મધ્યમવર્ગને મોંઘવારીમાં રાહત, છૂટક ફુગાવાનો દર ઘટીને 5 ટકાની અંદર આવ્યો

નવી દિલ્હી, 12 ફેબ્રુઆરી : મોંઘવારીના મોરચે જનતા માટે સારા સમાચાર આવ્યા છે. બુધવારે સરકારે છૂટક ફુગાવાના આંકડા જાહેર કર્યા હતા જે રાહતરૂપ છે. જાન્યુઆરી મહિનામાં ફુગાવાનો દર ઘટીને 4.31 ટકા થયો હતો, જે પાંચ મહિનામાં તેનું સૌથી નીચું સ્તર છે. ખાસ કરીને ખાદ્ય ચીજો સસ્તી થવાને કારણે છૂટક ફુગાવામાં આ ઘટાડો નોંધાયો છે. ગયા મહિને ડિસેમ્બરમાં તે 5.22 ટકા હતો. જ્યારે એક વર્ષ અગાઉના સમાન સમયગાળામાં તે 5.1 ટકા હતો.

ખાદ્ય ફુગાવાના દરમાં ઘટાડો

CPI આધારિત છૂટક ફુગાવામાં ઘટાડા માટે ખાદ્યપદાર્થોના ફુગાવાના ઘટાડાએ મહત્વની ભૂમિકા ભજવી છે. બુધવારે સરકાર દ્વારા જારી કરવામાં આવેલા સત્તાવાર આંકડામાં કહેવામાં આવ્યું છે કે ખાદ્ય મોંઘવારી દર જાન્યુઆરીમાં 6.02 ટકા હતો, જે અગાઉના મહિનામાં ડિસેમ્બરમાં 8.39 ટકા હતો. જ્યારે ગયા વર્ષે જાન્યુઆરીમાં આ આંકડો 8.3 ટકા નોંધાયો હતો. નોંધનીય છે કે દેશમાં રિટેલ ફુગાવો હવે ભારતીય રિઝર્વ બેંક (RBI) દ્વારા નિર્ધારિત મર્યાદાની નજીક આવી ગયો છે, જે 2-4 ટકા છે.

અપેક્ષા કરતાં વધુ સારા આંકડા

બુધવારે જાહેર કરાયેલા આંકડા રિટેલ ફુગાવાના સંદર્ભમાં નિષ્ણાતો અને રિઝર્વ બેન્ક ઓફ ઈન્ડિયા દ્વારા કરવામાં આવેલા અંદાજ કરતાં પણ વધુ સારા હતા. મહત્વનું છે કે નિષ્ણાતો જાન્યુઆરીમાં રિટેલ મોંઘવારી 4.5 ટકા રહેવાનો અંદાજ લગાવી રહ્યા હતા. તાજેતરમાં મળેલી MPCની બેઠક બાદ ગવર્નરે આ ક્વાર્ટરમાં ફુગાવાનો દર 4.4% રહેવાનો અંદાજ મૂક્યો છે.

મોંઘવારી અંકુશમાં હોવાથી આ આશા જાગી છે

તાજેતરમાં ભારતીય રિઝર્વ બેંકે પાંચ વર્ષ પછી રેપો રેટમાં ઘટાડો કર્યો હતો અને લોન લેનારાઓને મોટી રાહત આપી હતી. આ પછી મોંઘવારી મોરચે પણ મોટી રાહત મળી છે. આ સાથે, ફુગાવાનો દર RBIની નિર્ધારિત મર્યાદામાં આવ્યા પછી, રેપો રેટમાં વધુ એક કાપની અપેક્ષા વધી છે. લેટેસ્ટ કટ બાદ રેપો રેટ 6.50 ટકાથી ઘટીને 6.25 ટકા થઈ ગયો છે.

ઔદ્યોગિક ઉત્પાદનમાં ઘટાડો

રિટેલ ફુગાવાના આંકડા જાહેર કરવાની સાથે સરકારે ડિસેમ્બર 2024માં ઔદ્યોગિક ઉત્પાદનના આંકડા પણ રજૂ કર્યા છે અને તેની ગતિ ઘટીને 3.2 ટકા થઈ ગઈ છે. માઇનિંગ અને મેન્યુફેક્ચરિંગ સેક્ટરની સુસ્ત કામગીરીને કારણે ડિસેમ્બરમાં દેશના ઔદ્યોગિક ઉત્પાદનના વિકાસ દરમાં ઘટાડો થયો છે. આના એક વર્ષ પહેલા ડિસેમ્બર 2023માં ઔદ્યોગિક ઉત્પાદનના આંકડા 4.4 ટકા વધ્યા હતા.

આ પણ વાંચો :- PM નરેન્દ્ર મોદીએ ગૂગલના CEO સુંદર પિચાઈ સાથે મુલાકાત કરી, ભારત માટે AI અંગે થઈ ચર્ચા