મહારાષ્ટ્રઃ બદલાપુરની જાણીતી શાળામાં બે છોકરીઓની જાતીય સતામણી સામે લોકોમાં રોષ, લોકલ ટ્રેન સેવા પ્રભાવિત

બદલાપૂર, 20 ઓગસ્ટ: થાણે જિલ્લાના બદલાપુરની એક જાણીતી શાળામાં એક છોકરીની કથિત જાતીય સતામણીની ઘટના સામે લોકોનો ગુસ્સો ફાટી નીકળ્યો છે. વિદ્યાર્થીઓના વાલીઓ અને સ્થાનિક લોકો શાળા સામે વિરોધ કરી રહ્યા છે. જેની અસર લોકલ ટ્રેનો પર પણ પડી છે. બદલાપુર રેલવે સ્ટેશન પર ઘણી લોકલ ટ્રેનોને રોકી દેવામાં આવી છે. આ જાણકારી CPRO સેન્ટ્રલ રેલવે દ્વારા આપવામાં આવી છે.

લોકલ ટ્રેનમાં મુસાફરી કરતા લોકોની મુશ્કેલી વધી છે

CPROએ કહ્યું કે વિરોધ કરી રહેલા લોકો રેલવે ટ્રેક પર આવી ગયા છે. જેના કારણે અંબરનાથ અને કર્જત વચ્ચે અપ અને ડાઉન બંને લાઇન પર લોકલ સેવાઓને અસર થઇ છે. અધિકારીઓ આ સમસ્યાને વહેલી તકે ઉકેલવા પ્રયાસ કરી રહ્યા છે. હાલમાં પાંચ ટ્રેનો પ્રભાવિત છે. બદલાપુર ખાતે ચાર ટ્રેન ઊભી છે અને એક ટ્રેન ડાયવર્ટ કરવામાં આવી છે. જેના કારણે લોકલ ટ્રેનમાં મુસાફરી કરતા લોકોને મુશ્કેલીનો સામનો કરવો પડી રહ્યો છે.

આરોપીઓને કડકમાં કડક સજા કરવાની માંગ

મળતી માહિતી મુજબ, બદલાપુરની એક નામાંકિત શાળામાં બે સગીર છોકરીઓ સાથે અત્યાચારની ઘટના બાદ માતા-પિતા અને સ્થાનિક નાગરિકોએ શાળાની બહાર વિરોધ પ્રદર્શન કર્યું હતું. વાલીઓનું કહેવું છે કે અમારી દીકરીઓ અહીં સુરક્ષિત નથી અને તેમણે સ્કૂલ પ્રશાસન પાસે દીકરીઓની સુરક્ષા માટે ગેરંટી માંગી છે.

આ આંદોલનકારી લોકોની માંગ છે

શાળામાં ત્રણથી સાડા ત્રણ વર્ષની બે વિદ્યાર્થીનીઓ સાથે કરાયેલા અમાનવીય કૃત્યથી વાલીઓમાં ભારે રોષ ફેલાયો છે. શાળાના ગેટ પર મોટી સંખ્યામાં વાલીઓ અને સ્થાનિક લોકો એકઠા થયા હતા અને શાળા પ્રશાસનની બેદરકારી સામે રોષ વ્યક્ત કર્યો હતો. હજુ સુધી શાળા પ્રશાસન તરફથી કોઈ નક્કર જવાબ આપવામાં આવ્યો નથી, જેના કારણે રોષે ભરાયેલા વાલીઓની માંગણીઓ હજુ પણ પડતર છે. બદલાપુરના વાલીઓ અને નાગરિકો એક અવાજે કહી રહ્યા છે કે શાળાએ છોકરીઓની સુરક્ષા માટે ગંભીર પગલાં લેવા જોઈએ.

બદલાપુરમાં લોકોનું પ્રદર્શન

કોઈ અનિચ્છનીય બનાવ ન બને તે માટે પોલીસે ઘટના સ્થળે ચુસ્ત બંદોબસ્ત ગોઠવી દીધો છે. પોલીસ દ્વારા કેસ નોંધવામાં વિલંબ થતા શહેરીજનોમાં ભારે રોષ જોવા મળી રહ્યો છે. વાલીઓની માંગ છે કે શાળાએ આગળ આવીને દોષિતો સામે કડક કાર્યવાહી કરવી જોઈએ અને ભવિષ્યમાં આવી ઘટનાઓ ન બને તે માટે છોકરીઓની સુરક્ષા માટે યોગ્ય વ્યવસ્થા કરવામાં આવે.

આ પણ જૂઓ: યોદ્ધાના અવતારમાં છવાયો વિક્કી કૌશલ, છાવાના ટીઝરની સાથે મોટી જાહેરાત