમેન્ટ ઓફ ગવર્નમેન્ટ એફિસિયન્સી અથવા DOGE’
કમલા હેરિસની લોકપ્રિયતા વધી
અમેરિકી ઉપપ્રમુખ કમલા હેરિસ ડેમોક્રેટિક પાર્ટીના રાષ્ટ્રીય અધિવેશનમાં ખૂબ જ ઉત્સાહ અને અમેરિકનોમાં તેમની લોકપ્રિયતાના વધારા વચ્ચે હાજરી આપશે. એસોસિએટેડ પ્રેસ-એનઓઆરસી સેન્ટર ફોર પબ્લિક અફેર્સ રિસર્ચના નવા મતદાન અનુસાર, અમેરિકાના લગભગ અડધા પુખ્ત વયના લોકો (48 ટકા) કમલા હેરિસ પ્રત્યે ખૂબ જ અથવા કંઈક અંશે અનુકૂળ દૃષ્ટિકોણ ધરાવે છે.
ઉનાળાની શરૂઆતમાં, આવા અમેરિકનોની સંખ્યા 39 ટકા હતી, તેથી હવે તેમાં વધારો થયો છે. ભૂતપૂર્વ પ્રમુખ ડોનાલ્ડ ટ્રમ્પ સાથેની ડિબેટમાં નબળા પ્રદર્શન પછી જો બાઈડને આખરે પ્રમુખની ચૂંટણીની ઉમેદવારીમાંથી ખસી જવું પડ્યું.
ટ્રમ્પ પાછળ રહી ગયા
કમલા હેરિસે માત્ર તેની લોકપ્રિયતામાં સુધારો જ કર્યો નથી પરંતુ ડેમોક્રેટિક પાર્ટીના ઉમેદવાર તરીકે બાઈડનને પણ પાછળ છોડી દીધા છે, જેમના વિશે 38 ટકા અમેરિકનોએ અનુકૂળ અભિપ્રાય આપ્યો હતો. આ સિવાય કમલા હેરિસ ટ્રમ્પથી પણ આગળ છે, જેમના વિશે 40 ટકાથી વધુ પુખ્ત વયના લોકોનો અભિપ્રાય અનુકૂળ છે. ડેમોક્રેટિક પાર્ટીનું રાષ્ટ્રીય અધિવેશન સોમવારથી શરૂ થઈ રહ્યું છે.
