લિવ-ઈન રિલેશનશિપના કેસમાં પુરુષોને આ મામલે દોષિત ન ઠેરવી શકાય: HCની મહત્ત્વની ટિપ્પણી
- કલમ 498A હેઠળ પતિ અથવા તેના સંબંધીઓ દ્વારા મહિલા સાથે કરવામાં આવેલી ક્રૂરતા સામે સજાની જોગવાઈ: કેરળ હાઇકોર્ટ
કોચી, 12 જુલાઇ: કેરળ હાઈકોર્ટે લિવ-ઈન રિલેશનશિપને લઈને મહત્ત્વપૂર્ણ નિવેદન આપ્યું છે. કેરળ હાઈકોર્ટે તાજેતરના એક નિર્ણયમાં જણાવ્યું હતું કે, લિવ-ઈન રિલેશનશિપના કિસ્સામાં કોઈ મહિલા વિરુદ્ધ પતિ અથવા તેના સંબંધીઓ દ્વારા ક્રૂરતાની સજાની જોગવાઈ લાગુ પડતી નથી. હાઈકોર્ટે કહ્યું કે, ભારતીય દંડ સંહિતાની કલમ 498A હેઠળ પતિ અથવા તેના સંબંધીઓ દ્વારા મહિલા સાથે ક્રૂરતા કરવામાં આવે તો તેના પર સજાની જોગવાઈ કરવામાં આવી છે. કોર્ટે વધુમાં કહ્યું કે, લિવ-ઈન રિલેશનશિપમાં રહેતા યુગલ પરણિત ન હોવાથી તે પુરુષ ‘પતિ’ શબ્દના દાયરામાં નહીં આવે.
Woman’s Partner In Live-In Relationship Cannot Be Prosecuted For Offence Of Cruelty U/S 498A IPC: Kerala High Court | @TellmyJolly https://t.co/CSerlJtSWI
— Live Law (@LiveLawIndia) July 11, 2024
હાઈકોર્ટે આ મામલે શું કહ્યું?
ચુકાદો આપતા, જસ્ટિસ એ બદરુદ્દીને 8મી જુલાઈના રોજના તેમના આદેશમાં જણાવ્યું હતું કે, “આ રીતે, લગ્ન એ એક તત્વ છે જે સ્ત્રીના જીવનસાથીને તેના પતિના દરજ્જા સુધી પહોંચાડે છે. કાયદાની નજરમાં લગ્ન એટલે લગ્ન. આમ, કાયદેસર લગ્ન વિના, જો કોઈ પુરુષ સ્ત્રીનો જીવનસાથી બને છે, તો તે IPCની કલમ 498Aના હેતુ માટે ‘પતિ’ શબ્દના દાયરામાં આવશે નહીં.”
શું છે સમગ્ર મામલો?
હકીકતમાં, આ આદેશ એક વ્યક્તિની અરજી પર કરવામાં આવ્યો હતો, જેમાં ભારતીય દંડ સંહિતાની કલમ 498A હેઠળ તેની વિરુદ્ધ શરૂ કરવામાં આવેલી કાર્યવાહીને રદ્દ કરવાની વિનંતી કરવામાં આવી હતી. તેમની સામેના કેસને રદ્દ કરવાની માંગ કરતા, વ્યક્તિએ દલીલ કરી હતી કે, તે ફરિયાદી મહિલા સાથે લિવ-ઈન રિલેશનશિપમાં હતો અને તેમની વચ્ચે કોઈ કાનૂની લગ્ન થયાં નથી. તેથી, ભારતીય દંડ સંહિતાની કલમ 498A હેઠળ ગુનો બનતો નથી. હાઈકોર્ટે અરજદાર સાથે સંમત થઈ અને કહ્યું કે, તેણે મહિલા સાથે લગ્ન કર્યા ન હોવાથી, તે ભારતીય દંડ સંહિતાની કલમ 498Aમાં આપવામાં આવેલી ‘પતિ’ની વ્યાખ્યાના દાયરામાં નહીં આવે.
આ પણ જૂઓ: અરવિંદ કેજરીવાલને સુપ્રીમ કોર્ટમાંથી મોટી રાહત: વચગાળાના જામીન થયાં મંજૂર
