નવી દિલ્હી : AAP નેતાઓ ઉપર ઉપરાજ્યપાલનો આ આરોપ, મોકલી નોટિસ

દિલ્હીના લેફ્ટનન્ટ ગવર્નર વિનય કુમાર સક્સેનાએ સોમવારે આમ આદમી પાર્ટીના નેતાઓને કાનૂની નોટિસ મોકલી છે. તેઓનું કહેવું છે કે ખાદી અને ગ્રામોદ્યોગ આયોગના તત્કાલિન અધ્યક્ષના કાર્યકાળ દરમિયાન દુર્ગેશ પાઠક, આતિશી, સૌરભ ભારદ્વાજ, સાંસદ સંજય સિંહ અને જસ્મીન શાહ દ્વારા તેમના ઉપર ભ્રષ્ટાચારના આરોપો લગાવવામાં આવ્યા હતા. આ આરોપોને ખોટા અને માનહાનિકારક ગણીને લેફ્ટનન્ટ ગવર્નરે કાયદાકીય કાર્યવાહી કરવાનો નિર્ણય લીધો છે. નોટિસમાં લેફ્ટનન્ટ ગવર્નરે તેમની છબી ખરાબ કરવા અને ફેક ન્યૂઝ ફેલાવવાનો આરોપ લગાવ્યો છે. AAP નેતાઓને આગામી 48 કલાકમાં આ અંગે જવાબ આપવા માટે કહેવામાં આવ્યું છે.

મુખ્યમંત્રી અરવિંદ કેજરીવાલ ઉપર સાધ્યું નિશાન

આ પહેલા આમ આદમી પાર્ટીના કન્વીનર અને દિલ્હીના મુખ્યમંત્રી પર સીધો હુમલો કરતા લેફ્ટનન્ટ ગવર્નરે કહ્યું હતું કે હતાશામાં અરવિંદ કેજરીવાલ ડાયવર્ઝનની રાજનીતિ હેઠળ ખોટા આરોપોનો સહારો લઈને મારા પર ભ્રષ્ટાચારનો આરોપ લગાવી રહ્યા છે. આગામી થોડા દિવસોમાં મારા પર કે મારા પરિવાર પર આવા પાયાવિહોણા અંગત હુમલા થાય તો નવાઈ નહીં.

VK સક્સેનાએ 2016માં 1400 કરોડનું કૌભાંડ કર્યું

ગયા અઠવાડિયે, AAP ધારાસભ્ય દુર્ગેશ પાઠકે દિલ્હી વિધાનસભામાં લેફ્ટનન્ટ ગવર્નર પર 1400 કરોડ રૂપિયાના ભ્રષ્ટાચારમાં સામેલ હોવાનો આરોપ લગાવ્યો હતો. પાઠકે આક્ષેપ કર્યો હતો કે ખાદી ગ્રામોદ્યોગ કમિશનના અધ્યક્ષ તરીકે દિલ્હીના વર્તમાન લેફ્ટનન્ટ ગવર્નરે રૂ.1400 કરોડનું કૌભાંડ કર્યું છે. આ ઘટના 2016માં નોટબંધી વખતે બની હતી.

કેવી રીતે આચરી હતી ગેરરીતિ ? શું છે આક્ષેપ ?

પાઠકના કહેવા પ્રમાણે, નોટબંધી દરમિયાન હાલના લેફ્ટનન્ટ ગવર્નરે જૂની નોટો મોટા પાયે બદલાવી હતી. નોટબંધી પછી તેણે કાળા નાણાને સફેદમાં ફેરવી દીધું. તેની સમગ્ર પ્રક્રિયા ખાદી ગ્રામોદ્યોગ કમિશન હેઠળ ચાલતી હતી. કમિશનના ગરીબ કેશિયર જેમણે આ વાતનો પર્દાફાશ કર્યો તે સંજીવ કુમાર અને પ્રદીપ યાદવ હતા, જેમની પાસેથી આ કામ બળજબરીથી કરાવવામાં આવ્યું હતું. તેમની બ્રાન્ચમાં જ 22 લાખ રૂપિયાની હેરાફેરી કરવામાં આવી હતી. આ રીતે સમગ્ર દેશમાં લગભગ 1400 કરોડ રૂપિયાનો ભ્રષ્ટાચાર થાય છે. તેઓએ દરેક ફોરમ પર તેની ફરિયાદ કરી. તેમ છતાં, તપાસની અધ્યક્ષતા આરોપીએ પોતે કરી હતી અને બંને ફરિયાદીઓને સસ્પેન્ડ કરવામાં આવ્યા હતા.