New Delhi : યુટ્યુબર મનીષ કશ્યપ પર NSA લાગુ, સુપ્રીમ કોર્ટે અરજી મંજૂર કરી
તમિલનાડુમાં બિહારી કામદારો પર હુમલાના વીડિયો કથિત રીતે ફરતા કરવાના આરોપમાં ધરપકડ કરાયેલ યુટ્યુબર મનીષ કશ્યપ સામે રાષ્ટ્રીય સુરક્ષા કાયદા હેઠળ કેસ નોંધવામાં આવ્યો છે. મદુરાઈ જિલ્લા અદાલતે યુટ્યુબર મનીષ કશ્યપને 19 એપ્રિલ સુધી ન્યાયિક કસ્ટડીમાં મોકલી દીધો છે. ગયા અઠવાડિયે જ તમિલનાડુ પોલીસની ટીમ કોર્ટમાંથી પ્રોડક્શન વોરંટ લઈને મનીષને પટનાથી તમિલનાડુ લઈ ગઈ હતી. ત્યાં તેને મદુરાઈ કોર્ટમાં રજૂ કરવામાં આવ્યો હતો. કોર્ટે ત્રણ દિવસના પોલીસ રિમાન્ડ મંજૂર કર્યા હતા. આ પહેલા બુધવારે 5 એપ્રિલે મનીષ કશ્યપે સુપ્રીમ કોર્ટનો સહારો લીધો હતો. તેણે સુપ્રીમ કોર્ટમાં સુનાવણી માટે અરજી કરી હતી. આ સાથે મનીષ કશ્યપે વિવિધ રાજ્યોમાં નોંધાયેલી એફઆઈઆરની સાથે વચગાળાના જામીનની માંગણી કરતી અરજી દાખલ કરી હતી.
મનીષ કશ્યપ પર તમિલનાડુમાં બિહારી કામદારો પર થયેલા હુમલા સંબંધિત એક વીડિયો અપલોડ કરવાનો આરોપ છે, જેમાં કહેવામાં આવ્યું હતું કે બિહારના પ્રવાસી મજૂરોને તમિલનાડુમાં કથિત રીતે હેરાન કરવામાં આવી રહ્યા છે. આ વીડિયો સોશિયલ મીડિયા પર વાયરલ થયા બાદ બિહારના મુખ્યમંત્રી નીતિશ કુમારે ઘટનાની તપાસના આદેશ આપ્યા હતા. આ પછી કશ્યપ બિહાર અને તમિલનાડુ પોલીસના રડાર પર હતો.
આ પણ વાંચો : Delhi Excise Policy : સિસોદિયાની જામીન અરજી પર દિલ્હી હાઈકોર્ટે CBIને નોટિસ ફટકારી
તમિલનાડુના સીએમ એમકે સ્ટાલિને રાજ્યમાં પરપ્રાંતિય કામદારોની હેરાનગતિના આરોપોને નકારી કાઢ્યા હતા. તેમણે બિહારના મુખ્ય પ્રધાન નીતિશ કુમારને પણ ખાતરી આપી હતી કે કામદારોને નિશાન બનાવવામાં આવ્યા નથી. તમિલનાડુના ડીજીપી શૈલેન્દ્ર બાબુએ કહ્યું હતું કે, બિહારમાં કોઈએ તમિલનાડુમાં બિહારના પ્રવાસી મજૂરો પર હુમલા અંગેનો ખોટો અને ભ્રામક વીડિયો પોસ્ટ કર્યો છે. આ ઘટના અંગે સોશિયલ મીડિયા પર ફરતા બે વીડિયો ખોટા છે. તમિલનાડુમાં રહેતા પરપ્રાંતિય કામદારો પર હુમલો કરવામાં આવી રહ્યો હોવાનું દેખાડવા માટે વીડિયોમાં તથ્યોને ટ્વિસ્ટ કરવામાં આવ્યા છે.
