નેપાળ PMના ભારત પ્રવાસ દરમિયાન આ મુદ્દા પર ચર્ચા સંભવ

ત્રીજી વખત વડાપ્રધાન બન્યા બાદ નેપાળના પીએમ પુષ્પ કમલ દહલ ‘પ્રચંડ’ આવતા મહિને ભારતની મુલાકાતે આવી શકે છે. જો કે હજુ સુધી આની સત્તાવાર જાહેરાત કરવામાં આવી નથી, પરંતુ, રિપોર્ટ્સનું માનીએ તો તેમની ભારત મુલાકાત ફિક્સ હોવાનું માનવામાં આવે છે. નેપાળી પીએમની ભારત મુલાકાતને ઘણી રીતે મહત્વપૂર્ણ માનવામાં આવે છે.

પ્રચંડને ચીનના શુભેચ્છક માનવામાં આવે છે

એવું માનવામાં આવે છે કે નેપાળી પીએમની આ મુલાકાતમાં દ્વિપક્ષીય સંબંધોને પ્રોત્સાહન અને વેપાર, ઉર્જા, કૃષિ, સંસ્કૃતિ અને હવાઈ સેવા જેવા મુદ્દાઓ સામેલ કરવામાં આવશે. પ્રચંડને ચીનના શુભેચ્છક માનવામાં આવે છે. તેઓ ભારત વિરુદ્ધ નિવેદનો આપતા રહે છે. પીએમ પદ સંભાળ્યા બાદ જ તેમણે નિવેદન આપ્યું છે કે ભારતે કાલાપાની, લિપુલેખ અને લિમ્પિયાધુરા વિસ્તારો પર અતિક્રમણ કર્યું છે અને નવી સરકાર આ વિસ્તારોને પરત લેવાનો પૂરો પ્રયાસ કરશે.

ભારત મુલાકાત અંગે નેપાળી વડાપ્રધાનના નજીકના સૂત્રોનું કહેવું છે કે ભારતની મુલાકાત તેમની યાદીમાં છે. કાઠમંડુ પોસ્ટ અખબારે અહેવાલ આપ્યો છે કે નેપાળના વિદેશ મંત્રાલયે આ પ્રવાસની તૈયારીઓ શરૂ કરી દીધી છે. એવું માનવામાં આવે છે કે નેપાળી પીએમ દહલ તેમની પ્રથમ ભારત મુલાકાતમાં કાલાપાની, લિપુલેખ અને લિમ્પિયાધુરા જેવા સરહદી વિસ્તારોનો મુદ્દો ઉઠાવશે.

પ્રચંડે પ્રથમ મુલાકાતનો રિવાજ તોડ્યો

તમને જણાવી દઈએ કે નેપાળમાં એવો રિવાજ રહ્યો છે કે જ્યારે પણ કોઈ પીએમ બને છે ત્યારે તેમની પ્રથમ સત્તાવાર મુલાકાત ભારતની હોય છે. જ્યારે પ્રચંડે પહેલીવાર પીએમ તરીકેનો કાર્યભાર સંભાળ્યો ત્યારે તેમણે આ રિવાજ તોડ્યો હતો. એટલું જ નહીં તેણે ભારતને બદલે ચીનને પસંદ કર્યું.