લોકસભા ચૂંટણીની 102 બેઠકો માટે નોમિનેશન શરૂ, પ્રથમ તબક્કા માટે જાહેરનામું બહાર પડ્યું

• 17 રાજ્યો અને ચાર કેન્દ્રશાસિત પ્રદેશોના ઉમેદવારો માટે નોમિનેશન ભરવાની છેલ્લી તારીખ 27 માર્ચ

નવી દિલ્હી, 20 માર્ચ: લોકસભા ચૂંટણી 2024ના પ્રથમ તબક્કા માટે નોટિફિકેશન બહાર પાડવામાં આવ્યું છે. ઉલ્લેખનીય છે કે, આ તબક્કામાં 17 રાજ્યો અને ચાર કેન્દ્રશાસિત પ્રદેશોની 102 બેઠકો પર ચૂંટણી યોજાશે. આ સાથે આ તમામ 102 બેઠકો પર ઉમેદવારોના નામાંકન ભરવાની પ્રક્રિયા પણ શરૂ થઈ ગઈ છે. ઉલ્લેખનીય છે કે, ચૂંટણી પંચ દ્વારા 16 માર્ચે ચૂંટણીની જાહેરાત કરવામાં આવી હતી, જે અંતર્ગત સમગ્ર દેશમાં 7 તબક્કામાં મતદાન પ્રક્રિયા પૂર્ણ થશે.

રાષ્ટ્રપતિવતી ચૂંટણી પંચ દ્વારા જારી કરવામાં આવેલા નોટિફિકેશન મુજબ, ઉમેદવારી પત્ર ભરવાની છેલ્લી તારીખ 27 માર્ચ છે. જો કે, બિહારમાં પ્રથમ તબક્કામાં જે લોકસભા બેઠકો માટે મતદાન થવાનું છે, તેના માટે ઉમેદવારી નોંધાવવાની છેલ્લી તારીખ તહેવારને કારણે લંબાવીને 28 માર્ચ કરવામાં આવી છે. બિહારમાં લોકસભાની 40માંથી 4 બેઠકો પર પ્રથમ તબક્કામાં મતદાન થશે. 28મી માર્ચે ઉમેદવારી પત્રોની ચકાસણી કરવામાં આવશે. બિહાર માટે આ તારીખ 30 માર્ચ છે. નામાંકન પરત ખેંચવાની છેલ્લી તારીખ 30 માર્ચ છે, જ્યારે બિહારમાં પ્રથમ તબક્કાની ચાર બેઠકો માટે નામાંકન પરત ખેંચવાની પ્રક્રિયા 2 એપ્રિલ સુધી ચાલુ રહેશે.

દેશની લોકસભાની 543 બેઠકો માટે સાત તબક્કામાં મતદાન

દેશની 543 બેઠકો માટે 19 એપ્રિલ, 26 એપ્રિલ, 7 મે, 13 મે, 20 મે, 25 મે અને 1 જૂનના રોજ મતદાન થશે. 19 એપ્રિલે પ્રથમ તબક્કામાં 102 બેઠકો, 26 એપ્રિલે બીજા તબક્કામાં 89 બેઠકો, 7 મેના રોજ ત્રીજા તબક્કામાં 94 બેઠકો, 13 મેના રોજ ચોથા તબક્કામાં 96 બેઠકો, 20 મેના રોજ પાંચમા તબક્કામાં 49 બેઠકો, છઠ્ઠા તબક્કામાં 25 મેના રોજ મતદાન થશે. 57 બેઠકો પર મતદાન થશે અને સાતમા અને અંતિમ તબક્કામાં 1 જૂને 57 બેઠકો પર મતદાન થશે.

કયા-કયા રાજ્યોમાં પ્રથમ તબક્કામાં મતદાન યોજાશે?

ઉલ્લેખનીય છે કે, 19 એપ્રિલે યોજાનારી પ્રથમ તબક્કામાં તામિલનાડુમાંથી 29, ઉત્તર પ્રદેશમાંથી 8, રાજસ્થાનમાંથી 12, ઉત્તરાખંડમાંથી 5, અરુણાચલ પ્રદેશમાંથી 2, આસામમાંથી 5, બિહારમાંથી 4, છત્તીસગઢમાંથી 1, મધ્ય પ્રદેશમાંથી 6, મહારાષ્ટ્રમાંથી 6, મણિપુરમાં 5, મેઘાલયમાં 2, મિઝોરમમાં 1, નાગાલેન્ડમાં 1, સિક્કિમમાં 1, ત્રિપુરામાં 1, પશ્ચિમ બંગાળમાં 3, આંદામાન અને નિકોબારમાં 1, જમ્મુ અને કાશ્મીરમાં 1-1, લક્ષદ્વીપમાં 1 અને પુડુચેરીમાં 1 બેઠક પર મતદાન થશે.

દેશભરમાં 10.5 લાખ મતદાન કેન્દ્રો બનાવવામાં આવશે

ચૂંટણી માટે દેશભરમાં 10.5 લાખ મતદાન મથકો બનાવવામાં આવી રહ્યા છે. ચૂંટણી પંચ મતદાન માટે સંપૂર્ણ રીતે તૈયાર છે અને તમામ મતદારોને મતદાન કરવા અપીલ કરી છે. મુખ્ય ચૂંટણી કમિશનરે કહ્યું કે, ચૂંટણી પંચ એવી રીતે લોકસભાની ચૂંટણી કરાવવાનું વચન આપે છે કે જેથી વૈશ્વિક મંચ પર ભારતની વિશ્વસનીયતા વધુ વધારી શકાય. ચૂંટણી પંચે મૂલ્યાંકન બાદ તમામ રાજ્યોમાં મુક્ત અને નિષ્પક્ષ ચૂંટણી કરાવવાનું વચન આપ્યું હતું.

આ પણ જુઓ: લોકસભા ચૂંટણી પહેલા ભાજપ દ્વારા ‘ધ નમો મર્ચેન્ડાઈઝ’ કેમ્પેઈન શરૂ કરવામાં આવ્યું