ડેપ્યુટી સીએમની ગાડીને બોમ્બથી ઉડાવી દઈશ, એકનાથ શિંદેને ધમકી મળી

મહારાષ્ટ્ર, 20 ફેબ્રુઆરી 2025 :  મહારાષ્ટ્રના ડેપ્યુટી સીએમ એકનાથ શિંદેને જાનથી મારી નાખવાની ધમકી મળી છે. મુંબઈની ગોરેગાંવ પોલીસને એક અજ્ઞાત વ્યક્તિ તરફથી શિવસેના પ્રમુખની કારને બોમ્બથી ઉડાવી દેવાની ધમકીનો ઈમેઈલ મળ્યો હતો જે ગોરેગાંવ અને જેજે માર્ગ પોલીસ સ્ટેશન તેમજ મંત્રાલયને મોકલવામાં આવ્યો હતો. ઈમેલ મળ્યા બાદ તપાસ એજન્સીઓ એલર્ટ થઈ ગઈ હતી. ક્રાઈમ બ્રાન્ચ સહિતની તમામ એજન્સીઓ તપાસમાં લાગેલી છે.

શિંદેની સુરક્ષા વધારી દેવામાં આવી
ધમકી બાદ મુંબઈ પોલીસ અને ક્રાઈમ બ્રાન્ચે તપાસ શરૂ કરી છે. અધિકારીઓ ધમકી મોકલવા માટે ઉપયોગમાં લેવાતા ઈમેલ આઈડીના આઈપી એડ્રેસને ટ્રેસ કરી રહ્યા છે. શિંદેની આસપાસ સુરક્ષા વધારી દેવામાં આવી છે અને અધિકારીઓ મામલાને ગંભીરતાથી લઈ રહ્યા છે. તપાસ ચાલુ છે.

એક મહિના પહેલા પણ ધમકી મળી હતી
છેલ્લા કેટલાક દિવસોમાં રાજકીય નેતાઓને ધમકીભર્યા કોલ અને ઈમેઈલ મળવાના બનાવો પ્રકાશમાં આવ્યા છે.
આ પહેલા જાન્યુઆરી 2025માં 24 વર્ષીય યુવક હિતેશ પ્રકાશ ધેંડેએ સોશિયલ મીડિયા પર એકનાથ શિંદેને જાનથી મારી નાખવાની ધમકી આપી હતી. આ ઘટના બાદ થાણેના શ્રીનગર પોલીસ સ્ટેશનમાં કેસ નોંધવામાં આવ્યો હતો અને પોલીસે આરોપીની શોધ શરૂ કરી હતી.

આ મામલે થાણેના ડીસીપી પ્રશાંત કદમે જણાવ્યું હતું કે,
આરોપીએ તેના મિત્રના મોબાઈલનો ઉપયોગ કરીને ઈન્સ્ટાગ્રામ પર નાયબ મુખ્યમંત્રી એકનાથ શિંદે વિરુદ્ધ ધમકીભર્યો વીડિયો પોસ્ટ કર્યો હતો. શ્રીનગરમાં FIR નોંધવામાં આવી છે.

એકનાથ શિંદે દિલ્હી પ્રવાસે છે
હાલમાં રેખા ગુપ્તાના શપથ ગ્રહણ સમારોહમાં હાજરી આપવા માટે એકનાથ શિંદે દિલ્હી પહોંચ્યા હતા. ભાજપના મંચ પર મહારાષ્ટ્રમાંથી ફડણવીસ, એકનાથ શિંદે અને અજિત પવારે પણ ભાગ લીધો હતો. છેલ્લા કેટલાક દિવસોથી એકનાથ શિંદેની નારાજગીના અહેવાલો હતા. તેઓ દેવેન્દ્ર ફડણવીસની ઘણી બેઠકોમાં હાજરી આપતા ન હતા.

આ પણ વાંચો : બજેટ 2025-26: મુસાફરોની સગવડતા માટે નવી 200 એસી અને 400 મીડી બસોની જોગવાઈ