ભાજપ પર ‘દીદી’ના પ્રહારઃ જાણો- ભાજપના શાસનની કોની સાથે કરી સરખામણી?

પશ્ચિમ બંગાળના મુખ્યમંત્રી મમતા બેનર્જીએ આરોપ લગાવ્યો કે ભાજપનું શાસન હિટલર અને સ્ટાલિન કરતા પણ ખરાબ છે. મુખ્યમંત્રી મમતા બેનર્જીએ કહ્યું કે ભારતીય જનતા પાર્ટીના નેતૃત્વવાળી કેન્દ્ર સરકાર દેશના સંઘીય માળખાને નષ્ટ કરી રહી છે. મમતાએ કેન્દ્ર સરકાર પર એજન્સીઓનો ઉપયોગ કરીને રાજ્યના મામલામાં હસ્તક્ષેપ કરવાનો પણ આરોપ લગાવ્યો.

કોલકાતામાં એક કોન્ફરન્સને સંબોધતા મમતા બેનર્જીએ દાવો કર્યો હતો કે, “ભાજપનું શાસન એડોલ્ફ હિટલર, જોસેફ સ્ટાલિન કે બેનિટો મુસોલિની કરતા પણ ખરાબ છે.” તેમણે કહ્યું કે લોકશાહીની રક્ષા માટે કેન્દ્રીય એજન્સીઓને સ્વાયત્તતા આપવી જોઈએ. “એજન્સીઓને સ્વાયત્તતા આપવી જોઈએ અને કોઈપણ રાજકીય હસ્તક્ષેપ વિના યોગ્ય રીતે કામ કરવાની છૂટ આપવી જોઈએ,”

મમતા બેનર્જીએ વધુમાં કહ્યું કે “ભાજપની આગેવાની હેઠળની કેન્દ્ર સરકાર રાજ્યની બાબતોમાં દખલ કરવા માટે કેન્દ્રીય એજન્સીઓનો ઉપયોગ કરી રહી છે. દેશમાં તુગલકી શાસન અમલમાં છે. તે જ સમયે, કેન્દ્ર દ્વારા ઈંધણના દરોમાં ઘટાડો કરવાની અને ઉજ્જવલા યોજનાના લાભાર્થીઓને એલપીજી પર 200 રૂપિયાની સબસિડી આપવાની જાહેરાત પર મમતા બેનર્જીએ કહ્યું કે ભાજપ કોઈપણ ચૂંટણી પહેલા આવું કરે છે. ઉજ્જવલા યોજના હેઠળ બીપીએલ કેટેગરીમાં માત્ર એક નાનો ભાગ છે. ગરીબ લોકો 800 રૂપિયામાં ઘરેલું ગેસ કેવી રીતે ખરીદશે?”

તમને જણાવી દઈએ કે, એક મોટી રાહત આપતા કેન્દ્ર સરકારે શનિવારે પેટ્રોલ અને ડીઝલ પરની એક્સાઈઝ ડ્યુટીમાં ઘટાડો કર્યો છે. કેન્દ્ર સરકારે પેટ્રોલ પર 8 રૂપિયા અને ડીઝલ પર 6 રૂપિયાનો ટેક્સ ઘટાડ્યો છે. જે બાદ પેટ્રોલ 9.50 રૂપિયા અને ડીઝલ 7 રૂપિયા સસ્તુ થયું છે. પેટ્રોલ અને ડીઝલ ઉપરાંત, સરકારે ગેસ સિલિન્ડર ખરીદનારાઓને પણ રાહત આપી હતી અને ઉજ્જવલા યોજનાના લાભાર્થીઓને ગેસ સિલિન્ડર દીઠ 200 રૂપિયાની સબસિડી આપવાનો નિર્ણય કર્યો હતો. આની જાહેરાત કરતાં નિર્મલા સીતારમણે કહ્યું, “પ્રધાનમંત્રી ઉજ્જવલા યોજનાના 9 કરોડથી વધુ લાભાર્થીઓને અમે ગેસ સિલિન્ડર દીઠ 200 રૂપિયાની સબસિડી આપીશું. આ અમારી માતાઓ અને બહેનોને મદદ કરશે.”