જ્યાં સુધી ભાજપ છે ત્યાં સુધી લઘુમતીઓને અનામત નહીં મળે; અમિત શાહની ચેતવણી

પલામુ, 9 નવેમ્બર : ઝારખંડ વિધાનસભા ચૂંટણી માટે ભાજપ પાસે મજબૂત પ્રચારક છે. દરમિયાન ગૃહમંત્રી અમિત શાહે પણ પલામુમાં એક વિશાળ જનસભાને સંબોધી હતી અને રાહુલ ગાંધીને ચેતવણી આપી હતી. તેમણે કહ્યું કે જ્યારે ભારતીય જનતા પાર્ટી હશે ત્યાં સુધી આ દેશમાં લઘુમતી સમુદાયને અનામત નહીં મળે. તેમણે કહ્યું, કોંગ્રેસ પાર્ટી અનામતની વાત કરે છે. બંધારણમાં ધર્મના આધારે અનામતની કોઈ જોગવાઈ નથી. અમે ક્યારેય કોઈ ચોક્કસ ધર્મને અનામત આપી શકીએ નહીં.

અમિત શાહે વધુમાં કહ્યું કે, મહારાષ્ટ્રમાં ઉલેમાના એક જૂથે તેમને (કોંગ્રેસ)ને એક મેમોરેન્ડમ આપ્યું હતું કે મુસ્લિમોને 10 ટકા અનામત આપવામાં આવે અને કોંગ્રેસ પાર્ટીના પ્રદેશ અધ્યક્ષે કહ્યું કે અમે તમને આમાં મદદ કરીશું.

અમિત શાહે કહ્યું કે, હું ઝારખંડના લોકોને પૂછવા આવ્યો છું કે જો મુસ્લિમોને 10 ટકા અનામત મળશે તો કોની અનામત ઓછી થશે? પછાત વર્ગો, દલિતો અને આદિવાસીઓ માટે અનામતમાં ઘટાડો થશે. હું અહીંથી રાહુલ ગાંધીને ચેતવણી આપવા માંગુ છું. રાહુલ બાબા, તમારા મનમાં ગમે તે ષડયંત્ર હોય, જ્યાં સુધી ભારતીય જનતા પાર્ટી છે ત્યાં સુધી આ દેશમાં લઘુમતીઓને અનામત નહીં મળે.

અમિત શાહે આરોપ લગાવ્યો કે, “રાહુલ ગાંધી બંધારણની નકલ બતાવે છે. બે દિવસ પહેલા તેનો પર્દાફાશ થયો હતો. એ નકલના ફ્રન્ટ પેજ પર ભારતનું બંધારણ લખેલું હતું પણ એમાં કન્ટેન્ટ નહોતું… બંધારણની મજાક ન કરો. વિશ્વાસનો પ્રશ્ન છે. બંધારણની નકલી નકલ બતાવીને તમે ભીમ રાવ આંબેડકર અને બંધારણ સભાનું અપમાન કર્યું છે. કોંગ્રેસ પાર્ટીએ બંધારણની મજાક કરી છે.

કેન્દ્રીય ગૃહમંત્રીએ કહ્યું કે વડાપ્રધાન નરેન્દ્ર મોદીએ 26 નવેમ્બરે બંધારણ દિવસ ઉજવવાનું નક્કી કર્યું છે. શાહે આક્ષેપ કર્યો હતો કે કોંગ્રેસ “ઓબીસી, આદિવાસીઓ અને દલિતો પાસેથી અનામત છીનવી લેવાનું વલણ ધરાવે છે” અને “તે લઘુમતીઓને આપવાનું આયોજન કર્યું છે”.

તેમણે કહ્યું, “કોંગ્રેસ અન્ય પછાત વર્ગો (ઓબીસી) માટે અનામતની વિરુદ્ધ છે, તેણે મહારાષ્ટ્રમાં ઉલેમાના પ્રતિનિધિમંડળ સાથેની બેઠક દરમિયાન લઘુમતીઓને 10 ટકા અનામત આપવાનું વચન આપ્યું છે. વડાપ્રધાન મોદીના નેતૃત્વમાં ભાજપ ક્યારેય ધર્મના આધારે અનામત નહીં આપે.

તેમણે કાશ્મીરમાં કલમ 370 પુનઃસ્થાપિત કરવાના કથિત પ્રયાસો માટે કોંગ્રેસ પર પણ નિશાન સાધ્યું હતું. શાહે કહ્યું, “કાશ્મીર ભારતનું અભિન્ન અંગ છે. હું રાહુલ ગાંધીને પડકાર આપું છું કે તમારી ચોથી પેઢી પણ કલમ 370 પાછી ન લાવી શકે.” તેમણે ઝારખંડમાં ઝારખંડ મુક્તિ મોરચા (JMM)ની આગેવાની હેઠળના ગઠબંધન પર પણ નિશાન સાધ્યું અને તેને દેશની ”સૌથી ભ્રષ્ટ સરકાર” ગણાવી. ઝારખંડના મુખ્યમંત્રી હેમંત સોરેન પર નિશાન સાધતા તેમણે કહ્યું કે, “મુખ્યમંત્રી કહે છે કે ઘૂસણખોરી એ ભાજપનો રાજકીય એજન્ડા છે. હું કહું છું કે આ મુખ્યમંત્રીની વોટબેંક છે અમે ભ્રષ્ટાચારીઓને ઉંધા લટકાવીશું.

આ પણ વાંચો : હવે ભારત પણ વૈશ્વિક મહાસત્તાઓની યાદીમાં સામેલ થવા હક્કદાર’, વ્લાદિમીર પુતિન