પૂર્વ PM મનમોહન સિંહની યાદમાં સ્મારક બનાવાશે, કેન્દ્ર સરકારની જાહેરાત

• ગૃહમંત્રી અમિત શાહે ખડગે અને પૂર્વ PMના પરિજનોને જાણ કરી

નવી દિલ્હી, 28 ડિસેમ્બર : કેન્દ્ર સરકારે પૂર્વ વડાપ્રધાન ડો.મનમોહન સિંહની યાદમાં રાષ્ટ્રીય રાજધાનીમાં એક સ્મારક બનાવવાનો નિર્ણય કર્યો છે. કેન્દ્રીય ગૃહ મંત્રાલય દ્વારા આ માહિતી આપવામાં આવી છે. એક અખબારી યાદી બહાર પાડીને ગૃહ મંત્રાલયે કહ્યું કે શુક્રવારે સવારે સરકારને કોંગ્રેસ પાર્ટીના અધ્યક્ષ તરફથી ભૂતપૂર્વ વડાપ્રધાન સ્વર્ગસ્થ ડૉ. મનમોહન સિંહના સ્મારક માટે જગ્યા ફાળવવાની વિનંતી મળી હતી.

કેબિનેટની બેઠક પછી તરત જ ગૃહ પ્રધાન અમિત શાહે કોંગ્રેસ અધ્યક્ષ ખડગે અને સ્વર્ગસ્થ ડૉ. મનમોહન સિંહના પરિવારને કહ્યું કે સરકાર સ્મારક માટે જગ્યા ફાળવશે.  આ દરમિયાન અંતિમ સંસ્કાર અને અન્ય ઔપચારિકતાઓ પૂર્ણ થઈ શકે છે, કારણ કે ટ્રસ્ટની રચના કરવી પડશે અને તેના માટે જગ્યા ફાળવવી પડશે.

કોંગ્રેસની આગેવાની હેઠળની યુપીએ સરકારનું નેતૃત્વ કરનાર અને આર્થિક સુધારા માટે જાણીતા ડૉ.મનમોહન સિંહનું ગુરુવારે 92 વર્ષની વયે અવસાન થયું હતું. તેમણે 2004 થી 2014 સુધી ભારતના વડાપ્રધાન તરીકે 10 વર્ષ સુધી દેશનું નેતૃત્વ કર્યું હતું.

કોંગ્રેસે આ આક્ષેપો કર્યા હતા

કોંગ્રેસે શુક્રવારે આરોપ લગાવ્યો હતો કે મનમોહન સિંહના અંતિમ સંસ્કાર અને સ્મારક માટે સ્થળ નક્કી ન કરવું એ દેશના પ્રથમ શીખ વડાપ્રધાનનું ઈરાદાપૂર્વકનું અપમાન છે.  કોંગ્રેસે આ મુદ્દો ત્યારે ઉઠાવ્યો જ્યારે કેન્દ્રીય ગૃહ મંત્રાલયે પોતાના નિવેદનમાં કહ્યું કે મનમોહન સિંહના અંતિમ સંસ્કાર દિલ્હીના નિગમબોધ ઘાટ પર શનિવારે સવારે 11:45 વાગ્યે પૂર્ણ રાજ્ય સન્માન સાથે કરવામાં આવશે.

આ પણ વાંચો :- છેવટે BZ ગ્રુપના કૌભાંડી ભૂપેન્દ્ર ઝાલા સુધી કાયદાના હાથ પહોંચી ગયાઃ મહેસાણાથી ધરપકડ