મણિપુરમાં મહિલાઓને નિર્વસ્ત્ર ફેરવવાના કેસમાં 2 આરોપીઓની ધરપકડ, CMએ કહ્યું- દોષિતોને બક્ષવામાં નહીં આવે
મણિપુરમાં બે મહિલાઓની નિર્વસ્ત્ર પરેડ કરવાના કેસમાં બે આરોપીઓની ધરપકડ કરવામાં આવી છે. મણિપુરના મુખ્યમંત્રી એન બિરેન સિંહે કહ્યું કે આ માનવતા વિરુદ્ધ ગુનો છે. અમે વીડિયો જોયા બાદ તરત જ ઓપરેશન શરૂ કર્યું. સવારે એક આરોપીની ધરપકડ કરવામાં આવી હતી, હવે બીજા આરોપીની ધરપકડ કરવામાં આવી છે.
મુખ્યમંત્રીએ કહ્યું કે વિડિયો અમારી નજરમાં આવતા જ અમે આરોપીઓની ઓળખ કરી અને કાર્યવાહી કરી. અમે એક મિનિટ પણ બગાડ્યો નથી. અત્યાર સુધીમાં બે આરોપીઓની ધરપકડ કરવામાં આવી છે. CMએ કહ્યું કે દોષિતોને બક્ષવામાં આવશે નહીં. આ ઘટનામાં સંડોવાયેલા અન્ય લોકોની પણ વહેલી તકે ધરપકડ કરવામાં આવશે. બાબતે તપાસ ચાલુ છે. અગાઉ, CMએ કહ્યું હતું કે તેઓ તમામ આરોપીઓ સામે કડક કાર્યવાહી સુનિશ્ચિત કરશે અને મૃત્યુદંડ મેળવવાનો પણ પ્રયાસ કરશે.
આ પણ વાંચોઃ મણિપુરમાં મહિલાઓને નિર્વસ્ત્ર ફેરવવાનો વીડિયો વાયરલ, CM બીરેન સિંહનું ચોંકાવનારૂ નિવેદન
મણિપુરના રાજ્યપાલે માહિતી લીધી
આ મામલે મણિપુરના રાજ્યપાલ અનુસુયા ઉઇકેએ કહ્યું કે આ ઘટના નિંદનીય છે. મેં ડીજીપીને ફોન કરીને તમામ આરોપીઓની વહેલી તકે ધરપકડ કરવા સૂચના આપી હતી. મેં તેને પૂછ્યું કે જે પોલીસ સ્ટેશનમાં એફઆઈઆર દાખલ કરવામાં આવી છે ત્યાં કોઈ કાર્યવાહી કેમ કરવામાં આવી નથી. જો પોલીસકર્મીઓ દોષિત જણાશે તો તેમની સામે પણ કડક કાર્યવાહી કરવામાં આવશે.
“સંવાદ દ્વારા જ ઉકેલ શક્ય છે”
રાજ્યપાલે કહ્યું કે દરેક વ્યક્તિએ એક મંચ પર બેસીને પોતાની માંગણીઓ રજૂ કરવી જોઈએ, વાતચીત દ્વારા જ ઉકેલ મળી શકે છે. હિંસાથી કોઈને ફાયદો થતો નથી. સંવાદ દ્વારા જ ઉકેલ શક્ય છે. રાજ્યપાલે ડીજીપીને જો જરૂર પડે તો પીડિતોને વિશેષ સુરક્ષા આપવા પણ કહ્યું છે.
મણિપુરમાં વિરોધ પ્રદર્શન
આ ઘટનાના વિરોધમાં ઈન્ડીજીનસ ટ્રાઈબલ લીડર્સ ફોરમ (આઈટીએલએફ) એ ગુરુવારે મણિપુરમાં રેલી પણ કાઢી હતી. આ ઘટના 4 મેની છે. જેનો વીડિયો હવે સામે આવ્યો છે. આ વીડિયોમાં જોઈ શકાય છે કે બદમાશોનું ટોળું બે મહિલાઓની નગ્ન પરેડ કરી રહ્યું છે. આરોપ છે કે મહિલાઓ સાથે ગેંગ રેપ પણ થયો છે.
વિપક્ષે ભાજપ પર આકરા પ્રહારો કર્યા હતા
આ ઘટનાનો વીડિયો સામે આવ્યા બાદ વિપક્ષ પણ ભાજપ સરકાર પર આકરા પ્રહારો કરી રહ્યા છે. કોંગ્રેસ સહિત અન્ય વિપક્ષી દળોએ મુખ્યમંત્રી એન. બિરેન સિંહના રાજીનામાની અને રાજ્યમાં રાષ્ટ્રપતિ શાસન લાદવાની માંગ કરી છે.
કોંગ્રેસ અધ્યક્ષ મલ્લિકાર્જુન ખડગેએ કહ્યું કે મણિપુરમાં માનવતા મરી ગઈ છે. મહિલાઓ પર બળાત્કાર થઈ રહ્યો છે અને પીએમ મોદી ચૂપ બેઠા છે. તમને જણાવી દઈએ કે મણિપુરમાં બે મહિનાથી ચાલી રહેલી હિંસામાં અત્યાર સુધીમાં લગભગ 160 લોકોના મોત થયા છે.
