2.5 લાખથી વધુ ભક્તોએ કર્યા રામલલાના દર્શન, પ્રથમ દિવસે 3.17 કરોડ રૂપિયાનું થયું દાન
અયોધ્યા, 25 જાન્યુઆરી : રામ મંદિરમાં રામલલાની પ્રાણ પ્રતિષ્ઠા પછી પ્રથમ દિવસે મંગળવારે ભક્તો દ્વારા 3.17 કરોડ રૂપિયાનું દાન કરવામાં આવ્યું છે. રામ જન્મભૂમિ તીર્થ ક્ષેત્ર ટ્રસ્ટના ટ્રસ્ટી અનિલ મિશ્રાએ જણાવ્યું કે પ્રાણ પ્રતિષ્ઠાના દિવસે 10 ડોનેશન કાઉન્ટર ખોલવામાં આવ્યા હતા. 22 જાન્યુઆરીના રોજ પ્રાણ પ્રતિષ્ઠા સમારોહ પછી, ભક્તોએ ડોનેશન કાઉન્ટર અને ઓનલાઈન દાનના રૂપમાં રૂ. 3.17 કરોડનું દાન આપ્યું હતું. 23 જાન્યુઆરીએ પાંચ લાખથી વધુ ભક્તોએ મંદિરની મુલાકાત લીધી હતી, જ્યારે બુધવારે પ્રાણ પ્રતિષ્ઠા સમારોહના બીજા દિવસે રાત્રે 10 વાગ્યા સુધીમાં 2.5 લાખથી વધુ ભક્તોએ મંદિરની મુલાકાત લીધી હતી.
રામલલાના મંદિરમાં ભક્તોની ભારે ભીડ
અયોધ્યા મંદિરમાં બુધવારે ભક્તોની ભારે ભીડ જોવા મળી હતી. રામપથ અને મંદિર પરિસરમાં સવારથી જ ભક્તોની લાંબી કતારો જોવા મળી હતી. ભારે ઠંડી, ધુમ્મસ અને કાતિલ ઠંડી વચ્ચે લોકો મંદિરની બહાર કતારોમાં ઊભા-ઊભા ભક્તો ‘જય શ્રી રામ’ના નારા લગાવતા હતા. મંદિરના માર્ગો પર ભારે ભીડ એકઠી થઈ હતી. મુખ્યમંત્રી યોગી આદિત્યનાથની સૂચના પર વહીવટીતંત્ર અને પોલીસની ટીમ શ્રદ્ધાળુઓની સુવિધા માટે સંપૂર્ણ રીતે તૈયાર છે.
પ્રથમ દિવસે 5 લાખ લોકોએ મુલાકાત લીધી હતી
સોમવારે રામલલાના પ્રાણ પ્રતિષ્ઠા સમારોહ પછી મંગળવારે લોકો માટે ખોલવામાં આવેલા મંદિરમાં પાંચ લાખ લોકોએ દર્શન કર્યા હતા. જ્યારે બુધવારે 2.5 લાખથી વધુ શ્રદ્ધાળુઓએ દર્શન કર્યા હતા. મોટી સંખ્યામાં શ્રદ્ધાળુઓના કારણે હાલમાં મંદિર સવારે 6 વાગ્યાથી રાત્રિના 10 વાગ્યા સુધી ખુલ્લુ રાખવામાં આવે છે. જ્યારે અગાઉ આ સમય સવારે 7 થી 11:30 અને બપોરે 2 થી સાંજના 7 વાગ્યા સુધીનો હતો. કડકડતી ઠંડી અને ધુમ્મસ હોવા છતાં લોકો સવારથી જ મુખ્ય માર્ગ રામ પથ અને મંદિર પરિસરની આસપાસ લાંબી કતારો લગાવીને ઉભા છે.
મંદિર પરિસરની બહાર RAF અને CRPF તૈનાત
મંદિર અને ભક્તોની સુરક્ષાને ધ્યાનમાં રાખીને રેપિડ એક્શન ફોર્સ (RAF) અને સેન્ટ્રલ રિઝર્વ પોલીસ ફોર્સ (CRPF)ની ટીમો મંદિર પરિસરની બહાર તૈનાત કરવામાં આવી છે. અયોધ્યાના કમિશનર ગૌરવ દયાલે જણાવ્યું કે, ભક્તોની ભીડ હજુ પણ અગણિત છે. અમે પરિસ્થિતિને કાબૂમાં લેવાનો પ્રયાસ કરી રહ્યા છીએ. ઇમરજન્સી વાહનો અને સામાન વહન કરતા વાહનોને ફૈઝાબાદમાં પ્રવેશવાની મંજૂરી છે, પરંતુ અયોધ્યા શહેરમાં પ્રવેશવાની મંજૂરી હજી આપે નથી.
સીએમ યોગી આદિત્યનાથે બેઠક યોજી
આ ઉપરાંત, સીએમ યોગી આદિત્યનાથે ભીડનું સંચાલન કરવા માટે મંદિર સંકુલમાં કરવામાં આવેલી વ્યવસ્થાઓની સમીક્ષા કરવા અધિકારીઓ સાથે બેઠક યોજી હતી અને VIP લોકોને તેમની મુલાકાતના શેડ્યૂલના એક અઠવાડિયા પહેલા રાજ્ય સરકાર અથવા શ્રી રામ જન્મભૂમિ તીર્થ ક્ષેત્રનો સંપર્ક કરવા સલાહ આપી હતી. તેમજ, અધિકારીઓને અયોધ્યા જવા માટે વધારાની રોડવેઝ બસો રોકવાનો નિર્દેશ પણ કર્યો છે.
આ પણ વાંચો : શુદ્ધ સોનાના તારથી બની રામ લલ્લાની ધોતી, પાંચ વર્ષના બાળકનો આવો છે શણગાર
