પન્નુની હત્યાનું કાવતરું ઘડનાર નિખિલ ગુપ્તાને અમેરિકા પ્રત્યાર્પણ કરવામાં આવશે

અમેરિકા,20 જાન્યુઆરી 2024:ચેક રિપબ્લિકની એક અપીલ કોર્ટે ભારતીય નાગરિક નિખિલ ગુપ્તાના યુએસ પ્રત્યાર્પણને મંજૂરી આપી દીધી છે. અમેરિકાએ તેના પર અમેરિકાની ધરતી પર ખાલિસ્તાની આતંકવાદી ગુરપતવંત સિંહ પન્નુની હત્યાના નિષ્ફળ કાવતરામાં સામેલ હોવાનો આરોપ લગાવ્યો હતો.

ચેક રિપબ્લિક જસ્ટિસ મિનિસ્ટ્રીના પ્રવક્તા અનુસાર નિખિલ ગુપ્તાના પ્રત્યાર્પણ અંગેનો અંતિમ નિર્ણય ન્યાય મંત્રી પાવેલ બ્લાઝેક પર છે. 52 વર્ષીય ભારતીય નાગરિકની યુએસની વિનંતી પર 30 જૂને ચેક રિપબ્લિકમાં ધરપકડ કરવામાં આવી હતી. યુએસ ફેડરલ પ્રોસિક્યુટર્સે નિખિલ ગુપ્તા પર ભાડેથી હત્યા કરવાનો આરોપ લગાવ્યો છે. આ અંતર્ગત વધુમાં વધુ 10 વર્ષની જેલની સજાની જોગવાઈ છે.

શું છે નિખિલ ગુપ્તાના વકીલોની દલીલો?

નિખિલ ગુપ્તાના વકીલોએ કોર્ટમાં દલીલ કરી છે કે નિખિલની ધરપકડ ખોટી ઓળખના કારણે થઈ હતી. વકીલે કહ્યું કે નિખિલ ગુપ્તાની ધરપકડ રાજકીય રીતે પ્રેરિત છે. ડિસેમ્બરમાં નીચલી અદાલતના નિર્ણય સામે ભારતીય નાગરિકની અપીલ છતાં પ્રાગ હાઈકોર્ટે નિર્ણયને યથાવત રાખ્યો છે. ન્યાય મંત્રાલયના પ્રવક્તાએ સંકેત આપ્યો છે કે અંતિમ નિર્ણય હવે ન્યાય પ્રધાન પાવેલ બ્લેઝેક પર છે. જો કે ન્યાય મંત્રીનો નિર્ણય ક્યારે આવશે તે અંગે કોઈ સ્પષ્ટ માહિતી નથી.

અમેરિકાએ કયા પુરાવા આપ્યા?

યુએસ કોર્ટમાં આરોપ સાથે સંબંધિત દસ્તાવેજોમાં, નિખિલ ગુપ્તાને ષડયંત્ર સાથે જોડવા માટે વાતચીતની વિગતો શેર કરવામાં આવી હતી. આ સાથે કેટલાક ફોટોગ્રાફ્સ પણ રજૂ કરવામાં આવ્યા હતા જેમાં પૈસાની લોન અને ‘ભાડે હત્યારા’ને એડવાન્સ રકમ આપતા દર્શાવવામાં આવ્યા હતા. અમેરિકાએ દાવો કર્યો છે કે નિખિલ ગુપ્તાએ કથિત રીતે જેમને એડવાન્સ પૈસા આપ્યા હતા તે ‘ભાડે રાખેલો કિલર’ એક ગુપ્ત અમેરિકન એજન્ટ હતો.

જોકે, નિખિલ ગુપ્તાના વકીલે પૈસાની લેવડ-દેવડની તસવીરો વિશે કહ્યું હતું કે, તે તસવીરો કંઈ જ જણાવતી નથી. એટલે કે, તેને પુરાવા તરીકે રજૂ ન કરવો જોઈએ કારણ કે આ ફોટો કોઈપણ રીતે ક્લિક કરી શકાય છે.