એક, બે નહીં પરંતુ 100 બાળકોના ‘પિતા’ છે ટેલિગ્રામના CEO, પોતે જ કર્યો ચોંકાવનારો ખુલાસો

નવી દિલ્હી, 31 જુલાઈ : ટેલિગ્રામના સંસ્થાપક પાવેલ દુરોવે ચોંકાવનારો ખુલાસો કર્યો છે. પાવેલ દુરોવના જણાવ્યા અનુસાર, તે એક કે બે નહીં પરંતુ 100 બાળકોના બાયોલોજીકલ પિતા છે. પાવેલે તેની ટેલિગ્રામ પોસ્ટ પર આ અંગેની માહિતી આપી હતી. તેણે કહ્યું કે મારા 12 દેશોમાં સ્પર્મ ડોનેશન દ્વારા સોથી વધુ બાળકો છે. એટલું જ નહીં, પાવેલ દુરોવે આ અંગે એક લાંબી પોસ્ટ કરી છે.

આ પણ વાંચો : હમાસ ચીફ ઈસ્માઈલ હાનિયાની હત્યા, 24 કલાકમાં ઈઝરાયેલના બે મોટા દુશ્મનોનો ખાત્મો

’15 વર્ષ પહેલા શરૂ થઈ કહાની’

પાવેલ દુરોવ ટેલિગ્રામ પર કહે છે કે મને જાણવા મળ્યું છે કે મારી પાસે 100થી વધુ બાયોલોજીકલ બાળકો છે. જે વ્યક્તિએ ક્યારેય લગ્ન કર્યા નથી અને એકલા રહેવાનું પસંદ કરે છે તેના માટે આ કેવી રીતે શક્ય છે. એટલું જ નહીં તેણે કહ્યું કે 15 વર્ષ પહેલા સ્પર્મ ડોનર બનવાની કહાની શરૂ થઈ હતી.

મિત્રે સ્પર્મ ડોનેટ કરવાનું કહ્યું

ટેલિગ્રામ પર પોસ્ટ કરતા પાવેલ લખે છે કે, 15 વર્ષ પહેલા તેના એક મિત્રની પત્નીને ગર્ભધારણ કરવામાં મુશ્કેલી પડી રહી હતી, ત્યારબાદ મિત્રએ મને સ્પર્મ ડોનેટ કરવાની વિનંતી કરી. જ્યારે તેનો મિત્ર તેને સ્પર્મ ડોનેટ કરવા માટે ક્લિનિક લઈ જઈ રહ્યો હતો ત્યારે તેને કહેવામાં આવ્યું કે તેના સ્પર્મ સારી ગુણવત્તાના છે, જે તેના મિત્રને મદદ કરી શકે છે. દુરોવને આ વાત અજીબ લાગી પરંતુ તે સ્પર્મ ડોનેટ કરવા માટે રાજી થઈ ગયો.

“મને ડોનર બનવાનો કોઈ અફસોસ નથી”

પાવેલ દુરોવે આગળ લખ્યું કે તેણે પછીથી સ્પર્મ ડોનેટ કરવાનું બંધ કરી દીધું, પરંતુ હાલમાં 12 દેશોમાં તેના 100 થી વધુ બાયોલોજીકલ બાળકો છે. તેણે કહ્યું કે હવે હું મારા ડીએનએને ઓપન સોર્સ કરવાની યોજના બનાવી રહ્યો છું જેથી મારા બાયોલોજીકલ બાળકો એકબીજાને સરળતાથી શોધી શકે. પાવેલે આગળ લખ્યું કે હું જાણું છું કે આ એક જોખમી કામ છે, પરંતુ મને ડોનર બનવાનો કોઈ અફસોસ નથી. કારણ કે તંદુરસ્ત શુક્રાણુનો અભાવ સમગ્ર વિશ્વમાં એક ગંભીર મુદ્દો બની ગયો છે અને મને ગર્વ છે કે મેં આ પગલું ભર્યું છે.

આ પણ વાંચો : ઓલિમ્પિક્સ દિવસ-5 : મણિકા બત્રા તેના અભિયાનને આગળ વધારવા મેદાનમાં ઉતરશે, લવલીના વિજયી શરૂઆત કરવા માંગશે