મુંબઈના ધારાવીમાં ભીષણ આગ, હાર્બર લાઇનની લોકલ ટ્રેન સેવાઓ ખોરવાઈ

મુંબઈના ધારાવી વિસ્તારમાં શનિવારે (22 નવેમ્બર) બપોરે ભીષણ આગ લાગી હતી જેના કારણે લોકોમાં ભયનો માહોલ છવાયો હતો. રેલ્વે ક્રોસિંગ અને નૂર રેસ્ટોરન્ટ પાસે પ્લોટ નંબર 1, નવરંગ કમ્પાઉન્ડમાં આવેલા એક ગોડાઉનમાં આગ લાગી હતી. આગની જ્વાળાઓ જોતાં સ્થાનિક રહેવાસીઓએ તાત્કાલિક ફાયર બ્રિગેડને જાણ કરી હતી જેના કારણે અનેક ફાયર એન્જિન ઘટનાસ્થળે પહોંચી ગયા હતા અને આગને કાબુમાં લેવાના પ્રયાસો શરૂ કર્યા હતા.

અહેવાલો અનુસાર, આગ ગ્રાઉન્ડ પ્લસ વન સ્ટ્રક્ચર્ડ સ્લમ-ગોડાઉન સુધી મર્યાદિત છે. આગને લેવલ 1 ફાયર કોલ જાહેર કરવામાં આવી છે. સદનસીબે અત્યાર સુધી કોઈ ઈજાના અહેવાલ નથી. BMCનું મુંબઈ ફાયર બ્રિગેડ (MAB), પોલીસ, 108 એમ્બ્યુલન્સ અને BMC વોર્ડ સ્ટાફ ઘટનાસ્થળે બચાવ કામગીરીમાં જોડાયા છે.

હાર્બર લાઇન લોકલ ટ્રેન સેવાઓ ખોરવાઈ

આગ નજીકના માહિમ સ્ટેશન વિસ્તારમાં ફેલાઈ ગઈ હતી જ્યાં અનેક ઝૂંપડીઓ આગમાં લપેટાઈ ગઈ છે. અહેવાલો અનુસાર બપોરે 12:15 વાગ્યાની આસપાસ આગ લાગી હતી. આગ ઓલવવા માટે અનેક ફાયરની ગાડીઓ ઘટનાસ્થળે પહોંચી હતી. હાલમાં આગને કાબુમાં લેવા માટે સાત ફાયરની ગાડીઓ અને સાત વોટર જેટી સંપૂર્ણ ક્ષમતાથી કામ કરી રહ્યા છે. આગને કારણે હાર્બર લાઇન પર લોકલ ટ્રેન સેવાઓ પ્રભાવિત થઈ છે.

આગની તીવ્રતાને કારણે ફાયર અધિકારીઓ બચાવ કામગીરી ચાલુ રખાઈ છે અને હાલ આગ કાબૂમાં આવી રહી છે.

વીજ પુરવઠો કાપી નાખવામાં આવ્યો

પશ્ચિમ રેલ્વેએ સોશિયલ મીડિયા પ્લેટફોર્મ પર એક પોસ્ટમાં લખ્યું છે કે, “માહિમ અને બાંદ્રા વચ્ચે પૂર્વ બાજુએ હાર્બર લાઇન પર ઝૂંપડપટ્ટીઓમાં બપોરે 12:15 વાગ્યે લાગેલી આગને કારણે સલામતીના પગલા તરીકે ઓવરહેડ સાધનોનો વીજ પુરવઠો કાપી નાખવામાં આવ્યો છે. આને ધ્યાનમાં રાખીને પરિસ્થિતિ નિયંત્રણમાં ન આવે ત્યાં સુધી હાર્બર લાઇન ટ્રેન સેવાઓને નિયંત્રિત કરવામાં આવી છે.”

રેલવેએ પોસ્ટમાં વધુમાં જણાવ્યું હતું કે કોઈપણ મુસાફરો અથવા ટ્રેનોને કોઈ જોખમ નથી કારણ કે તેઓ નિયંત્રિત કરવામાં આવ્યા છે અને ઘટનાસ્થળથી દૂર છે.