માધવી પુરી બુચ સામે થશે FIR, મુંબઈ કોર્ટનો આદેશ

મુંબઈ, તા. 2 માર્ચ, 2025: મુંબઈની એક વિશેષ કોર્ટે શેરબજારમાં છેતરપિંડી કરવા બદલ સેબીના પૂર્વ અધ્યક્ષ માધવી પુરી બુચ તથા અન્ય પાંચ અધિકારીઓ સામે એફઆઈઆર નોંધવાનો નિર્દેશ આપ્યો છે. મુંબઈ સ્થિત વિશેષ એસીબી કોર્ટે શશિકાંત એકનાથરાવ બાંગરે શનિવારે એક આદેશમાં કહ્યું, નિષ્પક્ષ તપાસની જરૂર છે. કોર્ટે 30 દિવસની અંદર સ્ટેટસ રિપોર્ટ માંગ્યો છે.
કાયદા અમલીકરણ એજન્સીઓ અને સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (સેબી) ની નિષ્ક્રિયતાને કારણે સીઆરપીસી (ક્રિમિનલ પ્રોસિજર કોડ) ની જોગવાઈઓ હેઠળ ન્યાયિક હસ્તક્ષેપની જરૂર છે.

ફરિયાદીએ ગંભીર આરોપો લગાવ્યા

ફરિયાદી એક મીડિયા રિપોર્ટર છે, તેમણે કથિત ગુનાઓની તપાસની માંગ કરી હતી, જેમાં મોટા પાયે નાણાકીય છેતરપિંડી, નિયમનકારી ઉલ્લંઘન અને ભ્રષ્ટાચારનો સમાવેશ થાય છે. ફરિયાદીએ દાવો કર્યો હતો કે સેબીના અધિકારીઓ તેમની કાનૂની ફરજમાં નિષ્ફળ ગયા, બજારમાં હેરફેરને સરળ બનાવ્યું અને નિર્ધારિત માપદંડોને પૂર્ણ ન કરતી કંપનીને લિસ્ટિંગની મંજૂરી આપીને કોર્પોરેટ છેતરપિંડીનો માર્ગ મોકળો કર્યો હતો.

ફરિયાદીએ જણાવ્યું હતું કે પોલીસ સ્ટેશન અને સંબંધિત નિયમનકારી સંસ્થાઓનો વારંવાર સંપર્ક કરવા છતાં કોઈ કાર્યવાહી કરવામાં આવી નથી. રેકોર્ડ પરની સામગ્રીને ધ્યાનમાં લીધા પછી, કોર્ટે એસીબી વર્લી મુંબઈ ઝોનને આઈપીસી, ભ્રષ્ટાચાર નિવારણ અધિનિયમ, સેબી એક્ટ અને અન્ય લાગુ કાયદાઓની સંબંધિત જોગવાઈઓ હેઠળ એફઆઈઆર નોંધવાનો નિર્દેશ આપ્યો છે.

ભારતની પ્રથમ મહિલા સેબી ચીફ બુચ પર યુએસ સ્થિત સંશોધન અને રોકાણ કંપની હિન્ડનબર્ગ રિસર્ચ દ્વારા હિતોના સંઘર્ષનો આરોપ મૂકવામાં આવ્યો હતો. ત્યારબાદ બુચે રાજકીય તણાવ વચ્ચે શુક્રવારે તેમનો ત્રણ વર્ષનો કાર્યકાળ પૂર્ણ કર્યો.

માધબી બુચ શરૂઆતથી જ વિવાદોમાં હતી

માધબી પુરી બુચે 2 માર્ચ, 2022 ના રોજ સેબીના અધ્યક્ષ તરીકેનો કાર્યભાર સંભાળ્યો. તેઓ સેબીના પ્રથમ મહિલા અધ્યક્ષ બન્યા અને ખાનગી ક્ષેત્રના પ્રથમ મહિલા અધ્યક્ષ પણ બન્યા. અમેરિકન શોર્ટ સેલર ફર્મ હિન્ડનબર્ગ દ્વારા તેમના પર અનેક ગંભીર ગેરરીતિઓનો આરોપ મૂકવામાં આવ્યો હતો. વિપક્ષી પક્ષો દ્વારા પણ સમયાંતરે તેમના પર ઘણા આરોપો લગાવવામાં આવ્યા છે. તેમનો કાર્યકાળ ગયા અઠવાડિયે પૂરો થયો. તેમના સ્થાને, ઓડિશા કેડરના 1987 બેચના IAS અધિકારી તુહિન કાંત પાંડેને SEBIના વડા તરીકે નિયુક્ત કરવામાં આવ્યા છે.

આ પણ વાંચોઃ સુરતમાં પોલીસે 273 CCTV ચેક કરીને 48 કલાકમાં ચોરીનો ભેદ ઉકેલ્યો