મેડલની “હેટ્રિક” ચૂકી મનુ ભાકરઃ મહિલાઓની 25 મીટર પિસ્તોલ ઈવેન્ટની ફાઇનલમાં ચોથા સ્થાને રહી

પેરિસ, 03 ઓગસ્ટ : આજે મનુ ભાકર પેરિસ ઓલિમ્પિક 2024માં મહિલાઓની 25 મીટર પિસ્તોલ સ્પર્ધામાં મેડલ મેળવવાનું લક્ષ્ય રાખતી હતી. તે આ ઓલિમ્પિકમાં બે બ્રોન્ઝ મેડલ જીતી ચૂકી છે. જોકે, તે ત્રીજો મેડલ ચૂકી ગઈ હતી અને ઇવેન્ટમાં તે ચોથા સ્થાને રહી હતી.

આઠમી સિરીઝમાં મનુ અને વેરોનિકા મેજર વચ્ચે હતી લડાઈ

મળતી માહિતી મુજબ ભારતની સ્ટાર શૂટર મનુ ભાકર ત્રીજો મેડલ ચુકી ગઈ છે. તે મહિલાઓની 25 મીટર પિસ્તોલ સ્પર્ધામાં ચોથા સ્થાને રહી હતી. આ સ્પર્ધામાં કુલ 10 શ્રેણીના શોટ ચલાવવાના હતા. એક સિરીઝમાં કુલ પાંચ શોટ હતા. ત્રણ શ્રેણી પછી એલિમિનેશનનો રાઉન્ડ શરૂ થયો. મનુ 28ના સ્કોર સાથે આઠ શ્રેણી બાદ ચોથા સ્થાને રહી. મતલબ કે મનુના 40માંથી 28 શોટ ગ્રીન થયા. બાકીના લક્ષ્યને હિટ કરી શક્યા નહીં. આઠમી શ્રેણીમાં, તેણી અને હંગેરીની ચોથા ક્રમાંકિત વેરોનિકા મેજર વચ્ચે લડાઈ હતી. આ શ્રેણીમાં મનુ ત્રણ શોટ ચૂકી ગઈ, જ્યારે વેરોનિકા બે શોટ ચૂકી ગઈ અને ત્રણ શોટ ટાર્ગેટ પર આવતા તે મનુથી આગળ નીકળી ગઈ. આ રીતે મનુ મેડલ ચૂકી ગઈ હતી અને વેરોનિકાએ બ્રોન્ઝ કબજે કર્યો હતો.

આ પણ વાંચો : ઓલિમ્પિકમાં પ્રેમનો ઈઝહાર..! ગોલ્ડ જીતનાર ખેલાડીને મેચ બાદ સાથી ખેલાડીએ કર્યું પ્રપોઝ, જુઓ વીડિયો

દક્ષિણ કોરિયાની જિન યાંગે ગોલ્ડ જીત્યો

આ ઇવેન્ટમાં દક્ષિણ કોરિયાની જિન યાંગે ગોલ્ડ જીત્યો હતો જયારે ફ્રાન્સની કેમિલે સિલ્વર મેડલ જીત્યો હતો. 10 સિરીઝ બાદ બંનેનો સ્કોર 37-37 હતો. ત્યારપછી બંને વચ્ચે શૂટઆઉટ થયું, જેમાં જીને ટાર્ગેટ પર ચાર ગોળી ચલાવી, જ્યારે કેમિલની માત્ર એક જ ગોળી નિશાન પર વાગી હતી. આમ જિને ગોલ્ડ મેડલ જીત્યો હતો અને કેમિલના ફાળે સિલ્વર મેડલ આવ્યો હતો.

મનુ ભાકર અગાઉ બે બ્રોન્ઝ જીતી ચૂકી છે

ભારતની સ્ટાર શૂટર મનુ ભાકર પેરિસ ઓલિમ્પિકમાં અગાઉ બે બ્રોન્ઝ મેડલ જીતી ચૂકી છે અને આજે તે મેડલની હેટ્રિક કરવાનો લક્ષ્યાંક રાખતી હતી. તેણીએ મહિલાઓની 10 મીટર એર પિસ્તોલ સ્પર્ધા અને 10 મીટર એર પિસ્તોલ મિશ્રિત ટીમ ઇવેન્ટમાં બ્રોન્ઝ મેડલ જીત્યો હતો. તેણે બંને ઈવેન્ટમાં મેડલ જીતીને ઈતિહાસ રચ્યો હતો.

આ પણ વાંચો : લક્ષ્ય સેન ફાઈનલમાં પ્રવેશવા માટે મેદાનમાં: જાણો ક્યારે, કોની સામે અને કયા સમયે સેમીફાઈનલ રમાશે?