મહેસાણા બેઠક પર ઉમેદવાર જાહેર થાય તે પહેલાં જ નીતિન પટેલે દાવેદારી પરત ખેંચી

• મહેસાણામાંથી એક મોટા સમાચાર પ્રકાશમાં આવ્યા છે. પૂર્વ નાયબ મુખ્યમંત્રી અને ભાજપના નેતા નીતિન પટેલે મહેસાણા લોકસભા બેઠક પરથી પોતાની દાવેદારી પાછી ખેંચી લીધી છે

મહેસાણા, 3 માર્ચ: મહેસાણામાંથી એક મોટા સમાચાર પ્રકાશમાં આવ્યા છે. પૂર્વ નાયબ મુખ્યમંત્રી અને ભાજપના નેતા નીતિન પટેલે મહેસાણા લોકસભા બેઠક પરથી પોતાની દાવેદારી પાછી ખેંચી લીધી છે. અગાઉ તેમણે પાર્ટી હાઈકમાન્ડ સમક્ષ પોતાની રુચિ વ્યક્ત કરી હતી. પરંતુ શનિવારે પાર્ટીએ રાજ્યની 15 સીટો માટે નામ જાહેર કર્યા બાદ તેમણે પોતાનું નામ પાછું ખેંચી લીધું છે.

નીતિન પટેલે શું કહ્યું?

નીતિન પટેલે જણાવ્યું હતું કે, ‘મેં કેટલાક કારણોસર મહેસાણા લોકસભા બેઠક માટે ભાજપના ઉમેદવાર તરીકે ઉમેદવારી નોંધાવી હતી. રાજ્યની 15 લોકસભા બેઠકો માટેના ઉમેદવારોની ગઈકાલે જાહેરાત કરવામાં આવી છે અને મહેસાણા લોકસભાના ઉમેદવારની પસંદગી પ્રક્રિયા હજુ ચાલી રહી છે. તે પહેલા હું ભાજપના ઉમેદવાર તરીકેની મારી ઉમેદવારી પાછી ખેંચી લઉં છું.

તેમણે કહ્યું કે, ‘હું ભગવાનને પ્રાર્થના કરું છું કે માનનીય નરેન્દ્રભાઈ મોદી સતત ત્રીજી વખત વડાપ્રધાન બને અને સમગ્ર વિશ્વમાં ભારતની પ્રતિષ્ઠા વધે અને ભારત માતાનું પરમ ગૌરવ અપાવે. હું તમામ કાર્યકરો, શુભેચ્છકો અને સહકાર્યકરોનો ખૂબ ખૂબ આભારી છું.

ભોજપુરી સ્ટાર પવન સિંહ પણ આસનસોલથી ચૂંટણી નહીં લડે

ભોજપુરી સ્ટાર પવન સિંહે પણ કહ્યું છે કે તે આસનસોલથી ચૂંટણી નહીં લડે. તેમણે આ માહિતી સોશિયલ મીડિયા પ્લેટફોર્મ X પર આપી છે. પવન સિંહે X પર લખ્યું છે કે ‘હું ભારતીય જનતા પાર્ટીના ટોચના નેતૃત્વનો હૃદયપૂર્વક આભાર વ્યક્ત કરું છું. પાર્ટીએ મારા પર વિશ્વાસ કર્યો અને મને આસનસોલથી ઉમેદવાર જાહેર કર્યો, પરંતુ કેટલાક કારણોસર હું આસનસોલથી ચૂંટણી લડી શકીશ નહીં.

આ પણ વાંચો: પવન સિંહનો આસનસોલથી લોકસભા ચૂંટણી લડવાનો ઈન્કાર, ભાજપે બનાવ્યા હતા ઉમેદવાર