મણિપુર હિંસા: 2 વિદ્યાર્થીઓના મૃતદેહોની તસવીર વાયરલ થતાં મણિપુરમાં તણાવ વધ્યો, CBIની ટીમ તપાસ માટે પહોંચી

• જુલાઈમાં ગુમ થયેલા બે યુવકોના અપહરણ અને હત્યા બાદ મણિપુરની રાજધાની ઈમ્ફાલમાં ફરી તણાવ ચાલુ થઈ ગયો છે. હત્યારાઓને પકડવા માટે ઇમ્ફાલમાં રેલી કાઢવામાં આવી હતી.

મણિપુર હિંસા: મણિપુરમાં બે વિદ્યાર્થીઓના અપહરણ અને હત્યાની તપાસ માટે સીબીઆઈની ટીમ આજે બુધવારે (27 સપ્ટેમ્બર) એક વિશેષ ફ્લાઈટ દ્વારા ઈમ્ફાલ પહોંચી હતી. આ ટીમનું નેતૃત્વ એજન્સીના વિશેષ નિર્દેશક અજય ભટનાગર કરી રહ્યા છે.

જુલાઈમાં ગુમ થયેલા બે વિદ્યાર્થીઓના અપહરણ અને હત્યાના વિરોધમાં આયોજિત રેલીમાં વિદ્યાર્થીઓ ભાગ લઈ રહ્યા હતા. ગુમ થયેલા વિદ્યાર્થીઓની તસવીરો તાજેતરમાં સોશિયલ મીડિયા પર વાયરલ થઈ હતી. અધિકારીઓએ જણાવ્યું કે વિદ્યાર્થીઓ ‘વી વોન્ટ જસ્ટિસ’ના નારા લગાવતા મુખ્યમંત્રી બિરેન એન સિંહના બંગલા તરફ આગળ વધી રહ્યા હતા.

હત્યારાઓની ધરપકડ કરવાની માંગ

રેલીનું નેતૃત્વ કરી રહેલા વિદ્યાર્થી નેતા લેંથેંગબાએ મીડિયા સાથે વાત કરતા બંને યુવકોની હત્યા કરનારાઓની ધરપકડ કરવાની માંગ કરી હતી. તેમણે કહ્યું કે, “અમે માંગણી કરીએ છીએ કે બે યુવાનોના હત્યારાઓને 24 કલાકની અંદર ધરપકડ કરવામાં આવે અને તેમના મૃતદેહ અગ્નિસંસ્કાર માટે લાવવામાં આવે”.

વિદ્યાર્થી નેતાએ કહ્યું, “અમે અમારી ફરિયાદો અંગે મુખ્યમંત્રીને મળવા માંગીએ છીએ. અમારા મિત્રો અને સહકર્મીઓની નિર્દયતાથી હત્યા કરવામાં આવી રહી છે. આવા સંજોગોમાં અમે અમારો અભ્યાસ કેવી રીતે ચાલુ રાખી શકીએ.”

આ પણ વાંચો: મણિપુરમાં વધ્યો તણાવ, 5 દિવસ ફરી ઈન્ટરનેટ સેવા બંધ

વિદ્યાર્થીઓએ પથ્થરમારો કર્યો

વિદ્યાર્થીઓના ગુસ્સાને શાંત કરવા માટે, પોલીસે જાહેરાત કરી કે તે વિદ્યાર્થી પ્રતિનિધિઓને મુખ્યમંત્રી અને રાજ્યપાલ બંનેને મળવા દેવાની વ્યવસ્થા કરી રહી છે, અધિકારીઓએ જણાવ્યું હતું. આ દરમિયાન કેટલાક વિદ્યાર્થીઓએ પથ્થરમારો શરૂ કરી દીધો અને પરિસ્થિતિ અચાનક વણસી ગઈ હતી.

RAF અને સ્થાનિક લોકો વચ્ચે અથડામણ

આ પછી સુરક્ષાકર્મીઓ એક્શનમાં આવ્યા અને ભીડને વિખેરવા માટે ટીયર ગેસના અનેક રાઉન્ડ ફાયર કર્યા. આ પહેલા મંગળવારે (26 સપ્ટેમ્બર) RAFના જવાનો અને સ્થાનિક લોકો વચ્ચે ઘર્ષણ થયું હતું. જેમાં 45 લોકો ઘાયલ થયા હતા. ઘાયલોમાં મોટી સંખ્યામાં વિદ્યાર્થીઓ જ હતા.

આ પણ વાંચો: મણિપુર હિંસા પર ખડગેની CM બિરેન સિંહને બરતરફ કરવાની માંગ