National Girl Child Day: ગુજરાતમાં હાલ દત્તક લેવાના પ્રમાણમાં 10માંથી 6 દીકરીઓ
- 15 બાળકોને વિદેશમાં રહેતા માતા-પિતા દ્વારા દત્તક લેવામાં આવ્યા
- દત્તક લેવામાં આવતા બાળકોમાં પણ દીકરીઓનું પ્રમાણ વધ્યું
- ગુજરાતમાંથી અંદાજે 998 બાળકોને માતા-પિતાનો સાથ મળ્યો
આજે ‘નેશનલ ગર્લ ચાઇલ્ડ ડે’ (National Girl Child Day) છે. ત્યારે ગુજરાતમાં હાલ દત્તક લેવાના પ્રમાણમાં 10માંથી 6 દીકરીઓ છે તેવી માહિતી સામે આવી છે. દીકરી એટલે સાપનો ભારો તેવી અત્યંત રૂઢિચુસ્ત-અત્યંત નિમ્ન કક્ષાની માનસિકતામાંથી સમાજ બહાર આવી રહ્યો છે.
સમાજમાં ધીરે-ધીરે પરિવર્તન આવવા લાગ્યો
સમાજમાં ધીરે-ધીરે પરિવર્તન આવવા લાગ્યો છે. માતા-પિતા દ્વારા દત્તક લેવામાં આવતા બાળકોમાં પણ દીકરીઓનું પ્રમાણ ખૂબ જ વધી ગયું છે. ગુજરાતમાં હાલ દત્તક લેવાના પ્રમાણમાં 10માંથી 6 દીકરીઓ હોય છે. જેમાં દત્તક લેવામાં દીકરી જ માતા-પિતાની પહેલી પસંદ બની છે. ગુજરાતમાં 2023-24માં કુલ 110 બાળકોને દત્તક આપવામાં આવ્યા હતા. આ 110માં 52 બાળકો અને 58 બાળકીનોઓનો સમાવેશ થાય છે.
15 બાળકોને વિદેશમાં રહેતા માતા-પિતા દ્વારા દત્તક લેવામાં આવ્યા
આ ઉપરાંત કુલ 15 બાળકોને વિદેશમાં રહેતા માતા-પિતા દ્વારા દત્તક લેવામાં આવ્યા હતા. જેમાંથી 7 દીકરાઓ અને 8 દીકરીઓનો સમાવેશ થાય છે. વર્ષ 2023-24માં સમગ્ર દેશમાં 1727 બાળક અને 2302 બાળકીઓ એમ કુલ 4029 બાળકોને દત્તક આપવામાં આવ્યા હતા. મોટાભાગના રાજ્યોમાં દત્તક સંતાન તરીકે દીકરી ઉપર જ માતા-પિતા દ્વારા પસંદગી કરાઇ હતી. મહારાષ્ટ્રમાંથી એક વર્ષમાં દત્તક અપાયેલા 597 બાળકોમાંથી 335 દીકરીઓ હતી.
ગુજરાતમાંથી અંદાજે 998 બાળકોને માતા-પિતાનો સાથ મળ્યો
2014-15થી 2023-24 દરમિયાન ગુજરાતમાંથી અંદાજે 998 બાળકોને માતા-પિતાનો સાથ મળ્યો હતો. આ પૈકી 394 દીકરા અને 509 દીકરીઓનો સમાવેશ થાય છે. આ અંગે પાલડી ખાતેના શિશગૃહના સુપ્રિટેન્ડન્ટ રિતેશ દવેએ જણાવ્યું કે, ‘દત્તક સંતાન લેવા માટે આવતા 80 ટકા દંપતિઓ સંતાન તરીકે દીકરીઓને જ પસંદ કરે છે.’
