Maruti કંપની ટૂંક સમયમાં લોન્ચ કરશે ‘Air Copter’, આકાશમાં ઉડશે કાર!
12 ફેબ્રુઆરી, 2024: પેટ્રોલ અને CNG વાહનો બાદ હવે મારુતિ સુઝુકી Air Copter લોન્ચ કરવાની તૈયારી કરી રહી છે. દેશની અગ્રણી કાર ઉત્પાદક કંપની મારુતિ તેની જાપાની મૂળ કંપની સુઝુકી કોર્પોરેશન સાથે ઉડતા ઇલેક્ટ્રિક વાહન (Air Copter)ની ટેક્નોલોજી વિકસાવી રહી છે. બહુ જલ્દી તમે આ કારને આકાશમાં ઉડતી જોશો. એર કોપ્ટરની સૌથી ખાસ વાત એ છે કે તેનું વજન ખૂબ જ હળવું હશે, જેના કારણે તેને છત પર પણ લેન્ડ કરી શકાય છે.
રિપોર્ટ્સ અનુસાર, મારુતિનું એર કોપ્ટર ડ્રોન કરતાં કદમાં મોટું હશે, પરંતુ હેલિકોપ્ટર કરતાં નાનું હશે. તેમાં ત્રણ લોકો સાથે ઉડવાની ક્ષમતા હશે. એર કોપ્ટર સૌથી પહેલા જાપાન અને અમેરિકાના માર્કેટમાં લોન્ચ કરવામાં આવશે, ત્યારબાદ તેને ભારતમાં પણ લોન્ચ કરવામાં આવશે. એવા અહેવાલો પણ છે કે મેન્યુફેક્ચરિંગ કોસ્ટ ઓછી રાખવા માટે કંપની ભારતમાં તેનું ઉત્પાદન શરૂ કરી શકે છે.
2025માં લોન્ચ થઈ શકે છે
મારુતિનું ઇલેક્ટ્રિક Air Copter સ્કાયડ્રાઈવના નામથી લોન્ચ થઈ શકે છે. તેને ઉડવા માટે 12 ઈલેક્ટ્રીક મોટર અને રોટરનો ઉપયોગ કરવામાં આવશે. એવી માહિતી પણ છે કે તેને 2025માં જાપાનમાં યોજાનાર ઓસાકા એક્સપોમાં રજૂ કરવામાં આવી શકે છે. એક સમાચાર અનુસાર, સુઝુકી મોટર હાલમાં ભારતમાં સંભવિત ગ્રાહકો અને ભાગીદારોને ઓળખવા માટે બજાર સંશોધન કરી રહી છે. કંપનીનું માનવું છે કે ભારતમાં સફળ થવા માટે Air Copter સસ્તા હોવા જોઈએ.
Air Copter છત પરથી ઉડી શકશે
રિપોર્ટમાં દાવો કરવામાં આવ્યો છે કે આ Air Copter 1.4 ટનના ટેક-ઓફ વજન સાથે મુસાફરો સાથે ઉડી શકશે. Air Copterનું વજન પરંપરાગત હેલિકોપ્ટર કરતા અડધું હશે. તેના ઓછા વજનને કારણે તે ટેકઓફ અને લેન્ડિંગ માટે બિલ્ડીંગ રૂફટોપનો ઉપયોગ કરી શકે છે. વધુમાં, વિદ્યુતીકરણને કારણે, એરક્રાફ્ટના ભાગોની સંખ્યામાં નોંધપાત્ર ઘટાડો થયો છે, જેના પરિણામે ઉત્પાદન અને જાળવણી ખર્ચમાં ઘટાડો થયો છે.
