મોરબીઃ દયાનંદ સરસ્વતીની સ્મૃતિમાં ધર્મસભા, 1100 કુંડી મહાયજ્ઞનું આયોજન
- મહર્ષિ દયાનંદ સસ્વતીનું જન્મસ્થળ ટંકારા (મોરબી) છે પરમ શ્રદ્ધાનું કેન્દ્રઃ રાજ્યપાલશ્રી આચાર્ય દેવવ્રત
- મહર્ષિ દયાનંદજીએ સમાજના કુરિવાજો દૂર કરી પૂજાની પ્રાચીન પરંપરા ‘યજ્ઞ’ને પુન: જીવંત કરી હતીઃ રાજ્યપાલ
- આર્ય સમાજના અનેક વિદ્વાનો – અનુયાયીઓએ ભારતીય સંસ્કૃતિને જીવંત રાખવામાં આપ્યું છે યોગદાનઃ આચાર્ય દેવવ્રત
મોરબી, 24 ડિસેમ્બરઃ મહર્ષિ દયાનંદ સરસ્વતીની ૨૦૦મી જન્મ જયંતિની ઉજવણીના ભાગરૂપે મોરબી ખાતે રાજ્યપાલ શ્રી આચાર્ય દેવવ્રતની અધ્યક્ષતામાં ધર્મસભા સમારોહ – ૧૧૦૦ કુંડી મહાયજ્ઞ યોજાયો હતો. મોરબી ખાતે મહર્ષિ દયાનંદ સરસ્વતી દ્વિ-શતાબ્દી જન્મ જયંતિ મહોત્સવ દ્વારા આયોજિત ધર્મસભા સમારોહમાં રાજ્યપાલ શ્રી આચાર્ય દેવવ્રતજીએ જણાવ્યું હતું કે, “મોરબી અને ટંકારા મારા સહિત અનેક લોકો માટે પરમ શ્રદ્ધાનું કેન્દ્ર છે. ટંકારાની પવિત્ર ભૂમિ પર મહર્ષિ દયાનંદ સરસ્વતીનો જન્મ થયો હતો. તેઓએ વિદ્યાપ્રાપ્ત કરવા માટે અનેક પ્રયત્નો કર્યા હતા. બાદમાં તેઓએ વેદોનું જ્ઞાન મેળવ્યું હતું. મહર્ષિ દયાનંદ સરસ્વતીએ સમાજના કુરિવાજો, સતીપ્રથા, અસ્પૃશ્યતા, સ્ત્રીઓને શિક્ષણથી વંચિત રાખવી, વિદેશની ગુલામીમાંથી મુક્તિ જેવી કુરિતીઓનું નિરાકરણ કરી સમાજને નવી દિશા આપી કુરિવાજોમાંથી મુક્તિ અપાવી છે. મોરબીમાં યોજાયેલ ૧૧૦૦ કુંડી મહાયજ્ઞ મનુષ્યને ભગવાન સુધી પહોંચાડવાનો રસ્તો પ્રસ્થાપિત કરનાર યજ્ઞ છે. યજ્ઞએ બહુ મોટું વિજ્ઞાન છે. યજ્ઞથી આજુબાજુનું વાતાવરણ પવિત્ર થાય છે. યજ્ઞને આદિકાળથી ઋષિઓએ મહાન અને પવિત્ર કાર્ય ગણાવ્યું છે. પ્રાચીન ભારતમાં રાજા મહારાજાઓ ઋષિઓને આમંત્રણ આપી યજ્ઞ કરતા હતા.
રાજ્યપાલશ્રીએ આ સંદર્ભે વધુમાં કહ્યું હતું કે, “વેદોના મંત્રોથી કુરિવાજોની આહુતિ આપી યજ્ઞને પુનઃ પ્રસ્થાપિત કરવાનું કાર્ય મહર્ષિ દયાનંદ સરસ્વતીએ કર્યું હતું. પ્રાચીન ભારતમાં સ્ત્રીઓને વેદનું જ્ઞાન આપવામાં આવતું હતું અને તેમનું સમ્માન કરવામાં આવતું હતું. પરંતુ મધ્યકાળમાં વિદેશીઓ અને અંગ્રેજોની ગુલામીમાં સ્ત્રીઓ સાથે અન્યાય થયો હતો. દયાનંદજીએ નારીઓનું પુન સમ્માન અપાવ્યું હતું. અનેક ક્રાંતિકારીઓ જેમાં ભગતસિંહ, લાલા લજપતરાય જેવા ક્રાંતિકારીઓએ દયાનંદ સરસ્વતીના વિચારોમાંથી પ્રેરણા લઇ દેશ માટે પોતાના પ્રાણ ન્યોછાવર કર્યા હતા. દયાનંદ સરસ્વતી તેઓના ‘સત્યાર્થ પ્રકાશ’ નામના ગ્રંથમાં સ્વદેશી વસ્તુઓ અપનાવવાની વિચારધારા તેઓએ રજૂ કરતા લોકોમાં સ્વદેશ અને રાષ્ટ્રપ્રેમનો ભાવ ઉભો થયો છે.
રાજ્યપાલશ્રી પ્રાકૃતિક ખેતી વિશે જણાવ્યું હતું કે, “આપણા દેશમાં હરિયાળી ક્રાંતિ બાદ પ્રાકૃતિક ખેતીને બદલે રસાયણિક ખેતી વધુ થવાથી લોકોના આરોગ્યને નુકશાન થવા લાગ્યું. આપણી પ્રાચીન પરંપરા પ્રાકૃતિક ખેતી હતી. જે શરીરને શુદ્ધ કરે છે. તે રીતે ભારતીય વેદોમાં પર્યાવરણને શુદ્ધ કરવાની પરંપરા છે. જે જલ દેવને પ્રસન્ન કરે છે અને વરસાદ લાવે છે. વાતાવરણને શુદ્ધ કરે છે. વધુમાં આચાર્યશ્રીએ ઉમેર્યું હતું કે વડાપ્રધાનશ્રી નરેન્દ્રભાઇ મોદીના નેતૃત્વમાં દેશ તેજ ગતિથી આગળ વધી રહ્યો છે. દુનિયાની ત્રીજી આર્થિક વ્યવસ્થા બનવા જઇ રહી છે. ત્યારે એમાં આપણે સૌ સંગઠિત બનીને આહુતિ આપીએ.
સમારોહ પહેલા રાજ્યપાલશ્રીને ગાર્ડ ઓફ ઓનર આપવામાં આવ્યું હતું. આર્ય મહામંડળની બહેનો દ્વારા મહર્ષિ દયાનંદ સરસ્વતીજીના ઋણ ઉજાગર કરતું ગીત, આર્ય વિદ્યાલય ટંકારાની વિદ્યાર્થીનીઓ દ્વારા અભિનય ગીત રજૂ કરવામાં આવ્યું હતું. આ અવસરે સમિતિના મહામંત્રીશ્રી રમેશભાઈ બાવરવાએ ૧૧૦૦ કૂંડી યજ્ઞનું મહત્વ સમજાવી મોરબીમાં આર્ય સમાજ બનાવવા રૂ. ૧૧ લાખના દાનની જાહેરાત કરી હતી.
અત્રે ઉલ્લેખનીય છે કે મોરબી જિલ્લો સિરામિક, ઘડિયાળનાં ઉદ્યોગથી જગ પ્રસિદ્ધ છે. ત્યારે આ જ જિલ્લાનાં ટંકારામાં સરકાર દ્વારા ૧૫ એકર જમીન રાજ્ય સરકાર દ્વારા ફાળવવામાં આવી છે. જ્યાં મહર્ષિ દયાનંદ સરસ્વતીનું ભવ્ય સંકુલ નિર્માણ પામશે.
આ કાર્યક્રમમાં શાબ્દિક સ્વાગત આર્ય સમાજ દક્ષિણ પ્રમુખશ્રી મહેશભાઈ ભોરણીયા દ્વારા તેમજ બોટાદ ભજનાનંદ આશ્રમના મહંતશ્રી આત્માનંદ સરસ્વતીજી દ્વારા પ્રાસંગિક પ્રવચન આપવામાં આવ્યુ હતું. કાર્યક્રમમાં હિમાચલ પ્રદેશથી પધારેલા પૂજ્યશ્રી આચાર્ય આર્યનરેશ, સાંસદ શ્રી મોહનભાઈ કુંડારિયા, રાજ્યસભાના સદસ્યશ્રી કેસરીદેવસિંહ ઝાલા, જિલ્લા પંચાયતના પ્રમુખશ્રી હંસાબેન પારેઘી, ધારાસભ્ય સર્વશ્રી શ્રી કાંતિભાઈ અમૃતિયા, શ્રી દુર્લભજીભાઈ દેથરીયા, શ્રી પ્રકાશભાઈ વરમોરા, કલેકટરશ્રી જી.ટી. પંડ્યા, ઇન્ચાર્જ જિલ્લા વિકાસ અધિકારી શ્રી નવલદાન ગઢવી, પૂર્વમંત્રીશ્રી બ્રિજેશભાઈ મેરજા, સમિતિના પ્રમુખશ્રી જયંતિભાઈ રાજકોટિયા, આર્યસમાજના અગ્રણીશ્રીઓ શ્રી માવજીભાઈ દલસાણીયા, પશ્ચિમ ક્ષેત્રના સરસંચાલકશ્રી ડૉ.જયંતીભાઈ ભાડેસીયા, દાતાશ્રીઓ, આગેવાનશ્રીઓ, અધિકારીશ્રીઓ, મોરબીવાસીઓ ઉપસ્થિત રહ્યા હતા.
આ પણ વાંચોઃ અગ્નિપથ યોજનાને પડકારતી તમામ અરજી કેરળ હાઈકોર્ટે ફગાવી
