પાકિસ્તાન કરતાં મોટું છે મહારાષ્ટ્રનું અર્થતંત્રઃ ગુજરાત સહિત ટોચના પાંચ રાજ્યોનું શું છે ચિત્ર?

મુંબઈ, 26 જુલાઈ : દેશના ઘણા રાજ્યોમાં 1 ટ્રિલિયન ડોલરની અર્થવ્યવસ્થા બનવાની રેસ ચાલી રહી છે. હાલમાં મહારાષ્ટ્રની અર્થવ્યવસ્થા દેશમાં સૌથી મોટી છે. તેની અર્થવ્યવસ્થાનું કદ 439 અબજ ડોલર છે જ્યારે પાકિસ્તાનની અર્થવ્યવસ્થાનું કદ 338 અબજ ડોલર છે. અર્થવ્યવસ્થાના કદના સંદર્ભમાં મહારાષ્ટ્ર સૌથી આગળ છે પરંતુ વૃદ્ધિની દ્રષ્ટિએ કર્ણાટક સૌથી ઝડપી ચાલી રહ્યું છે. યુપી, તમિલનાડુ અને ગુજરાત પણ ટ્રિલિયન ડોલરની અર્થવ્યવસ્થા બનવાની રેસમાં છે. પરંતુ તેઓ આ લક્ષ્ય સુધી કેટલી ઝડપથી પહોંચે છે તે ત્રણ બાબતો પર નિર્ભર રહેશે. અર્થતંત્રનું કદ, ઝડપ અને વિનિમય દર.

દેશના જીડીપીમાં મહારાષ્ટ્રનો હિસ્સો સૌથી વધુ

મહારાષ્ટ્ર 1 ટ્રિલિયન ડોલરની અર્થવ્યવસ્થાનું લક્ષ્ય હાંસલ કરનાર દેશનું પ્રથમ રાજ્ય બની શકે છે. આ રાજ્યનું ઔદ્યોગિક ઉત્પાદન દેશમાં સૌથી વધુ છે. દેશના જીડીપીમાં મહારાષ્ટ્રનો હિસ્સો સૌથી વધુ 13.24% છે. મહારાષ્ટ્ર સરકારે 2030 સુધીમાં તેની અર્થવ્યવસ્થાને $1 ટ્રિલિયન સુધી લઈ જવાનું લક્ષ્ય રાખ્યું છે. આ લક્ષ્યાંક હાંસલ કરવા માટે રાજ્યની અર્થવ્યવસ્થાએ 11%ની ઝડપે વૃદ્ધિ કરવી પડશે. 80.3 રૂપિયા પ્રતિ ડૉલરના સરેરાશ વિનિમય દર મુજબ મહારાષ્ટ્રની અર્થવ્યવસ્થા 439 બિલિયન ડૉલર એટલે કે 31.1 લાખ કરોડ રૂપિયાની છે.

ટ્રિલિયન ડોલરની રેસમાં રહેલ તામિલનાડુનો દેશના જીડીપીમાં 8.82% હિસ્સો

તમિલનાડુ પણ 1 ટ્રિલિયન ડોલરની અર્થવ્યવસ્થા બનવાના માર્ગ પર ઝડપથી આગળ વધી રહ્યું છે. રાજ્ય સરકારે 2030 સુધીમાં આ લક્ષ્ય સુધી પહોંચવાનો લક્ષ્‍યાંક રાખ્યો છે અને આ માટે ઘણી મહત્વકાંક્ષી યોજનાઓ પણ તૈયાર કરી છે. આ રાજ્યમાં દેશમાં સૌથી વધુ ફેક્ટરીઓ છે. તમિલનાડુમાં ઓટોમોબાઈલ, ટેક્સટાઈલ, લેધર, ફાર્મા, કેમિકલ અને પ્લાસ્ટિક સંબંધિત ઉદ્યોગો હાજર છે. દેશના જીડીપીમાં તમિલનાડુનો હિસ્સો 8.82% છે. 80.3 રૂપિયા પ્રતિ ડૉલરના સરેરાશ વિનિમય દર મુજબ, તમિલનાડુની અર્થવ્યવસ્થા 294 બિલિયન ડૉલર એટલે કે 23.6 લાખ કરોડ રૂપિયાની છે.

યુપી સરકારે 2027 સુધીમાં ટ્રિલિયન ડોલરની અર્થવ્યવસ્થા બનાવવાનું રાખ્યું લક્ષયાંક

ઉત્તર પ્રદેશ સરકારે વર્ષ 2027 સુધીમાં 1 ટ્રિલિયન ડોલરની અર્થવ્યવસ્થા બનાવાનું લક્ષ્ય રાખ્યું છે. આ માટે રાજ્યે તેનો જીડીપી ગ્રોથ 32% સુધી લઈ જવો પડશે. હાલમાં, રાજ્યના અર્થતંત્રમાં કૃષિનો ફાળો 23%, ઉત્પાદન ક્ષેત્રે 27% અને સેવાઓમાં 50% છે. આ ત્રણેય ક્ષેત્રોના ઉત્પાદનમાં અનેકગણો વધારો કરવો પડશે. દેશની અર્થવ્યવસ્થામાં યુપીનો હિસ્સો 8.41% છે. 80.3 રૂપિયા પ્રતિ ડોલરના સરેરાશ વિનિમય દર મુજબ, યુપીની અર્થવ્યવસ્થા 281 અબજ ડોલર એટલે કે 22.6 લાખ કરોડ રૂપિયાની છે.

આ પણ વાંચો : Video: ઓલિમ્પિક ઉદ્દઘાટન સમારંભ પહેલાં તોફાનીઓએ પેરિસને બાનમાં લીધું, ટ્રેન વ્યવહાર પણ ખોરવી નાખ્યો

કર્ણાટકની અર્થવ્યવસ્થા હાલ 279 બિલિયન ડૉલર

દક્ષિણનું રાજ્ય કર્ણાટક પણ 1 ટ્રિલિયન ડોલરનું અર્થતંત્ર બનવાની રેસમાં છે. રાજ્યએ 2027 સુધીમાં આ સીમાચિહ્ન સુધી પહોંચવાનું લક્ષ્ય નક્કી કર્યું છે. આ માટે પોતાનો જીડીપી ગ્રોથ રેટ 15% વધારવો પડશે. કર્ણાટક વૈશ્વિક ઇનોવેશન અને સ્ટાર્ટઅપનું હબ છે. આજે, રાજધાની બેંગલુરુમાં વિશ્વભરની કંપનીઓના R&D કેન્દ્રો છે. બાયોટેકનોલોજી, સોફ્ટવેર ડેવલપમેન્ટ અને ઈલેક્ટ્રોનિક્સના ક્ષેત્રોમાં કર્ણાટક એક મોટું નિકાસકાર છે. દેશની અર્થવ્યવસ્થામાં તેનો હિસ્સો 8.36% છે. 80.3 રૂપિયા પ્રતિ ડૉલરના સરેરાશ વિનિમય દર મુજબ કર્ણાટકની અર્થવ્યવસ્થા 279 બિલિયન ડૉલર એટલે કે 22.4 લાખ કરોડ રૂપિયાની છે.

જુઓ ગુજરાતની શું સ્થિતિ છે

ગુજરાત સરકારે 2027 સુધીમાં જીડીપી વધારીને $500 બિલિયન કરવાનું લક્ષ્ય રાખ્યું છે. આ લક્ષ્યાંક હાંસલ કરવા માટે, રાજ્યે 14.5% વૃદ્ધિ હાંસલ કરવી પડશે. ગુજરાતમાં ઓટો, ફાર્મા, કેમિકલ, ટેક્સટાઇલ અને પેટ્રોલિયમ ઉદ્યોગોને લગતી ઘણી કંપનીઓ છે. દેશના બે સૌથી મોટા અમીર ગૌતમ અદાણી અને મુકેશ અંબાણી આ રાજ્યના છે. ડાયમંડ પ્રોસેસિંગમાં સુરતની વિશ્વમાં કોઈ સ્પર્ધા નથી. ગુજરાત દેશનું સૌથી મોટું કાર્ગો હેન્ડલિંગ રાજ્ય છે. દેશની અર્થવ્યવસ્થામાં તેનો હિસ્સો 8.25% છે. 80.3 રૂપિયા પ્રતિ ડૉલરના સરેરાશ વિનિમય દર મુજબ ગુજરાતનું અર્થતંત્ર 277 બિલિયન ડૉલર એટલે કે 19.4 લાખ કરોડ રૂપિયાનું છે.

વિકાસ ક્ષેત્રે કર્ણાટક સૌથી આગળ

જો વિકાસની વાત કરીએ તો આ પાંચ રાજ્યોમાં કર્ણાટક 6.2% સાથે સૌથી આગળ છે. આ પછી ગુજરાત (6.1%) છે. તમિલનાડુમાં 5.3%, ઉત્તર પ્રદેશમાં 4.7% અને મહારાષ્ટ્રમાં 3.8% છે. ઉચ્ચ વૃદ્ધિ દરને ધ્યાનમાં રાખીને કર્ણાટક અને ગુજરાત 22 વર્ષમાં $1 ટ્રિલિયન સુધી પહોંચે તેવી અપેક્ષા છે. મહારાષ્ટ્રને આ સીમાચિહ્ન સુધી પહોંચવામાં 28 વર્ષ લાગી શકે છે.

આ પણ વાંચો : અનુપમ ખેરથી લઈને સિદ્ધાર્થ મલ્હોત્રા સુધી… સ્ટાર્સે કારગિલ વિજય દિવસ પર શહીદોને અર્પી શ્રદ્ધાંજલિ