કોહલી-બુમરાહ કે હાર્દિક નહીં, પરંતુ રોહિત શર્માએ આ ત્રણ દિગ્ગજોને T20 વર્લ્ડ કપ જીતનો શ્રેય આપ્યો
- રોહિત શર્માએ બાર્બાડોસમાં T20 વર્લ્ડ કપની જીત સાથે સૌથી ટૂંકા ફોર્મેટમાં તેની કારકિર્દીનો અંત કર્યો હતો
નવી દિલ્હી, 22 ઓગસ્ટ: રોહિત શર્માના નેતૃત્વમાં ભારતે જૂનમાં અમેરિકા અને વેસ્ટ ઈન્ડિઝમાં રમાયેલી T20 વર્લ્ડ કપની ફાઇનલમાં દક્ષિણ આફ્રિકાને હરાવીને ICC T20 વર્લ્ડ કપ જીત્યો હતો. 2007 પછી આ ભારતનું બીજું T20 વર્લ્ડ ટાઇટલ હતું અને રોહિત શર્માએ બાર્બાડોસમાં તે જીત સાથે સૌથી ટૂંકા ફોર્મેટમાં તેની કારકિર્દીનો અંત કર્યો હતો. હવે ભારતીય ટીમના કેપ્ટન રોહિત શર્માએ બુધવારે કહ્યું કે, “ભૂતપૂર્વ મુખ્ય કોચ રાહુલ દ્રવિડ, પસંદગી સમિતિના અધ્યક્ષ અજીત અગરકર અને ભારતીય ક્રિકેટ કંટ્રોલ બોર્ડ (BCCI)ના સચિવ જય શાહે પરિણામોની ચિંતા કર્યા વિના ખેલાડીઓ પાસેથી શ્રેષ્ઠ પ્રદર્શન મેળવવાના તેમના પ્રયાસોમાં તેનો સંપૂર્ણ સાથ આપ્યો જેના પરિણામે ભારતે તેમના નેતૃત્વમાં T20 વર્લ્ડ કપ જીત્યો.”
મને મારા ત્રણ સ્તંભોથી ઘણી મદદ મળી: રોહિત શર્મા
રોહિત શર્માએ એક કાર્યક્રમમાં વર્ષના સર્વશ્રેષ્ઠ પુરુષ આંતરરાષ્ટ્રીય ક્રિકેટર તરીકે પસંદ થયાં બાદ કહ્યું કે, ” આ ટીમમાં ફેરફાર કરવો અને આંકડાઓ, પરિણામો વિશે વધુ ચિંતા ન કરવી, એ સુનિશ્ચિત કરવાનું મારું સપનું હતું કે અમે એવું વાતાવરણ ઊભું કરીએ કે જ્યાં લોકો મેદાનમાં જઈને વધુ વિચાર્યા વિના ખૂલીને રમે. જેની જરૂરિયાત હતી. મને મારા ત્રણ સ્તંભોથી ઘણી મદદ મળી જે હકીકતમાં જય શાહ, રાહુલ દ્રવિડ અને પસંદગી સમિતિના અધ્યક્ષ અજીત અગરકર છે. મેં જે કર્યું તે મારા માટે ખૂબ જ મહત્ત્વપૂર્ણ હતું અને અલબત્ત તે ખેલાડીઓને પણ ભૂલવા ન જોઈએ જેઓ અલગ-અલગ સમયે આવ્યા હતા અને અમે જે હાંસલ કર્યું હતું તે હાંસલ કરવામાં ટીમને મદદ કરી હતી.
‘વર્લ્ડ કપ જીતવાની લાગણી શબ્દોમાં વ્યક્ત કરી શકાતી નથી’
રોહિતે કહ્યું કે, વર્લ્ડ કપ જીતવો એ એક એવી બાબત છે જે ક્યારેય શબ્દોમાં વ્યક્ત કરી શકાતી નથી. તે એક લાગણી હતી જે દરરોજ થતી નથી. જ્યારે અમે વર્લ્ડ કપ જીત્યો, ત્યારે અમારા બધા માટે તે ક્ષણનો આનંદ માણવો મહત્ત્વપૂર્ણ હતો, જે અમે ખૂબ જ સારી રીતે કર્યું અને અમારી સાથે ઉજવણી કરવા બદલ અમારા દેશનો પણ આભાર. જેટલું આ અમારા માટે મહત્ત્વનું છે, તેટલું જ સમગ્ર દેશ માટે પણ મહત્ત્વનું છે. તેને(વર્લ્ડ કપ) ઘરે પાછું લાવીને અને અહીં દરેક સાથે ઉજવણી કરીને ખૂબ જ સારું લાગ્યું.
આ પણ જૂઓ: એડમ ગિલક્રિસ્ટે પસંદ કર્યા ક્રિકેટની દુનિયાના 3 શ્રેષ્ઠ વિકેટકીપર, જૂઓ કોને મળ્યું સ્થાન
